Van ons lesers
Wanneer ouers uitmekaar gaan Julle artikel “Jongmense vra . . . Hoe kan ek dit oorleef as my ouers uitmekaar gaan?” (22 Oktober 1990) is net vir my geskryf, en dit het my bemoedig. Ek is 16 jaar oud en my ouers is uitmekaar. Soms voel ek hartseer en terneergedruk, maar Jehovah is my intieme Vriend, en hy het my al baie gehelp. Ek weet dat dit niks help om uitermate bekommerd te wees omdat my ouers uitmekaar gegaan het nie. Ek het goeie vriende in die Christengemeente gevind. Ek vind ook dat vergaderinge en ander Christelike bedrywighede opbouend is.
D. B. G., Brasilië
Hubble-moeilikheid Julle kommentaar in “Ons beskou die wêreld” (8 Desember 1990) laat dit klink asof die Hubble-teleskoop ’n totale mislukking is. Hulle het egter party van die aanvanklike probleme daarvan uitgestryk, en dié teleskoop maak dit moontlik om dinge baie duideliker te sien as wat ’n mens dit deur aardgebonde teleskope sien.
D. N., Verenigde State
Dit was nie ons bedoeling om die Hubble-teleskoop ’n “totale mislukking” te noem nie, maar om die aandag te vestig op die groot teleurstelling in die wetenskaplike gemeenskap toe daar gevind is dat die instrument se belangrikste spieël ’n groot defek het.—RED.
Onmiddellike bevrediging Baie dankie vir julle artikels met die titel “Besit dit alles, besit dit nou!” (22 Januarie 1991). Dit is waarskynlik die antwoord op my opregte gebede en het my baie gegee om oor na te dink. Ek het veral die gedagteprikkelende vrae waardeer wat julle gevra het. Hulle sal van onskatbare waarde wees as ek in die versoeking kom om ’n weg van onmiddellike bevrediging te volg.
P. D., Verenigde State
Ontwaak! word geprys Lektuur wat onderwerpe van die grootste belang vir ons gemeenskap (soos die geneeskunde, sosiologie en ekologie) bymekaarbring, wat dit op ’n nie-politieke manier oordra met ’n tikkie godsdiens daarby en wat sy verduidelikings op die Boek der boeke baseer—sulke lektuur is deesdae skaars. Ek versoek dus dat dit amptelik in die Notule opgeteken word dat die Ontwaak! ’n mosie van lof ontvang, veral vir sy nommers van 8 en 22 November 1990 oor VVV’s en die immuunstelsel.
N. B., Munisipale Raad van Tietê São Paulo, Brasilië
Immuunstelsel Ek het gedink ek verstaan die woorde in Psalm 139:14: “Ek wil U [God] loof, want U het my op ’n wonderbaarlike wyse geskep” (NAV). Maar danksy julle duidelike, bondige artikels oor die onderwerp “Ons immuunstelsel—’n skeppingswonder” (22 November 1990) verstaan ek daardie teks nou ten volle! Die wêreld van selletjies binne ons is ontsagwekkend. Ons Skepper se werke is waarlik wonderlik. Dankie vir julle onvermoeide, volgehoue navorsing oor hierdie soort onderwerpe. Die artikels was waarlik geloofversterkend.
D. J., Verenigde State
Die artikels was eenvoudig genotvol en baie opvoedkundig. Terwyl ek hulle gelees het, kon ek nie help om my te verwonder oor Jehovah en oor hoe wonderlik hy ons gemaak het nie. Dit is moeilik om te glo dat sommige mense dink dat dit alles per toeval gebeur het.
Y. S., Verenigde State
Ek weet nie hoe om julle te bedank vir daardie uitstekende artikels nie. Ek het nog nooit ’n verduideliking gehoor of gelees wat so eenvoudig, dog uitvoerig, is nie. Aangesien ek aan een van die siektes ly wat julle genoem het, kan ek beter verstaan wat my dokter vir my gesê het en my by my gesondheidsprobleem aanpas.
M. R. O., Brasilië