‘Volop te doen in die werk van die here’

¹ Ons het beslis ’n vol program van teokratiese bedrywighede gedurende April en Mei om na uit te sien! Op 14 April gaan ons die herdenking van Christus se dood vier. Soveel mense moontlik moet aangemoedig word om vir daardie belangrike geleentheid aanwesig te wees: sakekennisse, ongelowige familielede, skoolmaats, nuwe belangstellendes en Bybelstudente. Stel ’n lys op van diegene wat jy van plan is om te nooi sodat niemand oor die hoof gesien word nie.

² Die daaropvolgende week sal ons almal wat die Gedenkmaal bygewoon het, aanmoedig om na die spesiale openbare toespraak op 23 April te luister, oor die onderwerp “Die einde van valse godsdiens is naby”. Ons hoop dat baie belangstellendes wat hierdie reguit boodskap hoor, sal besef hoe belangrik dit is om op ’n gereelde grondslag met die gemeente te assosieer, nie net by spesiale geleenthede nie.

³ ’n Spesiale Koninkryksnuus gaan vrygestel word: ’n Hoogtepunt van die vergadering op 23 April sal die vrystelling van ’n tydige Koninkryksnuus Nr.34 met vier bladsye wees wat ons tot 14 Mei vir soveel mense moontlik sal aanbied. Stem jy nie saam dat daar gedurende hierdie Gedenkmaalseisoen ‘volop in die werk van die Here te doen’ is nie?—1 Kor. 15:58.

⁴ ’n Voorraad Koninkryksnuus sal aan elke gemeente gestuur word. Die kartonne met die Koninkryksnuus moet op ’n veilige plek gebêre word en eers aan die einde van die program op 23 April oopgemaak word. Dan sal die Koninkryksnuus vir verspreiding aan die broers en die publiek beskikbaar wees. Aan die einde van die gemeentelike vergaderinge, kringbyeenkomste of spesiale byeenkomsdagprogramme op 23 April sal die aanwesiges elk ’n eksemplaar ontvang sodat hulle met die inhoud daarvan bekend kan raak en toegerus kan wees om dit te versprei.

⁵ Ouer manne sal volop hê om te doen: Vroeg vandeesmaand moet die liggaam van ouer manne vergader om besonderhede van die spesiale kampanje te bespreek. Gemeentes moet hulle hele toegewese gebied probeer dek. Voor die kampanje eindig, moet ’n spesiale poging aangewend word om in dié gebiede te werk wat nie gedurende die afgelope ses maande gedek is nie. Met die oog op die belangrikheid van die werk wil ons soveel tyd moontlik vir die bediening opsysit. Daar sal ongetwyfeld meer verkondigers as gewoonlik wees wat hulppionierdiens doen. Baie Bybelstudente sal heel waarskynlik ook by ons aansluit as nuwe ongedoopte verkondigers. Wat ’n heuglike tyd sal ons tog hê terwyl ons saam in die Here se werk arbei!

⁶ Gemeentelike Boekstudiehouers moet definitiewe reëlings tref vir groepgetuieniswerk op Saterdae en op Sondae. Almal moet aangemoedig word om ’n ywerige deelname te hê. Benewens bedrywighede oor die naweek moet aandgetuieniswerk ten minste een keer per week gedurende die kampanje gereël word. Party sal moontlik ná skool vir velddiens bymekaar wil kom om saam met leerlinge te werk wat daarvan sal hou om ’n ekstra deelname te hê.

⁷ Velddiensvergaderinge moet só gereël word dat verkondigers en pioniers elke dag vroeg met hulle bediening kan begin. Hierdie vergaderinge moet kort wees. By elke vergadering moet daar ’n eenvoudige aanbieding van die Koninkryksnuus wees. Velddiensvergaderinge in die middag kan ’n wenk of twee insluit oor hoe om herbesoeke te doen by diegene wat die Koninkryksnuus geneem het. Maar party verkondigers sal moontlik verkies om in die oggend sowel as in die middag aan die verspreiding deel te neem. Daarom moet die diensopsiener seker maak dat daar genoeg gebied beskikbaar is. Die naam en adres van almal wat belangstelling toon, moet op ’n huis-tot-huis-verslag geskryf word. Die hoofpunte van die kort bespreking kan in die kolom vir opmerkings ingesluit word. Dit sal die weg baan vir ’n herbesoek later in die week of maand.

