Van ons lesers

Kleur Dankie vir die artikel “Voeg ’n bietjie kleur by jou lewe” (8 Oktober 1990). Die riglyne wat daarin gegee is, was uitstekend en het my baie met my keuse van klere gehelp. Dit is vir my moeilik om kleure bymekaar te pas, en ek was geneig om net swart en wit te dra. Nou sal dinge anders wees!

D. M. D., Brasilië

Immuunstelsel Ek skryf uit waardering vir julle artikels oor die immuunstelsel (22 November 1990). Ek het ’n tyd gelede immunologie as deel van my nagraadse studievereistes gestudeer. Hoe wens ek tog dat my professor so duidelik en lewendig soos julle bespreking was. Dit was waarlik ’n opknappingskursus! Dankie dat julle immunologie in ’n neutedop geplaas het.

O. O. O., Verenigde State

Ek wou julle net gelukwens met die beste wetenskaplike artikel wat ek nog oor die immuunstelsel gelees het. Ek het veral “’n Geestelike immuniteit teen die morele verval” geniet. Dit getuig beslis van diepe insig!

R. K., Verenigde State

Naskoolse werk Ek is 17 jaar oud en was bly om die artikel “Jongmense vra . . . Sal ’n naskoolse werk my help om groot te word?” (22 November 1990) te ontvang. Ek het vanjaar gedurende die somervakansie ’n werk gekry omdat ek van die grootmenswêreld wou leer. Ek het te doen gekry met ’n arrogante baas, onaangename probleme met medewerkers, ensovoorts. Ek dink dat ek, as ek hierdie artikel vroeër gelees het, sou gekies het om op ’n minder pynlike manier van die lewe te leer. Ek is so bly dat julle die behoeftes van jongmense verstaan.

T. F., Japan

Eetversteurings Ek het sewe jaar lank teen bulimie gestry. Ek het my ma daarvan vertel en sy het gesê dat dit net ’n stadium is wat ek sou ontgroei. Ses maande later het ek dit nog nie ontgroei nie. Ek het ’n paar Christinne in my vertroue geneem, en hulle het my nou en dan gevra hoe dit gaan. Ek het sedertdien net een terugval gehad. Dit is ’n groot hulp om ander mense te hê vir ondersteuning, maar die ware dryfkrag is die vrees om my Vriend, Jehovah, te mishaag. Ek het baie boeke oor die onderwerp gelees, maar julle artikels (22 Desember 1990) was die duidelikste en het die versteuring openhartig behandel.

E. S., Verenigde State

Teen die tyd dat ek 13 was, het ek die gewoonte gehad om te eet en dan te vomeer. In minder as ’n uur het ek genoeg geëet vir tien mense. Met die hulp van ’n professionele raadgewer wat in eetversteurings spesialiseer, het ek veranderinge gemaak. Ek is nou ’n gedoopte Getuie van Jehovah. Baie dankie vir sulke goed nagevorste en gebalanseerde artikels oor sulke ingewikkelde probleme.

N. I., Japan

Wêreldwye broederskap In die begin van November het my onderwyseres ons gevra om ’n opstel te skryf oor die onderwerp “Moet een beskawing as beter as ’n ander beskou word?” Die artikels oor wêreldwye broederskap (8 Desember 1990) het net op die regte tyd gekom! My onderwyseres het my gevra waar ek my informasie gekry het, en ek het die Ontwaak!-artikels vir haar gegee. Ek het 18 punte (uit 20) vir hierdie opstel gekry!

L. Q., Frankryk

Gloukoom My skoonma het vir my kom kuier en my vertel dat sy blou en geel kleure en ’n ligkring om mense se gesigte sien. Ek het die artikel “Gloukoom—’n sluipende rower van gesigsvermoë!” (8 Mei 1988) gevind. As gevolg van hierdie informasie kon ’n vroeë diagnose gemaak word, en my skoonma gaan binnekort behandeling ontvang. Hoe dankbaar is ek tog vir die Ontwaak!

G. S., Engeland