Jou wonderlike rooibloedselle
DEUR ONTWAAK!-MEDEWERKER IN SUID-AFRIKA
Die talrykste sel in jou bloedstroom gee aan bloed sy rooi kleur en word dus ’n rooibloedsel genoem. Net een druppel van jou bloed bevat honderdmiljoene van hierdie selle. Wanneer ’n mens deur ’n mikroskoop daarna kyk, lyk elkeen soos ’n ronde skyfie waarvan die middel effens ingeduik is. Elke sel bevat honderdmiljoene hemoglobienmolekules. Elke hemoglobienmolekule is weer ’n pragtige sferiese struktuur wat uit sowat 10 000 waterstof-, koolstof-, stikstof-, suurstof- en swaelatome bestaan, tesame met vier swaarder ysteratome, wat aan bloed sy suurstofdraende vermoë gee. Hemoglobien help met die vervoer van koolstofdioksied uit die weefsels na die longe, waarvandaan dit uitgeasem word.
Nog ’n lewensbelangrike deel van jou rooibloedselle is hulle buitenste lagie, wat ’n membraan genoem word. Hierdie wonderlike omhulsel stel die selle in staat om dun uit te rek sodat hulle deur jou kleinste bloedvate kan beweeg en sodoende elke deel van jou liggaam kan voed.
Jou rooibloedselle word in jou beenmurg vervaardig. Nadat ’n nuwe sel jou bloedstroom binnegegaan het, kan dit meer as 100 000 keer deur jou hart en liggaam sirkuleer. In teenstelling met ander selle het rooibloedselle nie ’n kern nie. Dit laat meer plek om suurstof te dra en maak dit ligter, wat jou hart help om biljoene rooibloedselle deur jou liggaam te pomp. Maar sonder ’n kern kan rooibloedselle nie hulle interne dele hernieu nie. Daarom begin jou rooibloedselle ná omtrent 120 dae agteruitgaan en word hulle minder elasties. Groot witbloedselle wat fagosiete genoem word, verteer hierdie afgeleefde selle en werp die ysteratome uit. Die skaars ysteratome heg hulle aan vervoermolekules wat hulle na jou beenmurg terugneem, sodat dit gebruik kan word om nuwe rooibloedselle te vervaardig. Jou beenmurg stel elke sekonde twee- tot driemiljoen nuwe rooibloedselle in jou bloedstroom vry!
As jou biljoene rooibloedselle skielik sou ophou funksioneer, sou jy binne minute sterf. Hoe dankbaar moet ons tog teenoor Jehovah God wees vir hierdie wonderbaarlike deel van sy skepping, wat ons in staat stel om te lewe en die lewe te geniet! Jy stem ongetwyfeld saam met die psalmis wat gesê het: “O Jehovah, u het my deurvors, en u ken my. Ek sal u prys, omdat ek op ’n vreesinboesemende wyse wonderbaar gemaak is. U werke is wonderbaar, soos my siel alte goed weet.”—Psalm 139:1, 14.
[Diagram op bladsy 24]
(Sien publikasie vir oorspronklike teksuitleg)
Rooibloedsel
Membraan
Hemoglobien (vergroot)
Suurstof