⁸ As een gemeente ’n ander help om hulle gebied te dek, moet die name en adresse van belangstellendes vir die gemeente gegee word aan wie die gebied behoort.

⁹ Ouers, streef julle kinders daarna om ongedoopte verkondigers te word? Daar is in party gemeentes opgemerk dat welopgevoede kinders hulle toegewyde ouers al etlike jare in die bediening vergesel, en die kinders doen baie goed, hoewel hulle nog nie verkondigers van die goeie nuus is nie. Ouers behoort daaroor na te dink of hulle kinders nie vir hierdie voorreg kwalifiseer nie. Twee ouer manne kan al die faktore met die gesinshoof bespreek en bepaal of die kind ’n ongedoopte verkondiger kan wees.—om-AF bl. 99-100.

¹⁰ Is daar enige verkondigers in julle gemeente se gebied wat nie meer ’n aandeel daaraan het om ’n lofofferande aan Jehovah te bring nie? (Heb. 13:15). Party wat onbedrywig is, is moontlik deur ontmoediging of deur die sorge van die lewe oorweldig, hoewel hulle aanhou om die Bybel se sedelike standaarde te handhaaf. ’n Vriendelike besoek deur een van die ouer manne beweeg hulle moontlik om weer gereeld met die gemeente te assosieer en om op die gepaste tyd weer in die bediening bedrywig te word.

¹¹ Almal wat aan die vereistes voldoen, kan aan hierdie genotvolle werk deelneem: Vind party van julle, as kinders of tienderjariges, dit moeilik om aan die huis-tot-huis-bediening deel te neem? Wat van julle nuwelinge wat min ondervinding in die predikingswerk het? Julle sal dit baie geniet om hierdie spesiale Koninkryksnuus te versprei! ’n Eenvoudige aanbieding is al wat nodigis.

Jy kan iets soos die volgende sê:

◼ “Ons versprei hierdie maand ’n belangrike boodskap in 232 lande oor die hele wêreld. Die boodskap is belangrik omdat dit ons gegronde redes gee om te glo dat daar ’n oplossing is vir die probleme waarmee ons vandag te kampe het. Ons wil graag jou persoonlike eksemplaar by jou laat.”

Of jy kan die volgende probeer:

◼ “Hierdie maand versprei ongeveer vyfmiljoen vrywilligers ’n belangrike boodskap in baie tale. Dit is bedoel vir mense wat graag ’n einde wil sien aan die probleme waarmee ons almal vandag te kampe het. Hierdie is jou persoonlike eksemplaar.”

Hierdie eenvoudige aanbieding is dalk net vir jou:

◼ “Ons moedig almal aan om hierdie belangrike boodskap te lees met die titel [lees die titel van die Koninkryksnuus]. Let op wat dit hier op bladsy 2 sê omtrent die toenemende probleme van ... [lees gekose sin uit die Koninkryksnuus]. Ons is seker jy sal dit geniet om die res van hierdie tydige boodskap te lees. Hierdie is jou eksemplaar.”

¹² Toon persoonlike belangstelling in elkeen wat die Koninkryksnuus neem. Praat stadig en duidelik; dit is nie nodig om jou aanbieding haastig te doen nie. Ons wil ons gebied deeglik dek en sorg dat ons ’n persoonlike eksemplaar aan almal gee wat sê dat hulle daarin belangstel om die Koninkryksnuus te lees. Wanneer niemand tuis is nie, moet jy dit sorgvuldig op jou huis-tot-huis-verslag aanteken sodat jy op ’n gepaste tyd kan teruggaan om die Koninkryksnuus vir die huisbewoner aan te bied. Hierdie Koninkryksnuus kan in die straatgetuieniswerk gebruik word wanneer iemand daarin belangstel om die inligting te lees. Eksemplare moenie na willekeur uitgedeel word asof dit strooibiljette is nie. Nader verbygangers eerder en verduidelik die belangrikheid van die boodskap daarin. Gebruik die Koninkryksnuus in informele getuieniswerk, soos wanneer jy reis of wanneer jy gedurende jou etenstyd vir medewerknemers getuig. Diegene wat aan die huis gekluister is of wat andersins ongesteld is, kan dit aanbied vir besoekers, dokters en verpleegsters, verkoopsmanne en ander wat na hulle huis toe kom.

