Politieke onrus wat Bybelprofesieë vervul

Vandag is mense baie verdeeld oor politieke sake. Hulle stem nie saam oor die wette wat hulle alledaagse lewens raak nie en hulle spreek hulle opinies hieroor op ’n aggressiewe manier uit. In die regering stem wetgewers en ander amptenare dikwels glad nie saam met mekaar nie en aanvaar hulle nie die opinies van ander nie. Sulke verskille kan tot politieke onrus lei wat dit vir die regering moeilik kan maak om hulle werk te doen.

Maar die politieke onrus in die Verenigde State en Brittanje, soos die Verenigde Koninkryk ook genoem word, is veral belangrik. Hoekom? Omdat die Bybel voorspel het dat hierdie onrus in hierdie twee nasies sal bestaan en dat God se regering, gedurende hierdie tyd, die situasie op aarde heeltemal sal verander.

Politieke onrus aan “die einde van die dae”

Die Bybel bevat ’n opwindende profesie, wat in die boek Daniël opgeteken is. In hierdie profesie openbaar God “wat aan die einde van die dae gaan gebeur”. Toe Daniël hierdie woorde geskryf het, het dit verwys na ’n tyd in die toekoms wanneer daar belangrike veranderinge vir mense sou plaasvind. – Daniël 2:28.

God het hierdie Bybelprofesie in ’n droom aan die koning van Babilon gegee. In hierdie droom het die koning ’n ontsaglike groot beeld gesien wat van verskillende metale gemaak is. Later het die profeet Daniël verduidelik dat die beeld, van die kop tot die voete, wêreldmagte verteenwoordig wat deur die geskiedenis heen sou kom en gaan.a Uiteindelik sal die beeld heeltemal vernietig word deur ’n klip wat ’n Koninkryk, of ’n regering, verteenwoordig wat deur God opgerig is. – Daniël 2:36-45.

Volgens die profesie sal God se Koninkryk alle menseregerings vervang. Hierdie Koninkryk is dieselfde een waarvoor Jesus sy volgelinge geleer het om te bid toe hy gesê het: “Laat u Koninkryk kom.” – Matteus 6:10.

Maar waar in die profesie voorspel die Bybel politieke onrus? Let op dat die voete van die beeld “gedeeltelik van yster en gedeeltelik van klei” gemaak was (Daniël 2:33). Hierdie mengsel was verskillend van die soliede metale waarvan die res van die beeld gemaak was, wat wys dat daar een wêreldmag sou wees wat van die ander sou verskil. Hoe? Daniël se profesie verduidelik:

Volgens die profesie sal die wêreldmag wat deur die voete van die beeld voorgestel word, politieke onrus ervaar. Die mense wat onder hierdie wêreldmag bly, sal dinge doen wat dit swakker sal maak.

Daniël se profesie word vandag vervul

Die voete van die beeld stel die magtigste wêreldmag in ons tyd voor, naamlik die Verenigde State en Brittanje wat saamwerk. Hoe ondersteun gebeure in ons dag hierdie idee?

Die voete van die beeld is “gedeeltelik van yster en gedeeltelik van klei” gemaak, en hierdie kombinasie van materiale maak die voete swak (Daniël 2:42). Vandag het beide die Verenigde State en Brittanje swakker geword as gevolg van verdeeldhede onder hulle eie mense. Byvoorbeeld, in beide lande staan groepe van hulle eie burgers mekaar teë. Mense betoog op ’n gewelddadige manier vir hulle regte. Die amptenare wat deur mense verkies word, stem dikwels nie saam oor verskillende kwessies nie. Omdat hulle mense so verdeeld is, kan beide regerings by tye nie hulle staatsbeleide effektief implementeer nie.

Kom ons kyk verder na die betekenis van ’n paar besonderhede van Daniël se profesie en hoe dit vandag vervul word:

Profesie: “Die koninkryk [sal] verdeeld . . . wees. Maar daar sal van die hardheid van yster daarin wees.” – Daniël 2:41.

Betekenis: Selfs al het die Verenigde State en Brittanje verdeeldhede binne hulle eie regerings oor verskillende politieke kwessies, het hulle albei baie sterk militêre magte. As gevolg hiervan kan hulle met ysteragtige mag dinge doen wat die res van die wêreld raak.

Vervulling

Op ’n lys van hoeveel geld elke land aan hulle leërmagte in 2023 spandeer het, sien ons dat die Verenigde State en die Verenigde Koninkryk saam meer geld spandeer het as die volgende 12 lande saam op die lys. – Stockholm se Internasionale Vredesnavorsingsinstituut.

