Ons beskou die wêreld

40 000 kinders elke dag

Volgens die Paryse dagblad die International Herald Tribune het die voorsitter van UNICEF (die Verenigde Nasies se kinderfonds) gesê: “Geen hongersnood, geen droogte, geen natuurramp het al ooit die dood van 40 000 kinders in net een dag tot gevolg gehad nie, tog veroorsaak voorkombare siektes en wanvoeding dat soveel kinders elke dag onnodig sterf.” Die koerant, wat verslag gedoen het van UNICEF se Wêreldspitsberaad vir Kinders, het bygevoeg dat die probleem gedeeltelik voortspruit uit die algemene beskouing dat sulke kindersiektes en -sterftes “normaal en onvermydelik” in ontwikkelende lande is. Die doel van die spitsberaad was om toestande te probeer verbeter vir die 1500 miljoen kinders wat na verwagting oor die volgende tien jaar gebore gaan word. Volgens die Tribune is dit “die grootste geslag kinders wat ooit aan die mensdom toevertrou is”.

‘Bestaan net op skrif’

Volgens die Diario Las Américas, ’n Spaanse koerant wat in Miami, Florida, VSA, gepubliseer word, het die Mexikaanse regering ’n antirookprogram ingestel wat rook in openbare plekke verbied. Die maatreël, wat bedoel is om nie-rokers te beskerm, bepaal dat rokery in openbare plekke tot bepaalde afgesonderde gebiede beperk sal word. Party meen egter dat “dit lyk asof hierdie plan daartoe gedoem is om net op skrif te bestaan, aangesien daar geen dwangmaatreëls, boetes of inspekteurs is om eerbied daarvoor af te dwing nie”, het Diario gesê. Die koerant het gesê dat die groot publiek skepties staan teenoor hierdie wet en dat hulle dit eenvoudig ignoreer.

“Hedendaagse wapenrusting”

’n Onlangse vlaag van gewelddade in die stad New York het die verkoop van koeëlvaste monderings en bykomstighede verhoog. Die Daily News berig dat “mense baie geld uitgee om hulleself, hulle kinders en selfs hulle honde te bedek met klere wat uitgevoer is met koeëlvaste materiaal soos Kevlar, ’n ligte vesel wat sterker as staal is”. Die lys van beskikbare items sluit reënjasse in wat verkoop word vir R2500, sambrele vir R2500 tot R5000, ski-baadjies wat wissel van R2000 tot R6250 en pelsjasse vir tussen R30 000 en R200 000. Die koerant het hierdie items “hedendaagse wapenrusting vir die strate van New York” genoem en het bygevoeg dat die koeëlvaste onderhemp “’n koeël [kan] keer wat tromp-op uit ’n handgeweer gevuur word”.

Onwelkome groei

Die aarde het tans ongeveer 5300 miljoen bewoners. Daar word geskat dat die getal teen die einde van die 20ste eeu op 6250 miljoen sal staan. Volgens Visión, ’n Latyns-Amerikaanse tydskrif, sal arm lande deur hierdie bevolkingsontploffing benadeel word. Negentig persent van hierdie nuwe toevoegings tot die menseras sal in arm lande gebore word. Visión het berig dat 17 van die 20 digs bevolkte stede in die wêreld in ontwikkelende lande geleë is. Byvoorbeeld, “volgens wetenskaplike ramings sal Latyns-Amerika teen die jaar 2025 ’n bevolking van 740 miljoen hê”. Bolivia, Costa Rica, Guatemala, Nicaragua, Paraguay en Venezuela het die hoogste bevolkingsaanwassyfer in Latyns-Amerika, terwyl Argentinië, Kuba en Uruguay die laagste het. Die tydskrif het bygevoeg dat “Latyns-Amerika tussen 1985 en 1990 ’n bevolkingsaanwassyfer van 20,77 persent gehad het”.

’n Valse messias

Duisende lidmate is sonder ’n leier gelaat toe hy en 12 ander lidmate van ’n godsdiensgroep bekend as die Nation of Yahweh gearresteer is. Volgens The New York Times “word [hulle] aangekla van 18 spesifieke gevalle van afpersing, waarby 14 moorde, twee pogings tot moord, afpersing en brandstigting betrokke is”. Die leier van die groep, waarvan die hoofkwartier in Miami, Florida, VSA is, staan bekend as Yahweh Ben Yahweh. Hy beweer dat hy uit die dode opgewek is as ’n messias om swart mense “uit die woestyn van wit oorheersing” te lei. Hy en ander lidmate van die kultus word daarvan beskuldig dat hulle gewese lidmate wat met die leier verskil het, vermoor het. “Volgens die aanklag is ’n gewese lidmaat in een geval onthoof”, berig die Times.

