Spesiale traktaatkampanje vanaf 20 Oktober–16 November!
1 Vanaf Maandag 20 Oktober sal ons vier weke lank deelneem aan ’n spesiale verspreiding van ’n nuwe traktaat met die titel Die waarheid—Wil jy dit graag vind? Ons hoop dat hierdie aardwye spesiale kampanje groter belangstelling in die enigste bron van waarheid sal wek.—Joh. 17:17.
2 Die traktaat gee kortliks Bybelse antwoorde op ses belangrike vrae: “Gee God werklik vir ons om?” “Sal oorlog en lyding ooit tot ’n einde kom?” “Wat gebeur met ons wanneer ons sterf?” “Is daar enige hoop vir die dooies?” “Hoe moet ek bid sodat God my sal verhoor?” en “Hoe kan ek geluk in die lewe vind?” Die kerke van die Christendom het nog nooit bevredigende antwoorde op hierdie vrae voorsien nie. Selfs baie mense wat sê dat hulle nie Christene is nie, het al oor hierdie vrae gewonder, maar weet dalk nie dat duidelike antwoorde in die Bybel gevind kan word nie. Daarom behoort hierdie boodskap oral byval te vind.
3 Dek julle gebied: Probeer om soveel van julle huis-tot-huis-gebied as moontlik te dek. As julle ’n groot gebied het, sal die ouer manne julle dalk aanmoedig om tydens die eerste besoek ’n traktaat by nietuise te laat. Onthou om ’n traktaat te gee vir bure, familielede, kennisse by die werk of skool en ander met wie julle gereeld praat. Dalk kan jy jou sake so reël dat jy in Oktober of November hulppionierdiens kan doen. Het jy ’n kind of ’n Bybelstudent wat goeie geestelike vooruitgang maak en wat dalk kwalifiseer om as ’n ongedoopte verkondiger saam met ons aan hierdie kampanje deel te neem? Indien wel, stel die ouer manne hiervan in kennis.
4 Wat om te sê: Die beste is om jou aanbieding kort te hou sodat meer mense met die boodskap bereik kan word. Vra eenvoudig die huisbewoner een van die ses vrae op die voorblad en wys hom die antwoord in die traktaat. Dit sal alle verkondigers in staat stel om hulle aanbieding by die behoeftes van die gebied aan te pas. As iemand belangstelling toon, moet jy ’n aantekening maak en later teruggaan. Oor naweke kan die jongste tydskrifte saam met die traktaat aangebied word. Wanneer die kampanje op 16 November eindig, sal ons die Leer Bybel-boek aanbied. Enige oorblywende traktate kan op dieselfde manier as ander beskikbare traktate gebruik word.
5 Begin ’n Bybelstudie: Hierdie traktaat is spesiaal bedoel om ons te help om Bybelstudies te begin. Wanneer jy ’n herbesoek doen by iemand wat belangstelling getoon het, kan jy dalk vra watter Bybelwaarheid vir hom vertroosting of verligting gebring het. Wys vir hom die agterblad waar ons Bybelstudiereëling verduidelik word, en gee vir hom ’n eksemplaar van die Leer Bybel-boek. Indien moontlik kan jy kortliks ’n paragraaf of twee bespreek uit die hoofstuk wat meer inligting bevat oor die onderwerp wat hy gekies het.
6 Jehovah soek na diegene wat hom “met gees en waarheid” sal aanbid (Joh. 4:23). Mag ons almal deelneem aan hierdie spesiale kampanje om ander te help om die waarheid te vind!