“Die verhouding tussen die Verenigde Koninkryk en die Verenigde State om hulle lande te beskerm en te verdedig . . . het die sterkste vennootskap tussen enige twee lande geword en gebruik die nuutste tegnologie en idees . . . Ons werk saam, ons staan saam, ons veg saam.” – Strategiese Bevelvoering, V.K. se Departement van Verdediging, April 2024.

Profesie: “Net soos die tone van die voete gedeeltelik van yster en gedeeltelik van klei was, so sal die koninkryk gedeeltelik sterk en gedeeltelik swak wees.” – Daniël 2:42.

Betekenis: Ten spyte van hulle militêre mag word die Verenigde State en Brittanje beperk deur die manier hoe hulle demokratiese regerings werk. Sonder die goedkeuring van die oorgrote meerderheid, sukkel hierdie regerings partykeer om hulle planne uit te voer.

Vervulling

“Verdeeldhede in die Amerikaanse politiek maak dit vir [die Verenigde State] moeilik om te doen wat dit vir die res van die wêreld sê dit kan doen, van veiligheid tot handel, volgens party politieke kenners.” – “The Wall Street Journal.”

“Politieke onrus soos daar nog nooit van tevore ervaar was nie, [het] politici se aandag afgetrek, wat die vermoë van die staatsdiensb beperk om die [Britse] regering se agenda vir hervorming te bevorder.” – Institute for Government.

Profesie: “Hulle [die koninkryk] [sal] met die gewone mense gemeng . . . wees, maar hulle sal nie aan mekaar kleef nie.” – Daniël 2:43.

Betekenis: Gewone mense het dalk ’n sê in hulle regerings, maar die resultaat het nie amptenare of kiesers heeltemal tevrede gestel nie.

Vervulling

“Vandag is Amerikaners se beskouing van politiek en gekose amptenare verskriklik negatief.” – Pew-navorsingsentrum.

“Mense se vertroue in regerings en politici, asook in hulle regeringstelsel, is nou so laag as wat dit ooit was oor die afgelope vyftig jaar, indien nie laer nie.” – “National Centre for Social Research.”

Hoe Daniël se profesie in die toekoms vervul sal word

Volgens Daniël se profesie sal die Verenigde State en Brittanje wat saamwerk, die heersende wêreldmag wees wanneer God se Koninkryk alle menseregerings vervang. – Daniël 2:44.

In ’n parallelle profesie in die boek Openbaring wys die Bybel dat “die konings van die hele aarde” teen Jehovahc God bymekaargebring sal word vir die oorlog van Armageddon, “die oorlog van die groot dag van God die Almagtige” (Openbaring 16:14, 16; 19:19-21). In hierdie oorlog sal Jehovah alle menseregerings vernietig. Nadat hy dit gedoen het, sal daar nie meer enige deel van die wêreldmagte wat deur die beeld in Daniël se profesie voorgestel word, oorbly nie.

Om meer uit te vind, lees die artikel “Wat is die oorlog van Armageddon?”

Vind baat by Daniël se profesie oor politieke onrus

Die Bybel het vandag se politieke onrus in die Verenigde State en Brittanje akkuraat voorspel, en om hieroor te leer, sal jou ’n nuwe perspektief van huidige gebeure gee.

• Jy sal verstaan hoekom Jesus wou gehad het dat sy volgelinge neutraal moet wees wanneer dit kom by hierdie wêreld se politiek (Johannes 17:16). En jy sal ook leer hoekom Jesus, wat deur God as die koning van sy Koninkryk gekies is, gesê het: “My Koninkryk is geen deel van hierdie wêreld nie.” – Johannes 18:36.

• Jy sal aangemoedig word deur die hoop dat die tyd vir God se Koninkryk om op te tree, naby is, asook al die seëninge wat God se heerskappy aan mense belowe. – Openbaring 21:3, 4.

• Jy sal vertroue in die toekoms hê en nie meer bekommerd wees dat probleme tussen nasies die aarde sal vernietig nie. – Psalm 37:11, 29.

Daniël se profesie wys dat die Verenigde State en Brittanje wat saamwerk, wat deur die voete van die beeld voorgestel word, die laaste menslike wêreldmag sal wees wat oor mense heers. Nadat dit weg is, sal dit vervang word deur ’n volmaakte regering wat vanuit die hemel regeer – God se Koninkryk!

Om meer uit te vind oor wat God se Koninkryk vir mense sal doen, kyk na die video Wat is God se Koninkryk?