¹³ Hoeveel herbesoeke sal jy gedurende die kampanje doen? Ongetwyfeld baie, aangesien almal wat belangstelling in die Koninkryksnuus toon weer besoek moet word. Tydens die eerste besoek is dit beter om die aandag slegs op die Koninkryksnuus te vestig. Wanneer jy dan teruggaan, kan jy ’n paar opmerkings oor die tydigheid van die boodskap in die Koninkryksnuus maak. Luister aandagtig terwyl die huisbewoner sy mening uitspreek oor wat hy gelees het. Sy opmerkings sal jou help om te weet wat jy in die jongste tydskrifte kan aanbied en hoe jy dalk vir verdere besprekings kan voorberei. As die huisbewoner tydens die herbesoek gunstig reageer, kan jy ’n Bybelstudie probeer begin.—1 Kor. 3:6,7.

¹⁴ ‘Julle arbeid is nie tevergeefs nie’: Sal al hierdie werk die moeite werd wees? Paulus het die Korintiërs verseker: ‘Julle arbeid is nie tevergeefs in verband met die Here nie’ (1 Kor. 15:58). Deur die jare heen is ons pogings om die Koninkryksnuus te versprei grootliks geseën. ’n Egpaar wat in ’n leë woonstel ingetrek het, het ’n ouer eksemplaar van die Koninkryksnuus in ’n laai gevind. Dit is al wat in die hele woonstel agtergelaat is. Nadat hulle dit gelees het, het hulle met die plaaslike gemeente in aanraking gekom en ’n Bybelstudie gevra. Hulle het al die vergaderinge begin bywoon en later die begeerte uitgespreek om gedoop te word. Miskien sal ’n eksemplaar wat jy by iemand laat soortgelyke resultate meebring!—Sien ook die Awake! van 8 November 1976, bladsy15.

¹⁵ Ons het ’n ontsaglike taak voor ons. Ons doelwit is dat elke gemeente sy toegewese gebied teen 14 Mei dek of teen die einde van die maand as dit nodig is om die tyd vir die verspreiding van die Koninkryksnuus te verleng. Besendings word gemaak sodat elke gewone en hulppionier 250 eksemplare van die Koninkryksnuus sal ontvang. Elke gemeenteverkondiger sal tot 50 eksemplare ontvang. Verkondigers en pioniers moet slegs soveel eksemplare neem as wat hulle sal kan versprei en moet enige ekstra eksemplare teruggee sodat ander dit kan gebruik. Goeie samewerking in hierdie verband sal verseker dat hierdie belangrike boodskap vir soveel mense moontlik aangebied word. As party gemeentes weens ’n groot gebiedstoewysing hulle gebied nie teen die middel van Mei gedek het nie en eksemplare steeds beskikbaar is, sal dit dalk prakties wees as hulle nabygeleë gemeentes nooi om te help. In ander gemeentes kan daar miskien plaaslik in die behoefte voorsien word as verkondigers meer doen deur as hulppioniers te dien of deur meer dikwels aan die bediening deel te neem.

¹⁶ Heelhartige toegewydheid aan Jehovah sal nodig wees as ons ons werk wil volbring (Kol. 3:23). Lewens is op die spel. Mense kan dit nie bekostig om die betekenis van hedendaagse wêreldtoestande te ignoreer nie. Die tyd word min. Hulle moet die feit onder die oë sien dat die mens nie die oplossing vir hierdie wêreld se probleme het nie. God het wel die oplossing. Diegene wat graag God se seën wil verkry, moet sonder versuim beslissend optree in ooreenstemming met sy vereistes.

¹⁷ Sal ons, aan die einde van die spesiale kampanje op 14 Mei, ons hand verslap? Nee! Ons sal besig bly in ooreenstemming met Paulus se geïnspireerde raad.