Van ons lesers
Spierdistrofie Dankie dat julle die bemoedigende ondervinding “Ek ly aan spierdistrofie” (8 Januarie 1990) gepubliseer het. Ek is ’n kwadrupleeg en is in my daaglikse lewe afhanklik van ander. Maar met die ondersteuning van my vrou en ander in die gemeente kan ek as ’n hulppionier dien. Ek gebruik ’n telefoongids wat mense volgens hulle woonadres aangee (beskikbaar by ’n openbare biblioteek), en so kan ek telefonies vir mense getuig wat in woonstelblokke met hoë sekuriteit woon.
B. W., Verenigde State
Modelwerk Die artikel “Jongmense vra . . . Wat van modelwerk en skoonheidswedstryde?” (8 Januarie 1990) het my geboei. Dit was net met Jehovah se krag dat ek so ’n loopbaan kon prysgee. Ek was tot ’n paar maande voor my doop ’n fotografiese model. Maar hoewel ek slegte omgang tot ’n minimum beperk het, was die druk baie groot. ’n Model word bespot, geïgnoreer en moet selfs halfnaak rondloop as gevolg van ’n gebrek aan verkleegeriewe. Dan is daar nog die eensaamheid wanneer jy weke lank in ’n hotel bly. Die modewêreld lyk fantasties, maar dit is vol hebsug, mededinging, onsedelikheid, materialisme en verdowingsmiddels.
J. Y. A. M., Bondsrepubliek Duitsland
Vermy die okkulte Julle artikel “Jongmense vra . . . Waarom moet ek die okkulte vermy?” (8 Maart 1990) het my meer bewus gemaak van die mag wat Satan oor mense het, en die subtiele taktiek wat hy gebruik om hulle nuuskierigheid te wek. Ek het altyd gemeen dat daar miskien nog iets goeds in die demone steek, aangesien hulle eens engele was. Ek het egter duidelik uit die artikel gesien dat hulle hul naderende vernietiging net verdien. Dankie weer eens.
R. S., Verenigde State
Prostaatprobleme Julle artikel oor prostaatprobleme (8 April 1990) het my belangstelling geprikkel, aangesien my vader prostaatchirurgie moes ondergaan. Hoewel die artikel baie leersaam is, het die slotkommentaar my gepla. Julle sê dat talle mans geslagsprikkeling deur pornografiese lektuur soek. Dit insinueer dat alle mans met prostaatprobleme na rolprente of lektuur van ’n pornografiese aard kyk.
N. R., Bondsrepubliek Duitsland
Dit was nie ons bedoeling om te impliseer dat prostaatprobleme noodwendig die gevolg van onchristelike gedrag is nie. Prostaatprobleme kom algemeen voor onder ouer mans—waaronder getroue Christene—weens ’n aantal redes. Maar aangesien onvervulde geslagsprikkeling klaarblyklik by die oorsaak betrokke is, of die probleem in party mans ten minste vererger, het ons dit as gepas beskou om ons lesers teen die strik van pornografie te waarsku.—RED.
Deur ’n kind se oë Julle artikel (22 Januarie 1990) is met soveel begrip geskryf dat ek beweeg is om soveel eksemplare moontlik by skole en hospitale te versprei en by al die ma’s wat ek ken. My seuns se skoolhoof het die artikel baie waardeer, en een van my seuns se onderwysers het die manier geprys waarop die onderwerp hanteer is. Ek het ook vier kinders en weet hoe moeilik dit is om ’n ouer te wees. Artikels soos dié is ’n hulpmiddel om ons kinders te help.
M. P. R., Italië
Die oor Aangesien ek van artikels oor die menseliggaam hou, was ek baie in my skik met julle artikel oor die oor (22 Januarie 1990). Ek bestudeer julle tydskrifte al lank omdat hulle alles bevat wat ’n mens wil weet—die leek sowel as diegene met ’n doktorsgraad.
H. V., Brasilië