Van ons lesers
TMG-sindroom Dankie vir die artikel “Uit die kake—die groot bedrieër” (22 Junie 1991). Tot kort gelede nog het ek hierdie probleem gehad. Ek het snags paniekbevange wakker geword omdat my kakebeen vasgehaak het! Verskeie dokters het my probleem verkeerd gediagnoseer totdat ek ’n tandheelkundige gaan spreek het. Hy het onmiddellik vasgestel dat dit veroorsaak is deur tande wat nie mooi op mekaar pas nie. Die wenke in die artikel is prakties, nuttig en kan onmiddellik verligting bring.
S. F., Italië
Slegte gewoontes Dankie vir die hulp wat ek in die artikel “Voorkom dat slegte gewoontes terugkeer” (8 April 1991) gevind het om TV-verslawing te bowe te kom. Hoofstuk 36 van die boek Vrae wat jongmense vra—Antwoorde wat werk [wat deur die Watchtower Bible and Tract Society of New York, Inc. uitgegee word] het ’n rukkie lank gehelp, maar ek het weer in oormatige TV-kykery verval. Julle artikel het my gehelp om ’n slegte gewoonte deur ’n goeie te vervang, naamlik om die geestelike voedsel in die Ontwaak! te lees.
A. G., Verenigde State
Kinders van geskeide ouers My opregte dank vir die reeks “Hulp vir kinders van geskeide ouers” (22 April 1991). Toe ek drie was, het my pa van my ma geskei. Sy het daarin geslaag om my en my sussie te leer om Jehovah lief te hê. Maar gedurende die tienderjare was dit net soos julle beskryf het. Ek het gevoel dat “alle verhoudings onbetroubaar is en dat dit gedoem is om eendag op verraad en ontrouheid uit te loop”. Ek was bang om liefde te gee en te ontvang, en selfs onder mede-Christene het ek alle menseverhoudings oppervlakkig gehou. Toe ek geleer het om dinge vir ander mense te doen, en ’n voltydse evangeliedienaar geword het, het dit my gehelp om hierdie neigings in sekere mate te oorkom. Julle artikel het my egter gehelp om vir die eerste keer sommige van my diepste gevoelens te verstaan.
M. H., Japan
Die artikels het my en my man skuldig laat voel. My eerste man is weens ontrouheid uit die Christengemeente gesit. Ek en my seuns het toe by my ouers ongeveer [3 200 kilometer] daarvandaan gaan woon. Die seuns het min kontak met hulle pa gehad. Nadat ek weer getrou het, het ons steeds alle kontak ontmoedig, omdat ons gevoel het dat die pa ’n slegte invloed is. Het ons die regte besluit geneem?
C. W., Verenigde State
Nóg egskeiding nóg uitsetting uit die Christengemeente beëindig ’n ouer-kindverhouding; kinders het steeds albei ouers nodig. Elke situasie verskil nietemin. Fisiese afstand of onverskilligheid aan die kant van ’n gewese huweliksmaat kan die kontak tussen ouer en kind grootliks beperk. Aan die ander kant kan howe besoekreëls neerlê, en ’n Christen kan dalk nie anders as om hom of haar daaraan te onderwerp nie. Wanneer geen besoekreëls neergelê word nie, berus dit by die ouer wat toesig oor die kinders het om te besluit of omgang met ’n gewese huweliksmaat ernstige fisiese of geestelike gevare inhou.—RED.
Dankie vir die naakte waarheid in julle artikels oor egskeiding. My ouers is geskei toe ek amper 20 jaar oud was, en ek het deur ’n stadium gegaan waar ek selfs die huweliksreëling verag het. Ek het dit as ’n strik of ’n tronk beskou! Danksy julle Bybelse boeke en tydskrifte sien ek eintlik daarna uit om eendag te trou, met die oog op die ware potensiaal van die huwelik.
L. T., Verenigde State
Colosseum Ek het die artikel “Die Colosseum—eertydse Rome se ‘vermaaklikheidsentrum’” (8 April 1991) uiters boeiend gevind. As ’n geskiedkundige het ek die manier waarop julle die waarheid van legende geskei het baie geniet.
N. H., Verenigde State