Verbeter jou vaardighede in die bediening—Hoe om op potensiële gesprekdempers te reageer

Waarom dit belangrik is: Stel jou voor jy weet dat ’n natuurramp jou omgewing binnekort gaan tref. Mense gaan sterf tensy hulle na veiligheid vlug. Jy gaan na ’n buurman se huis toe om hom te waarsku, maar hy val jou in die rede en sê dat hy besig is. Jy sal tog seker nie eenvoudig ophou om hom te probeer help nie! Baie mense in ons gebied wys ons weg sonder dat hulle besef dat ons boodskap lewensreddend is. Dalk is hulle besig met iets anders wanneer ons hulle besoek (Matt. 24:37-39). Of miskien is hulle bevooroordeeld weens valse gerugte (Matt. 11:18, 19). Hulle neem dalk aan dat daar geen verskil is tussen ons en die godsdienste wat slegte vrugte voortbring nie (2 Pet. 2:1, 2). As die huisbewoner aanvanklik nie belangstel nie, moet ons nie gou wees om tou op te gooi nie.

Hoe om dit te doen:

Neem ’n paar oomblikke voordat jy van huis tot huis gaan om te dink oor potensiële gesprekdempers en hoe jy daarop kan reageer.
As die huisbewoner ’n beswaar opper, kan jy taktvol probeer om die gesprek voort te sit. Miskien kan jy dit doen deur hom te prys. Byvoorbeeld, as hy sê dat hy sy eie godsdiens het, kan jy dalk sê: “Ek het gehoop dat ek iemand soos jy sal vind, wat in geestelike dinge belangstel.” As jy erkenning gee aan die huisbewoner se gevoelens en omstandighede, sal dit jou soms in staat stel om nog steeds ’n getuienis te gee. Byvoorbeeld, as hy sê dat hy besig is, kan jy sê: “Ek verstaan. Maar voordat ek gaan, wil ek graag vir jou iets gee.” ’n Ander opsie is om ’n vraag te vra as die huisbewoner sê dat hy nie belangstel nie. Jy kan sê: “Bedoel jy dat jy nie in die Bybel belangstel nie, of stel jy nie in godsdiens oor die algemeen belang nie?”
Lê goeie oordeel aan die dag. Onthou, Jehovah dwing mense nie om te luister nie (Deut. 30:19). Elkeen moet sy eie vrag van geestelike verantwoordelikheid dra (Gal. 6:5). As die huisbewoner daarop aandring dat hy nie ons boodskap wil hoor nie, is dit beter om te gaan. Deur sy gevoelens te respekteer, skep ons dalk vir ’n ander verkondiger in die toekoms die geleentheid om vir hom te getuig.—1 Pet. 3:15.

Wenk vir die maand:

Wanneer jy ’n potensiële gesprekdemper teëkom, kan jy en jou velddiensmaat, nadat julle die huis verlaat het, praat oor hoe jy beter daarop kon gereageer het.