Die kosbaarste vloeistof in die wêreld
Selfs al word bloedoortappings verwerp omdat dit die gevaarlike en onnodige produkte is van ’n bedryf wat dikwels hebsugtig is, sou dit steeds nie verduidelik waarom Jehovah se Getuies dit weier nie. Hulle redes is heeltemal anders en baie belangriker. Wat is hierdie redes?
’N DRUPPEL bloed kan so maklik as vanselfsprekend aanvaar word. Dit wel op uit ’n krapmerk of speldeprik, ’n klein glinsterende rooi druppeltjie, en ons was of vee dit af sonder om te dink.
Maar as ons onsself kon krimp totdat ons so klein is dat hierdie druppel soos ’n berg bokant ons opdoem, sou ons in sy karmynrooi dieptes ’n wêreld van ongelooflike kompleksiteit en orde vind. Binne-in daardie enkele druppel woel daar groot leërs selle: 250 000 000 rooi bloedselle, 400 000 wit bloedselle en 15 000 000 bloedplaatjies is maar net party van die geledere. Wanneer hulle in die bloedstroom tot aksie oorgaan, pak elke leër sy aparte taak aan.
Die rooi selle beweeg vinnig deur die ingewikkelde netwerk van die bloedvatstelsel, terwyl hulle suurstof van die longe na elke sel in die liggaam voer en die koolsuurgas verwyder. Hierdie selle is so klein dat ’n stapel van 500 net 0,1 sentimeter hoog sou wees. Tog sou ’n stapel van al die rooi selle in jou liggaam 50 000 kilometer hoog wees! Nadat die rooi sel omtrent 120 dae lank 1440 keer per dag deur die liggaam gereis het, is sy werk afgehandel. Sy ysterryke kern word doeltreffend herbenut en die res word vernietig. Daar word elke sekonde driemiljoen rooi selle verwyder, terwyl dieselfde hoeveelheid nuwe selle in die murg vervaardig word. Hoe weet die liggaam dat ’n rooi sel die regte ouderdom vir disintegrasie bereik het? Wetenskaplikes is dronkgeslaan. Maar sonder hierdie stelsel waardeur ou rooi selle vervang word, “sal ons bloed binne ’n paar weke so dik soos beton wees”, sê een chemikus.
Intussen patrolleer die wit selle die stelsel terwyl hulle na ongewenste indringers soek en hulle vernietig. Die bloedplaatjies vergader onmiddellik waar daar ’n sny is en begin die stollingsproses wat die opening seël. Al hierdie selle kom voor in ’n helder, ivoorkleurige vloeistof genaamd plasma, wat uit honderde bestanddele bestaan, en baie van hulle speel ’n lewensbelangrike rol in die uitvoering van die bloed se lang lys take.
Wetenskaplikes met al hulle gesamentlike breinkrag kan nie alles verstaan wat bloed doen nie, wat nog te sê dit dupliseer. Kan hierdie wonderdadig komplekse vloeistof enigiets anders as die werk van ’n Meesterontwerper wees? En spreek dit nie vanself dat hierdie bomenslike Skepper alle reg het om te bepaal hoe sy skeppingswerke gebruik moet word nie?
Jehovah se Getuies het nog altyd so gedink. Hulle beskou die Bybel as ’n brief van ons Skepper wat sy riglyne bevat oor hoe om die beste lewe moontlik te lei; dit is ’n boek wat nie oor hierdie onderwerp van bloed swyg nie. Levitikus 17:14 sê: “Die siel van alle vlees is in sy bloed”—natuurlik nie letterlik nie, aangesien die Bybel ook sê dat die lewende organisme self ’n siel is. Dit is eerder omdat die lewe van alle siele so onlosmaaklik aan die bloed in hulle gekoppel is en daardeur aan die lewe gehou word, dat bloed gepas beskou word as ’n heilige vloeistof wat lewe verteenwoordig.
Dit is vir party moeilik om te verstaan. Ons lewe in ’n wêreld waar baie min dinge as heilig beskou word. Die lewe self word selde waardeer soos wat dit waardeer moet word. Dit is dus geen wonder nie dat bloed soos enige ander produk gekoop en verkoop word. Maar diegene wat die Skepper se wense respekteer, behandel dit nie so nie. ‘Julle mag nie bloed eet nie’, was God se opdrag aan Noag en sy nakomelinge—die hele mensdom (Genesis 9:4). Agt eeue later het Hy daardie gebod in sy Wet aan die Israeliete ingesluit. Vyftien eeue later het hy dit weer eens aan die Christengemeente bevestig: ‘Onthou julle van bloed.’—Handelinge 15:20.
Jehovah se Getuies kom daardie wet hoofsaaklik na omdat hulle hul Skepper wil gehoorsaam. Die Skepper het die mensdom alreeds van lewensreddende bloed voorsien deur middel van sy geliefde Seun se offerdood. Dit kan lewe verleng, nie net vir ’n paar maande of jare nie, maar vir ewig.—Johannes 3:16; Efesiërs 1:7.
Daarbenewens het die Getuies hulle teen tallose gevare gevrywaar deur hulle van bloedoortappings te onthou. Al hoe meer mense wat nie Jehovah se Getuies is nie, weier vandag bloedoortappings. Die mediese gemeenskap reageer langsamerhand hierop en hulle gebruik bloed al hoe minder. Soos die Surgery Annual dit gestel het: “Dit is duidelik dat die veiligste oortapping dié een is wat nie gegee word nie.” Die tydskrif Pathologist het opgemerk dat Jehovah se Getuies al lank volhou dat bloedoortappings nie raadsame behandeling is nie. Dit het bygevoeg: “Daar is aansienlike bewys om hulle argument te staaf, ondanks bloedbankhandelaars se besware in stryd hiermee.”
Wie sal jy eerder vertrou? Die wyse Wese wat bloed ontwerp het? Of die mense wat bloedverkope ’n reusebedryf gemaak het?
[Prente op bladsy 15]
Die menslike bloedvatstelsel met haarvate (inlas) wat so fyn is dat bloedselle gedwing word om een-een deur hulle te beweeg