Waar het hulle sulke pragtige vere gekry?
GEWONE TROUPANTE kom algemeen in Midde- en Suider-Afrika voor. Hulle sit dikwels in bome of op telefoondrade langs die pad. Dit gee hulle ’n goeie uitkykpos van waar hulle hul omgewing vir insekte en ander kos kan fynkam.
As jy deur Botswana of Zimbabwe reis, sal jy moontlik ’n flits helderblou vere sien wanneer een van hierdie voëls oor die pad vlieg. Soos die Engelse naam “roller” aandui, spog hulle soms met hulle kleurryke vere wanneer hulle ’n tuimelvertoning in die lug gee. Die bygaande foto van die voël en die inlasfoto van sy vlerk toon hoe helderkleurig die troupant is. Die vlerkvere is ’n mengsel van vier skakerings van blou saam met swart en bruin. Wat ’n mooi kontras vorm dit tog met die ligpers bors, oranje wange, wit voorkop en liggroen kroon! Dit laat ’n belangrike vraag ontstaan: Waar het hulle sulke pragtige vere gekry?
As jy die troupant se pote beskou, sal jy sien dat hulle met skubbe bedek is, nie met vere nie. Het hulle vere per toeval uit die skubbe van ’n reptiel ontwikkel, soos evolusioniste leer?
Wel, ’n mens moet in gedagte hou dat ’n veer ’n ingenieurswonder is. Uit die skag van ’n veer steek daar rye baarde. “As twee aangrensende baarde van mekaar geskei raak—en heelwat krag is nodig om die vlag uitmekaar te trek—sluit hulle weer onmiddellik soos ’n ritssluiter wanneer die veer deur die vingerpunte getrek word”, verduidelik die wetenskapleerboek Integrated Principles of Zoology. “Die voël doen dit natuurlik met sy snawel.”
Kon die honderde doeltreffende “ritssluiters” waaruit ’n enkele veer bestaan per toeval ontstaan het? Het wetenskaplikes enige bewys dat ’n skub in ’n veer ontwikkel het? “Vreemd genoeg”, erken die boek wat hierbo aangehaal word, “hoewel hedendaagse voëls skubbe (veral op hulle pote) sowel as vere het, is daar geen tussenstadium op fossiele of op lewende vorme ontdek nie.”
Vere getuig gewis van ’n Meesteringenieur wat ook ’n deskundige is op die gebied van die gebruik van pragtige kleure. Skepsele soos die gewone troupant is onder andere onder die “gevleuelde voëls” wat “die naam van Jehovah”, die ware God, loof.—Psalm 148:7, 10-13, NW.
[Foto-erkenning op bladsy 16]
National Parks Board of South Africa