Straatkinders

“Die polisie en maatskaplike werkers skat dat 10 000 daklose kinders in die strate van Toronto ronddwaal”, sê The Toronto Star. ’n Studie het gevind dat 90 persent van die daklose meisies “sê dat hulle voor die ouderdom van 12 deur ’n gesinslid of -vriend verkrag is”. Daar word berig dat die meeste van hierdie kinders na die straat gedryf is deur “gesinsprobleme soos fisiese en seksuele misbruik en alkoholisme wat die straat, met al sy gruwels, verkieslik bo die huis gemaak het”. Die owerhede is bang dat hierdie gemeenskap van straatkinders die bron van Vigs-besmetting onder die algemene bevolking van adolessente sal word. Die Star het bygevoeg dat “die helfte van die meisies wat nie prostitute is nie meer as 10 seksmaats gehad het en 30 persent van die seuns meer as 50 gehad het. Onder die prostitute het 70 persent van die vroue en 50 persent van die mans gesê dat hulle meer as 100 maats gehad het.”

Tropiese doders

Al hoe meer toeriste en sakemanne besoek tropiese lande. Die Franse koerant Le Figaro berig dat baie reisigers terugkeer huis toe met malaria, amebiese disenterie, hepatitis of een van ’n groot verskeidenheid van ander tropiese siektes wat onbehoedsame reisigers maklik kan besmet. Wêreldwyd veroorsaak malaria alleen jaarliks die dood van meer as tweemiljoen mense. Die gevaar bestaan omdat die simptome wat die reisigers ervaar tuis dalk nie reg gediagnoseer word deur plaaslike dokters wat nie in tropiese geneeskunde opgelei is nie. Potensieel dodelike siektes word gevolglik verkeerd behandel.

Ongelyke verspreiding

Volgens Mariano Grondona wat ’n artikel geskryf het vir Visión, ’n Latyns-Amerikaanse tydskrif, het die Wêreldbank onlangs berig dat 1100 miljoen mense oor die hele wêreld in armoede leef. Oor die algemeen het hierdie mense ’n gemiddelde daaglikse inkomste van minder as R2,50 per persoon. Uit ’n bevolking van sowat 450 miljoen mense in Latyns-Amerika leef byna 90 miljoen in sulke armoede, en volgens Grondona maak dit Latyns-Amerika “’n onregverdige gemeenskap”. Die verslag het gesê dat Latyns-Amerika “’n buitengewoon hoë graad van ongelyke verspreiding van inkomste” het en dat geen ander streek in die ontwikkelende wêreld so ’n kontras tussen die rykes en die armes het nie.

Depressiewe babas

Volgens die Colombiaanse koerant El País het 29 persent van al die kinders in Cali wat na gesondheidsentrums gebring is die een of ander sielkundige afwyking wat professionele behandeling vereis. Volgens een gesaghebbende is die algemeenste oorsaak ’n wanfunksie in die gesinslewe, wat angsgevoelens, depressie, leeronvermoëns, probleme met slaap en ander afwykings in ’n kind veroorsaak. El País het bygevoeg dat die meeste psigiatriese probleme in kinders gedurende die eerste nege lewensjare na vore kom. Een studie het aan die lig gebring dat selfs babas aan depressie kan ly wanneer die verhouding tussen die ouer en die kind gebrekkig is.

Nuus vir koffiedrinkers

’n Onlangse twee jaar lange studie onder 45 589 mans het geen verband tussen koffie-inname en hartsiektes getoon nie, berig The New England Journal of Medicine. Hoewel ander onlangse studies ’n verband tussen koffiedrinkery en die gevaar van hartsiektes gevind het, het hierdie uitgebreide nuwe studie, sowel as verskeie vorige studies, geen verband gevind nie. Die president van die Amerikaanse Hartvereniging het gesê: “Op grond van hierdie studie meen ek dat ek met groter vertroue vir my pasiënte kan sê dat ek hulle nie sal aanraai om op te hou koffie drink as ’n openbare gesondheidsmaatreël nie.” Daarenteen het ’n ander onlangse studie bevind dat daar ’n effens groter gevaar van hartaanvalle is by mense wat meer as vier koppies koffie per dag drink.