Van ons lesers

Uitskellery Ek wens alle jongmense soos ek kan besef hoe voordelig dit is om die wenke toe te pas wat in julle artikel oor uitskellery gegee is (8 Junie 1989). Deur die Bybelbeginsels toe te pas wat daarin uiteengesit is, het ek nou ’n goeie verhouding met my ongelowige ouers.

S. C., Italië

Kopluise Ek het “Kopluise” as die onderwerp vir ’n skooltaak gekies en dit op julle artikel gegrond (22 Augustus 1989). ’n Paar dae later is kopluise op een van die leerlinge in ons skool ontdek. Die meeste van my klasmaats was vas oortuig dat kopluise net op vuil mense voorkom. (Ek het ook so gedink totdat ek hierdie artikel gelees het). My onderwyser het dus my taak voorgelees en hulle wanbegrippe uit die weg geruim.

Y. N., Japan

Astrologie Ek het nog nooit baie in astrologie belanggestel nie en wou gevolglik nie die Ontwaak!-nommer oor daardie onderwerp lees nie (22 November 1989). Maar toe ek dit begin lees het, kon ek sien watter stewige houvas hierdie sataniese denkwyse op ’n groot deel van die mensdom het. Ek was in my noppies met die duidelike redenasies en het die insig wat dit my gegee het opreg waardeer.

J. A., Nieu-Seeland

Olie Die artikel “Olie tot u diens—Miskien!” (22 November 1989) was baie interessant en insiggewend. Ek het veral gehou van hoe julle dit vanuit ’n druppeltjie olie se oogpunt geskryf het. Dit was maklik om te verstaan en saaklik!

J. W., Verenigde State

Geskil oor bloed Ek het die artikel “Dokters het probeer om ons dogter weg te vat” gelees en kon net huil van blydskap oor die uitkoms vir die Deskinse en hul dogter [wat ’n gedwonge bloedoortapping vrygespring het] (22 Oktober 1989). My dogter, Dana, het ernstige brandwonde opgedoen en moes in ’n hospitaal opgeneem word. Die bloedkwessie het opgeduik. Ondanks my kragtigste pogings om dit te verhoed, is bloed aan Dana opgedwing. Ek kan my dus werklik vereenselwig met hoe die Deskinse gedurende hulle beproewing moes gevoel het. Hulle moet geprys word vir hul geloof in Jehovah God.

D. C., Verenigde State

Ontdek “Ontwaak!” Terwyl ek my beurt by ’n haarkapper afgewag het, het ek ’n tydskrif gesoek om my die tyd te help verdryf. Toe ek my kom kry, het ek al etlike minute lank ’n tydskrif genaamd Ontwaak! gelees. Ek was werklik verras om te vind dat ek geboei was deur die subtiele prag van die boodskap in die verskeidenheid artikels daarin.

H. P. C., Brasilië

Spesiale behoeftes Baie dankie vir die artikel oor gestremdes (22 Augustus 1989). Ons het ’n dogter wat in ’n rystoel is, en dit neem baie tyd in beslag om gereed te maak vir Christenvergaderinge en om in en uit ons motor te klim gedurende ons huis-tot-huisbediening. Ons kom betyds vir vergaderinge en geniet die geestelike voedsel baie, maar niemand weet werklik hoeveel inspanning dit verg net om daar te wees nie. Jehovah gee ons die krag; as hy dit nie gedoen het nie, sou ons nie die mas kon opkom nie.

S. A., Verenigde State