Ons beskou die wêreld
Moon beweer hy is die Messias
“Moon se Unification Church leer sy lidmate al lank dat sy stigter-profeet, ’n Koreaan van geboorte, ’n noodsaaklike tweede Messias is omdat Jesus nie daarin kon slaag om sy sending op Aarde te voltooi nie”, sê die Los Angeles Times. Maar nou, in sy eerste openbare verklaring van daardie leerstelling het “Sun Myung Moon ’n godsdienskongres meegedeel dat hy die Messias is”. In sy verklaring dat die wêreld die Messias nodig het om hom van Satan se invloed te bevry, het Moon gesê: “Juis om hierdie doel te vervul, is ek deur God geroep.” Die verklaring wat gemaak is voor die Assembly of World Religions wat deur Moon se kerk geborg is, het ’n aantal kongresgangers ontstel.
Rook se dodelike tol
Sowat 10 000 afgevaardigdes het in Augustus 1990 die Internasionale Kankerkongres in Hamburg, Wes-Duitsland, bygewoon. Volgens ’n berig in die Duitse koerant Frankfurter Allgemeine Zeitung het die kongresvoorsitter gesê: “Binne enkele dekades sal die getal rook-verwante sterftes wêreldwyd hoër wees as die totale getal mense wat in alle oorloë wat ooit geveg is, gesterf het.” Hoewel afgevaardigdes ten gunste was van stappe om die gebruik van tabak te besnoei, is ’n aantal kankerspesialiste opgemerk wat uitgeglip het om te gaan rook.
Voortdurende stryd
’n Australiese boer in die staat Victoria het in 1859 konyne aan die vasteland bekendgestel toe hy 12 vir jagdoeleindes op sy eiendom losgelaat het. Teen die vyftigerjare het die konynbevolking al 600 miljoen bereik! “Hulle kou die sade van inheemse plante en vreet meer as skape en inheemse diere in die wedywering om gras, bossies en onkruid . . . en kan grootskaalse gronderosie veroorsaak”, sê die Sydneyse koerant The Sun-Herald. Daarom is die miksomatose-virus—wat dodelik is vir konyne—ingebring deur dit veral deur middel van muskiete en die Franse vlooi te laat versprei. Hoewel dit aanvanklik uiters suksesvol was, het weerstand teen die virus ontwikkel, en het die konynbevolking weer vinnig aangewas tot meer as 200 miljoen. Nou beplan Australië om die Spaanse vlooi te gebruik om die virus na gebiede te versprei wat te droog vir muskiete of vir die Franse vlooi is en om sterker variante van die dodelike miksomatose te ontwikkel wat deur hulle gedra sal word. Die koerant sê dat die konyne “tot 10 keer per jaar kleintjies kry, en dat die gemiddelde konynwyfie 25-30 kleintjies kry”.
Hulp vir werkende moeders
’n Reklame-agentskap naby Regensburg, Duitsland, het tot ’n menslike oplossing gekom vir die probleem van werkende moeders wat niemand het om gedurende die dag na hulle kinders om te sien nie. “Werk deeltyds en bring die kinders saam met jou”, het die bestuurder van die maatskappy, volgens die koerant Nürnberger Nachrichten, vir sulke werknemers gesê. Die bestuurder verduidelik: “Hier werk ons hoofsaaklik met vroue. En in die reklamewese is goeie personeel maar dun gesaai. Dit spreek dus vanself dat ek graag my personeel wil behou.” ’n Kantoor met vyf of ses kinders wat rondjakker, is natuurlik nie altyd bevorderlik vir werk nie, maar die werkende moeders is beter gemotiveer en gretiger om aan die eise van ’n maatskappy te voldoen wat tot sulke uiterstes gegaan het om hulle behoeftes in aanmerking te neem, en hulle aandag word nie méér afgelei as wanneer hulle tuis sou werk nie. ’n Werkende moeder wat haar drie kinders alleen moet grootmaak, sê: “Ek sou op geen ander manier in staat wees om te werk nie.”
Waternood
“Baie lande staan tans gereed om oorlog te voer oor olie, maar water kan in die nabye toekoms die katalisator vir gewapende konflik wees”, skryf die tydskrif Time. “Menslike bevolkings is besig om die beperkte voorraad vars water te oorskry. Die mensdom is besig om die kosbare vloeistof wat alle lewe onderhou, te vergiftig en uit te put.” Hoewel dit ongelooflik mag klink dat daar ’n gebrek aan water kan wees op ’n planeet waarvan 70 persent van die oppervlakte met water bedek is, moet in gedagte gehou word dat 98 persent van daardie water sout is en nie vir drink- of landboudoeleindes geskik is nie. Die gebrek aan vars, skoon water bedreig nie alleen gesondheid, ekonomiese groei en alle natuurlewe nie, maar maak hongersnode elke jaar ’n groter werklikheid. Pogings om ander bronne te benut boemerang dikwels. “Die wêreld leer nou dat die mensdom se vermoë om water van een plek na ’n ander te herlei sonder om die natuurlike balans ernstig te versteur, beperk is”, sê die Time. Voorrade kan egter aansienlik verhoog word bloot deur verliese te verminder. Daar word geraam dat 65 tot 70 persent van alle water wat wêreldwyd verbruik word, verlore gaan weens lekkasies, verdamping en ander ondoeltreffendhede.
