Van ons lesers

Dinosourusse Ek het die nommer van 8 Februarie 1990 oor dinosourusse fassinerend gevind. Hierdie artikels wat duidelik uiteengesit is, goeie redenasies bevat en deur kundiges sowel as oningeligtes verstaan word, is boonop boeiend. Ek het gedink dat ek redelik goed op hoogte van dinosourusse is, maar nou besef ek dat ek net ’n algemene kennis daarvan het.

U. A., Bondsrepubliek Duitsland

Ek het nog altyd agter in my kop gewonder wat van die dinosourusse geword het. Hoewel ek ’n senior op hoërskool is, het ek nog nooit so ’n realistiese en aanneemlike antwoord gehoor nie.

S. S., Verenigde State

My seuntjie, wat slegs vier jaar oud is, het baie van die prentjies gehou, aangesien hierdie enorme dinosourusse hom baie interesseer. Ek geniet reeds julle wonderlike artikels sedert November toe ek die Bybel begin bestudeer het. Dit is ’n skande dat ek soveel in die verlede laat verbygaan het!

M. G., Mexiko

Doop Ek is dankbaar vir die artikel “Jongmense vra . . . Moet ek my laat doop?” (22 Maart 1990). Susana se ondervinding aan die begin van die artikel het my diep getref. Ek het my in my sesde jaar op laerskool aan God toegewy, en dit het my werklik gehelp om ’n sterk geloof te behou. Sal dit nie wonderlik wees nie as alle jong Christene dieselfde toegewydheid as die Ethiopiese hofdienaar toon en vra: “Wat verhinder my om gedoop te word?”—Handelinge 8:36.

M. A., Japan

Kweekhuiseffek Ek is ’n 15-jarige hoërskoolleerling en wil graag my waardering betuig vir die artikel van 22 Januarie 1989 oor die osoonlaag en die artikels van 8 September 1989 oor die kweekhuiseffek. Met behulp van die informasie in hierdie artikels kon ek ’n opstel oor bewaring skryf, waarvoor ek goeie punte behaal het.

J. B., Australië

Modelwerk as loopbaan Baie dankie vir julle artikel oor modelwerk as loopbaan (8 Januarie 1990). My dogter was ’n kindermodel voordat ons die Bybel begin bestudeer het. Ons het die artikel saam bespreek. Dit is so waar; die uitwerking wat modelwerk op my dogter op daardie ouderdom gehad het, was om haar te laat voel dat sy die belangrikste is, beter as enigiemand anders. Ons albei bedank julle vir die artikel. My dogter is nie meer ’n model nie, en Jehovah God is die belangrikste in haar lewe—en nie meer sy self nie.

N. J., Kanada

Jeepneys Ek lees Ontwaak! reeds tien jaar lank. Daar is geen lektuur wat daarmee vergelyk wat die keuse van onderwerpe, die foto’s en akkurate aanbieding betref nie. Ek wou dit lankal gesê het, maar nadat ek die artikel in die nommer van 22 November 1989 “Jeepney—die Filippyne se massavervoermiddel” gelees het, kon ek my nie langer bedwing nie. Dit is baie interessant om te leer hoe mense in ander dele van die wêreld lewe. Die realistiese wyse waarop Ontwaak! die onderwerp aanbied, lig ons nie net in nie, maar neem ons as ’t ware na daardie plekke toe!

E. P. S., Brasilië

Breinchirurgie Ek kon nie help om te huil toe ek die ondervinding van Bethel in die nommer van 22 April 1990 gelees het nie. Ek dank Jehovah dat sy haar breinchirurgie oorleef het. ’n Jong meisie met sulke hoë geestelike doelwitte en vaste geloof met die dood voor oë verdien ons bewondering. Ek is net so oud soos Bethel en het dieselfde doelwitte. Hoewel ek hoop dat ek my nooit in ’n soortgelyke situasie sal bevind nie, hoop ek dat my geloof die toets met net sulke gelukkige gevolge sal deurstaan.

T. V., Italië