Van ons lesers
Wêreldwye broederskap Ek het die informasie in die nommer van 8 Desember 1990 werklik waardeer. Ek kom uit ’n familie waar daar rassevooroordeel is, en dit irriteer my dikwels. Ek het gewag vir informasie soos hierdie sodat ek dit vir hulle kan wys. Die artikels is duidelik en saaklik aangebied, en dit sal nuttig wees om hulle te help verstaan waarom ons God se voorbeeld van onpartydigheid moet navolg.
T. C., Verenigde State
Godsdienstig verdeelde huise Baie dankie vir die artikel “Jongmense vra . . . Hoe kan ek in ’n godsdienstig verdeelde huis woon?” (22 Januarie 1991). Terwyl ek en my kinders die artikel saam gelees het, het ons gevoel dat julle werklik verstaan hoe pynlik en moeilik ’n situasie soos hierdie kan wees. Dit het baie van die probleme beskryf waarvoor ons persoonlik in ons eie huis te staan kom. Dit was so bemoedigend om praktiese raad uit die Skrif te ontvang!
D. H., Verenigde State
Ek word ook in ’n godsdienstig verdeelde huis groot. Soos die seun wat in die artikel aangehaal is, voel ek soms so jammer vir my pa omdat hy alleen in die huis agterbly wanneer ons na Christelike vergaderinge toe gaan. Soms het ek al in die versoeking gekom om my geloof prys te gee. Nadat ek hierdie artikel gelees het, het ek egter besluit dat hoewel ek vriendelik en taktvol met my pa moet wees, ek ook baie versigtig moet wees om geestelike slaggate te vermy.
J. O., Japan
Aanvaar kritiek Vandat ek ’n Christen geword het, soek my ouers na dinge waaroor hulle my kan kritiseer. Dit het my al baie ergernis veroorsaak. Maar julle artikel “Haat jy dit om kritiek te ontvang?” (8 Februarie 1991) het aan my getoon hoe ek hierdie situasie die hoof kan bied.
M. M., Verenigde State
Onmiddellike bevrediging Ek moet net ‘dankie!’ sê vir die artikels oor onmiddellike bevrediging (22 Januarie 1991). Ek veg teen hierdie gesindheid omdat ek gedurende my kinderjare ses uur per dag televisie gekyk het. Die artikels het my ’n nuwe beskouing gegee.
R. D., Verenigde State
Rook Ek het ’n eksemplaar van die Ontwaak!, wat oor rook handel, in ’n telefoonhokkie gekry (8 Julie 1989). Die kopbeen op die voorblad het werklik my aandag getrek! Ek het vier jaar gelede opgehou rook, maar ek het die tydskrif vir een van my seuns gegee wat rook. Ek het drie ander seuns wat ook moet ophou. Die artikels was baie leersaam en saaklik. Hoewel ek nie aan julle godsdiens behoort nie, respekteer ek dit.
P. T., Verenigde State
My onderwyseres het heeltemal te veel gerook, en elke keer as sy met my gepraat het, het sy na sigaretrook geruik. Ek het die artikel onthou met sy tien maniere om op te hou rook. Ek het ’n eksemplaar vir my onderwyseres geneem en haar drie maande later gevra of sy opgehou rook het. Sy het aan my gesê dat sy, met behulp van die tydskrif en inspanning, opgehou het. Sy het 25 jaar lank gerook.
B. O., Verenigde State
Enkelouergesinne Ek is ’n enkelouer, en as gevolg van die druk wat gepaard gaan met die feit dat ek my kinders alleen moet grootmaak en in hulle behoeftes moet voorsien, is ek geneig om so verdiep te raak in hoe hierdie dinge my raak, dat ek dikwels voel dat ek alleen in hierdie situasie is. Julle artikel “Hoe kan ek gelukkig wees met net een ouer?” (22 Desember 1990) het my gehelp om sake uit ’n ander oogpunt—my kinders s’n—te sien. Ek het tot die besef gekom dat my gevoelens en behoeftes nie die enigstes is wat in ag geneem moet word nie.
P. G. B., Verenigde State