Hoe dokters hulle teen Vigs beskerm

DIE gevaar om Vigs deur bloed op te doen, het daartoe gelei dat sommige chirurge iets aanvaar wat The New York Times die “nuwe chirurgiese wapenrusting vir die Vigs-eeu” noem. Vir die chirurg sluit die wapenrusting “rubberstewels, ’n vollengte waterdigte voorskoot, twee paar handskoene, waterdigte moubeskermers en skermbrille” in. En vir buitengewoon bloederige gevalle, sê die Times, “’n helm met ’n masker daarom”.

Dit is opvallend dat die Federal Centers for Disease Control teen die einde van 1990 gesê het dat van die 153 000 aangemelde Vigs-gevalle 637 dokters, 42 chirurge, 156 tandartse en higiëniste en 1199 verpleegsters was.

Vigs is in 1981 vir die eerste keer geïdentifiseer. Dit was ’n tyd lank beperk tot veral manlike homoseksuele en tot dwelmverslaafdes wat die siekte deur besmette naalde opgedoen het. Maar dit het vinnig onder vroue versprei. World Health, die tydskrif van die WGO (Wêreldgesondheidsorganisasie), het in sy uitgawe vir November-Desember 1990 berig: “Die aantal vroue [wêreldwyd] wat Vigs waarskynlik gedurende die volgende twee jaar sal opdoen, sal hoër wees as die groottotaal van al die Vigs-gevalle wat gedurende die eerste dekade van die epidemie by die WGO aangemeld is.”

In die Verenigde State het die Federal Centers for Disease Control berig dat daar teen die einde van 1990 15 696 mense oor 50 jaar was wat die Vigs-simptome ontwikkel het. Dit is baie vergeleke met slegs 2686 Vigs-gevalle onder kinders onder 13 jaar, ’n groep Vigs-slagoffers wat baie meer publisiteit gekry het.

Hoe doen ouer mense Vigs op? Die meeste kry dit as gevolg van homoseksuele bedrywighede. Maar volgens The New York Times “het ongeveer 17 persent van die slagoffers die virus deur besmette bloedoortappings opgedoen”. Dit kom daarop neer dat daar min of meer net soveel Vigs-gevalle onder bejaardes is as gevolg van bloedoortappings as wat daar Vigs-gevalle onder kinders onder 13 jaar is!