Nuwe reël vir lugrederye
Federale reëls in die Verenigde State vereis nou dat alle persone wat in die ry langs ’n vliegtuiguitgang sit fisies gesond moet wees, Engels moet kan lees en praat en in ’n noodgeval met die ontruiming van die vliegtuig moet kan help. Sulke sitplekke sal verbode wees vir tingerige persone, gestremdes (dowes en blindes inkluis) en persone onder 16 jaar, asook vir swanger vroue of persone met klein kindertjies. Passasiers vir sitplekrye by uitgange sal by die hek gekies word en oor hulle verantwoordelikhede ingelig word, maar hulle sal die keuse hê om die aanwysing te weier en na ’n ander sitplek te skuif. Persone in sitplekrye by uitgange sal ook spesiale instruksies ontvang. Baie lugrederye beplan om daardie sitplekke met hulle eie werknemers, wat gratis reis of op sakereise is, te vul, aangesien hulle gewoonlik opleiding in veiligheidsprosedures ondergaan het. Die nuwe reël is voorgestel na afloop van ondersoeke na ongelukke wat getoon het dat die onvermoë om die vliegtuig betyds te ontruim die rede vir sommige sterfgevalle was.
Kinders en Vigs
In sy eerste verslag oor die uitwerking van Vigs op kinders het die Wêreldgesondheidsorganisasie gesê dat die virus meer kinders tref as wat voorheen gemeen is, en dat sowat tienmiljoen kinders waarskynlik teen die jaar 2000 daarmee besmet sal wees. “Teen die jaar 2000 sal die oorgrote meerderheid reeds Vigs opgedoen en daaraan gesterf het”, sê dr. Michael Merson, hoof van die organisasie se wêreldwye Vigs-program. Die bevindings het ook gelei tot ’n hersiening van die vooruitskatting van totale HIV-besmettings teen daardie jaar, en het na sowat 25 tot 30 miljoen gevalle gestyg. Kinders wat vir besmette vrouens gebore word, is in twee opsigte aan die verloorkant. Waarskynlik sal 30 persent van hulle self die virus hê, terwyl die oorblywende 70 persent die vooruitsig het om wese te word wanneer hulle ouers aan Vigs sterf.
Onderwater-houtkappers
Die onderwatersetting van duisende vierkante kilometers reënwoude in Brasilië het aanleiding gegee tot ’n ongewone nuwe bedryf: onderwater-houtsaery. Miljoene grys en blaarlose boomstamme wat oprys uit ’n meer wat gevorm het toe ’n reusagtige hidroëlektriese dam gedurende die tagtigerjare gebou is, het entrepreneur Juárez Cristiano Gomes in die oog geval. Hy het ’n onderwater-kettingsaag ontwerp en ’n maatskappy gestig om die hout te oes. Duikers met lugtoevoerpype sak af tot dieptes van tot 50 meter om die bome af te saag. Onderwater-houtkappers verkeer nie in gevaar van vallende bome nie, aangesien die meeste bome na die oppervlak toe “val”, gereed om na saagmeulens aan die waterkant gedryf te word. Maar daar is ander gevare waarvoor hulle op hul hoede moet wees. Verlede jaar is ’n duiker deur ’n piranha gebyt.
Oorvloed van plastiek
“Sestig jaar gelede het niemand iets in hulle huis gehad wat van plastiek gemaak is nie”, sê Asiaweek. “Vandag is daar in elke vertrek verskillende soorte plastiekartikels.” Wêreldwyd is dit ’n bedryf met ’n omset van R520000-000000. Die grootste hoeveelheid, sowat 30 persent, word vir verpakkingsdoeleindes, insluitende bottels en sakke, gebruik. Daarna volg die gebruik van plastiek in boumateriale wat sowat 20 persent verteenwoordig. Hoewel dit uiters bruikbaar en goedkoop is, het plastiek sy nadele wat wegdoening betref. Wanneer dit verbrand word, stel dit giftige besoedelstowwe vry; wanneer dit gestort word, bly dit “’n onvernietigbare plaag op die landskap”. Hoewel hergebruik die probleem kan oplos, is daar gevind dat die versameling en sortering van plastiek baie duur is.
Veiligheidsbewustheid beloon
Volgens syfers wat deur die Nasionale Veiligheidsraad vrygestel is, het die ongeluksterftesyfer in die Verenigde State gedurende die afgelope dekade met 21 persent gedaal, wat dit die uitsonderlikste dekade van die afgelope eeu in terme van ongeluksvoorkoming maak. Daar was byvoorbeeld ’n vermindering van 20 persent in die sterftesyfer vir motorongelukke. Werkverwante ongelukke het met 29 persent gedaal. Openbare ongelukke, soos vliegtuie wat neergestort het en verdrinkings, het met 22 persent gedaal. En ongelukke tuis, insluitende mense wat geval het, brande en vergiftigings, het met 16 persent verminder; dit sou beter vertoon het as sterfgevalle weens te hoë dosisse dwelms wat per ongeluk toegedien is nie ’n beduidende toename getoon het nie. Vordering met die vermindering van ongelukke, wat die vierde plek inneem (na hartsiektes, kanker en beroertes) as ’n hoofoorsaak van die dood, word toegeskryf aan verbeterde regulasies, veranderde gesindhede en veiligheidsveldtogte.