Van ons lesers

Kleurblindheid My man het ’n oogoperasie ondergaan en kan nie op die oomblik lees nie. Toe ons die artikel oor Daltonisme [kleurblindheid] in die nommer van 22 Februarie 1991 ontvang het, het hy my dadelik gevra om dit vir hom te lees. As kind kon hy nie die verskil tussen ’n swart-en-witbeeld op die TV en ’n kleurbeeld onderskei nie, maar niemand in sy gesin het hulle daaroor bekommer nie. Eers later, toe hy die eksamen vir sy rybewys afgelê het, het hy agtergekom dat hy kleurblind was. Daarom bedank my man julle vir julle artikel. As dit vantevore beskikbaar was, sou hy talle lastige situasies kon vermy het!

M. D., Italië

Godsdienstig verdeelde huisgesinne Julle artikel “Jongmense vra . . . Hoe kan ek in ’n godsdienstig verdeelde huis woon?” (22 Januarie 1991) het my regtig gehelp. Partykeer wil my pa hê dat ek van Christelike vergaderinge moet wegbly net om TV te kyk. Julle artikel het my en my ma gehelp om aan te hou bid en hoop dat Jehovah my pa se hart sal bereik. Baie dankie!

C. E., Verenigde State

My pa is nie ’n Christen nie, en dit maak my soms hartseer. Ek beoog om julle nuttige wenke te gebruik om hom te probeer oorhaal.

L. M., Verenigde State

Samewerking tussen dokters en pasiënte Dankie vir die artikel “Die kloof tussen dokters en Getuiepasiënte word oorbrug” (22 November 1990). My seuntjie ly sedert sy geboorte aan hidrokefalie en spina bifida. Voordat hy ’n jaar oud was, het hy al ses operasies gehad. Hoewel sy toestand verbeter het, het hy steeds mediese aandag nodig. As gevolg van ons standpunt oor bloed [as Jehovah se Getuies] weet ek nooit of dokters hulle samewerking sal gee nie. Ons hoop dat die reëling van opgeleide Christenbroers wat ons kan help om met dokters te praat binnekort ook in Argentinië in werking sal tree.

A. M., Argentinië

Hospitaalskakelkomitees word tans in Argentinië gestig.—RED.

Oos-Europa Sedert die onlangse veranderinge in Oos-Europa begin het, wou ek graag meer weet van Jehovah se Getuies in daardie deel van die aarde. Daar was baie min inligting in ons publikasies te vinde. Julle kan dink hoe bly ek was toe ek die nommer van 8 Januarie 1991 ontvang het met die artikel “Jehovah se Getuies in Oos-Europa”. Ek hoop dat julle sal aanhou om ons omtrent die bevordering van die predikingswerk in daardie deel van die wêreld in te lig.

E. S. L., Brasilië

Immuunstelsel Ek wil graag hê dat julle moet weet wat ’n uitstekende stuk mediese navorsing die artikels oor die immuunstelsel (22 November 1990) was. Ek werk in hematologie-onkologie en het werklik die wetenskaplike dog duidelike manier waarop die materiaal aangebied is, waardeer. Ek het eksemplare van die tydskrif versprei onder die dokters en verpleegsters saam met wie ek werk.

G. T., Verenigde State

Ek is ’n wetenskaponderwyser, en ons was toevallig net besig om immunologie in die klas te bespreek toe hierdie nommer van die Ontwaak! verskyn het. Ek het vir elke leerling ’n eksemplaar van die tydskrif gegee en het ’n gevorderde wetenskapsessie gehad wat daarop gebaseer was.

R. I., Verenigde State

Dwelms Toe ek die artikel “Dwelms? Skud sommer hand met Satan!” (8 November 1990) gelees het, het ek trane in my oë gekry. Die verslag was hartseer, maar terselfdertyd versterkend. Die artikel het dit duidelik gemaak dat dit nie die moeite werd is om Jehovah vir enigiets te verruil wat hierdie ou wêreld kan bied nie.

M. C. P., Brasilië