Van ons lesers

Naskoolse werk Ek het die artikels oor naskoolse werk baie geniet (22 November en 8 Desember 1990). Hoewel ek nie gereed is vir ’n werk nie het julle artikels getoon hoe belangrik dit is om geld vir die toekoms te spaar. Dit het my ook gehelp om te sien dat ek, as ek gaan werk, ’n rooster nodig sal hê wat tyd vir geestelike bedrywighede toelaat. Ek sal in die toekoms hierdie artikels in gedagte hou.

J. S., Verenigde State

Ek het my dit ten doel gestel om ’n pionier [voltydse evangeliedienaar] te word. Ek het gewonder of ek eers werk moet kry en geld moet spaar. Die artikels het my gehelp om te sien dat dit my in die slagyster van materialisme kan laat trap. Ek het dus besluit om te werk—te werk om my geestelike grondslag te versterk—sodat ek bekwaam en gereed vir die pionierdiens sal wees.

G. J., Verenigde State

Reënwoude Julle artikel oor reënwoude (22 Maart 1990) was van hoë wetenskaplike gehalte. Almal weet dat die omgewing agteruitgaan en dat iets gedoen moet word. Maar as ’n nuuskorrespondent hier in Pole het ek gewonder wie die moed sal hê om oor die grondliggende redes vir omgewingsverwaarlosing te skryf. Julle is die eerste mense wat dit doen deur daarop te wys dat egosentrisme en die begeerte na wins die werklike redes daarvoor is. Knap gedaan!

W. S., Pole

Bloederige rolprente “Ons beskou die wêreld” het onder “Bloederige rolprente” melding gemaak van ’n rolprent, Die Hard 2, wat ek wou gaan kyk het (22 Desember 1990). Ek het selfs vir my vriende gesê dat ek dit wil gaan kyk. Maar toe ek hierdie brokkie lees, het ek besluit as ek na hierdie rolprent gaan kyk dit dieselfde sal wees as om na ’n gruwelrolprent te kyk, en ek het besluit om nie te gaan nie. Ek wil eintlik nog gaan, maar ter wille van my geestelike vordering sal ek dit nie doen nie.

M. T., Japan

Oefening Baie dankie vir die artikel “Wat oefening vir jou kan doen” (22 Oktober 1990). Elke keer wanneer ons liggaamlike opvoeding by die skool het, moet ons 1,6 kilometer draf, en ek het nog altyd ’n hekel daaraan gehad! Julle artikel het vir my gewys dat oefening mense werklik tot nut kan strek.

L. B. D., Verenigde State

Dankie vir julle artikel. Ek kon vanweë ’n gereelde oefenprogram in September ophou om medisyne vir hoë bloeddruk te gebruik. Ná ek nege weke lank op ’n minitrampolien gespring het, het ek vir my dokter gesê dat ek sonder my medisyne wil probeer klaarkom. Sy het my gesê hoe ek die dosis geleidelik kan verminder. My bloeddruk is nou normaal, ek voel wonderlik, en my man spring nou om syne te probeer afbring!

G. Y., Verenigde State

Lesers moet daarop let dat as hulle ernstige gesondheidsprobleme gehad het of as hulle ouer is dit verstandig sal wees om ’n gekwalifiseerde geneesheer te spreek voordat hulle met ’n intensiewe oefenprogram begin. Dit sal ook verstandig wees om so ’n geneesheer te spreek wanneer ’n mens ’n besluit neem oor voorskrifmedisyne.—RED.

Vakansies tuis Julle artikel “Probeer gerus ’n vakansie tuis” (22 Junie 1990) het voorgestel dat ’n mens veldblomme versamel. Hoewel ek dit jare gelede gedoen het, het ek sedertdien hierdie buitelugreël geleer: ‘Neem niks anders as foto’s nie; los niks anders as voetspore nie.’ Waar ek woon, is dit onwettig om sekere veldblomme te pluk. Maar ’n goed beligte, skerp foto van ’n veldblom kan jare lank geniet word!

W. K., Verenigde State

Foto’s is beslis ’n praktiese manier om die natuur te geniet in gebiede waar die pluk van veldblomme of soortgelyke aktiwiteite onwettig is of waar dit die ekologie kan skaad. Dankie vir die wenk.—RED.