Van ons lesers

Altyd laat Ek het die artikel “Is jy altyd laat?” (8 Junie 1989) besonder waardeer. Julle het aanbeveel dat ’n mens voorberei moet wees vir wagtye en leesstof moet saambring om jou produktief besig te hou terwyl jy vir ander wag. Ek het julle wenke sommer baie prakties gevind.

I. D., Nigerië

Afknouers Hoewel niemand by die skool dreig om my te slaan nie, pik die kinders baie op my omdat my ma van ’n ander land kom en anders lyk. Julle artikel oor afknouers by die skool (8 Augustus 1989) het gesê ek moet hulle ignoreer, en dit het my gehelp. Ek besef ook nou dat baie van daardie kinders uit verdeelde huise kom en hulle frustrasies op ander kinders uithaal. Ek is so bly dat julle die jonger geslag verstaan.

M. D., Verenigde State

Oliestorting Toe ek die titel “Oliestorting!” sien, was ek ’n bietjie skepties (22 September 1989). Ek het baie oor die storting in die koerante en tydskrifte gelees en gewonder wat op aarde Ontwaak! kon byvoeg. Wel, nadat ek die feitelike, vars benaderde artikel gelees het, het ek opgehou wonder. Julle het ook verder gegaan as wat koerante en tydskrifte gaan en getoon dat die ware oplossing vir die mensdom se probleme in God se nuwe wêreld sal kom.

C. K., Verenigde State

Spesiale behoeftes Ek is amper 14 en wil julle net bedank vir die artikel van 22 Augustus 1989 oor hulp vir dié met spesiale behoeftes. Toe ek in die laerskool was, het ons drie dowe kinders in ons klas gehad. Die ander kinders het gemaak asof hulle nie bestaan nie en het van hulle gepraat omdat hulle nie kon hoor nie. ’n Paar van ons het toe bymekaargekom en geleer hoe om met hulle te kommunikeer. Toe die ander kinders sien hoe oulik dit was om dit te doen, het hulle ook begin! Ek hoop om eendag by byeenkomste van Jehovah se Getuies vir die dowes te tolk.

A. B., Verenigde State

Godsdiensgeskiedenis Ek is dankbaar vir die reeks “Godsdiens se toekoms met die oog op sy verlede”. Ek loop baie mense met verskillende godsdiensagtergronde raak. Hierdie artikels sal talle help om godsdiens van die begin tot die hede na te spoor.

D. S., Verenigde State

Ek lees die reeks oor godsdiensgeskiedenis. Ek het gewis baie geleer, meer as wat ek ooit op skool geleer het.

B. J., Verenigde State

Sterwende kinders My kleindogter van tien maande het diarree gehad. Die hospitaal het haar huis toe gestuur, en sy het by die dag sieker geword. Ek het julle artikel onthou oor hoe om kinders te red deur ’n resep vir Mondelike Rehidrasieterapie te gebruik (22 September 1988). Ek het die instruksies gevolg, en die volgende dag het sy haar kragte begin terugkry. Die diarree het opgehou, en sy het heeltemal herstel.

R. M., Verenigde State

Troeteldierversorging Ek werk by ’n dierebewaarplek en hou dikwels lesings om die publiek in te lig oor die verantwoordelikhede van troeteldierversorging. Ek was verheug om julle artikel “Kan jy werklik vir ’n troeteldier sorg?” (8 Junie 1989) die dag voor ’n groot skoolaanbieding te ontvang. My kollegas was baie beïndruk met die artikel en wil dit graag later vanjaar in ons nuusbrief gebruik. Mense kies te dikwels ’n troeteldier omdat hulle meegevoer word deur die emosie van die oomblik. Maar dit was treffend hoe julle die “Ag-hoe-oulik-tog” uit die besit van ’n troeteldier gehaal het en gewys het op die werklikhede en verantwoordelikhede waaraan ’n mens moet dink voor jy ’n troeteldier kies.

C. S., Verenigde State