Van ons lesers

Skoonfamilie Ek het die nommer van 22 Februarie 1990 oor skoonfamilie baie waardeer. Twee weke gelede het ek my skoonfamilie vir ’n hele week gaan besoek. Gedurende my besoek het ek die artikel in gedagte gehou en dit toegepas op elke situasie waarvoor ek te staan gekom het. Ek het die kuiertjie geniet, en toe ek vertrek het, het ons mekaar omhels en gesoen. Ek sien uit na nog kuiertjies saam met hulle, maar ek sal hierdie tydskrif byderhand hou ingeval ek die aanmoediging nodig het.

A. G., Verenigde State

Grimering Julle rubriek “Jongmense vra . . . ” is opbouend. Maar in julle artikel oor grimering (22 Junie 1990) het julle die Bybelteks in Esegiël 23:40 gebruik, waar dit duidelik praat van ’n prostituut wat oogskadu gebruik het. Praat julle nie die gebruik van skoonheidsmiddels verkeerdelik goed nie?

T. H. H., Nederland

Hierdie teks staaf net die bewering van argeoloë dat grimering deur Israelitiese vroue gebruik is. Die vers praat weliswaar van ’n prostituut wat ‘haar gewas, haar oë geverf en sierade aangesit het’. Maar dit bewys bykbaar dat party Israelitiese vroue skoonheidsmiddels gebruik het.—RED.12

Dierenavorsing Ons verwelkom die feit dat Jehovah se Getuies die onderwerp oor dierenavorsing bespreek het (Ontwaak!, 8 Julie 1990). Ons meen egter dat ons die volgende bewering moet regstel: “Die neiging aardwyd is om die aggressiewer diereregtebewegings te ondersteun.” Strydlustige mense is in die minderheid en verkry slegs bekendheid omdat die pers daaroor verslag doen.

I. L., Federale Vereniging vir Diereregte, Bondsrepubliek Duitsland

Ons het gesê dat “party” aktiviste vir diereregte—nie almal nie—“bereid is om geweld te gebruik”. Die bewering wat ter sprake is, is deur ’n prominente Kanadese diere-aktivis gemaak. Ons het dit net aangehaal.—RED.

Crack-verslawing Ek was vyf jaar lank ’n crack-verslaafde. Ek het verskeie kere probeer om op te hou om hierdie verskriklike dwelm te gebruik. Ek het tussen R390 en R520 per dag aan die gewoonte spandeer! Maar danksy Jehovah God is ek nie meer ’n crack-verslaafde nie! ’n Ywerige studie van Sy Woord, voortdurende gebed en omgang met ware Christene het my gehelp om met die crack-gewoonte te breek. Die sleutel om crack op te gee: Jy moet ophou om met mense om te gaan wat hierdie dwelm gebruik!—Sien Ontwaak!, 22 Julie 1990.

[Voorletters word op versoek weerhou], Verenigde State

Makliker geboorte Met verwysing na julle item oor geboorte in “Ons beskou die wêreld” (8 Desember 1989), wil ek net sê dat die gewoonte om in ’n gehurkte posisie geboorte te gee reeds sedert onheuglike tye in landelike en noordelike bergstreke van Pakistan gebruik word. Hulle het ongetwyfeld nie moderne geboortestoele nie, maar hulle gebruik ’n stoel wat van steen en klip gemaak is.

F. U. B., Pakistan

RAT-aftastings Dankie vir die artikel “’n Rekenaar wat dwarsdeur jou kyk” (22 Julie 1990). Ek moes ’n paar jaar gelede vir ’n RAT-aftasting gaan, maar die wyse waarop dit aan my verduidelik is, het my banggemaak en ek het geweier om daarvoor te gaan. Die artikel het my gehelp om die voor- en nadele teen mekaar op te weeg, en nou het ek ’n afspraak met my dokter gemaak.

A. S., Verenigde State

Jaguars Ek het julle artikel “Die skuwe oerwoudkat” (22 Augustus 1990) baie geniet. Ek het nooit besef hoe ongelooflik jaguars is nie. Hulle is pragtige diere wat God beslis tot eer strek.

L. F., Verenigde State