Verbeter jou vaardighede in die bediening—Begin ’n tydskrifroete

Waarom dit belangrik is: Baie mense wat dit geniet om ons tydskrifte te lees, wil nie die Bybel saam met ons studeer nie. Hulle is moontlik gelukkig met hulle godsdiens of voel dat hulle nie tyd het om te studeer nie. Maar omdat hulle ons tydskrifte gereeld lees, sal hulle dalk ’n verlange na God se Woord ontwikkel (1 Pet. 2:2). ’n Spesifieke artikel raak miskien hulle hart, of hulle omstandighede verander dalk. Gereelde, kort besoeke sal hulle meer op hulle gemak met ons laat voel en ons help om uit te vind wat hulle belangstellings en bekommernisse is. Uiteindelik kan ’n Bybelstudie moontlik begin word.

Hoe om dit te doen:

Sit elke maand tyd opsy om vir die persoon die jongste nommers van Die Wagtoring en die Ontwaak! af te lewer. Jy kan hom miskien op ander tye gedurende die maand besoek om sy aptyt te wek vir ’n artikel in die tydskrifte wat jy by hom gelaat het of om vir hom die aanbod vir daardie maand aan te bied. Hou goeie aantekeninge.—Sien Ons Koninkryksbediening vir Januarie 2014, bl. 3.
Berei vir elke besoek voor. Moenie net die tydskrifte aflewer nie; betrek die huisbewoner by ’n gesprek en probeer ’n goeie verhouding met hom opbou sodat jy sy belangstelling verder kan kweek.
Wees op die uitkyk vir geleenthede om ’n studie te begin. As iemand op jou tydskrifroete vir jou vra wat die Bybel oor ’n sekere onderwerp sê, moet jy vir hom ’n studiepublikasie bring wat die antwoord bevat en dit saam bespreek. Voordat jy vertrek, moet jy ’n verwante vraag opper en dit gedurende die volgende besoek bespreek. As jy gereeld en stelselmatig selfs net kort besprekings met behulp van die Bybel of een van ons studiepublikasies het, hou jy ’n Bybelstudie. Het jy vir die huisbewoner die Goeie nuus-brosjure aangebied en ’n kort Bybelstudie gedemonstreer? Het jy vir hom die video Waarom moet jy die Bybel studeer? gewys, asook die video Wat gebeur tydens ’n Bybelstudie? Al wou die persoon in die verlede nie studeer nie, verander omstandighede. Sal dit goed wees om weer te probeer?

Wenk vir die maand:

Maak ’n lys van diegene wat op jou tydskrifroete kan wees. Bied vir hulle die jongste nommers van die tydskrifte aan en sê dat jy vir hulle die volgende nommer sal bring.