Van ons lesers
TV Dankie vir die reeks “Televisie—Die kassie wat die wêreld verander het” (22 Mei 1991). Ek het nog altyd ’n probleem met TV gehad; ek het nie die wilskrag om dit af te skakel nie. Julle wenke het my gehelp. Ek gaan die hoeveelheid tyd wat ek televisie kyk, nagaan. Ek het my TV ook in die kas gebêre sodat ek eers die voor- en nadele kan opweeg wanneer ek TV wil kyk. Nogmaals baie dankie.
W. H., Verenigde State
Skoolspanne Ek het die artikel “Jongmense vra . . . Moet ek by die skoolspan aansluit?” (22 Junie 1991) nou net klaar gelees. My maats het druk op my uitgeoefen om by die skoolspan aan te sluit omdat hulle weet dat ek baie van sport hou. Danksy julle artikel kan ek nou aan hulle verduidelik waarom ek dit nie gaan doen nie.
D. K., Verenigde State
Verander wat jy is Ek wil julle hartlik bedank vir die uitstekende wenke wat julle in die reeks artikels “Moet jy verander wat jy is?” (8 Julie 1991) gegee het. Ek het besef dat daar sekere dinge aan my persoonlikheid is wat ek moet verander, maar ek het nie die motivering gehad om dit te doen nie. Ek wend op die oomblik ’n poging aan om die raad wat julle gegee het toe te pas en ek vind reeds baie daarby baat.
S. C., Italië
Nadat ek uit die hospitaal se psigiatriese afdeling ontslaan is, het ek die artikels oor ‘verandering’ gelees. Praat van die spyker op die kop slaan! Dit is eers na sowat 30 jaar dat ek besef het ek het ’n ernstige gedragsafwyking. Nou sien ek myself soos ek werklik is, en noudat ek van my probleem bewus is, kan ek positiewe stappe doen om myself te beheers.
J. D., Verenigde State
Die longe Ek is 13 jaar oud. Ek kan onthou dat ons in standerd drie van die longe geleer het, maar ek het die meeste van die inligting vergeet. Julle artikel “Die longe—wonderlik ontwerp” (8 Junie 1991) het my geheue verfris. Dit is baie goed geskryf en die diagram is baie akkuraat. Baie dankie vir artikels soos hierdie wat ons waardering vir Jehovah se wonderlike skeppingswerke vergroot.
A. M., Verenigde State
TMG-sindroom Die artikel “Uit die kake—die groot bedrieër” (22 Junie 1991) was vir my van spesiale belang, aangesien ek ’n maksillofasiale chirurg is en meer as 14 jaar lank al TMG-probleme behandel. Julle sê dat wanokklusie, dit wil sê, ’n toestand waar die bo- en ondertande nie mooi op mekaar pas nie, die algemeenste oorsaak van TMG-probleme is. Onlangse mediese lektuur en my eie ondervinding toon dat, hoewel okklusie wel by sommige pasiënte ’n rol speel, dit nie die hoofoorsaak van die TMG-sindroom is nie. Die meeste pasiënte het in werklikheid ’n interne afwyking in die kaakgewrig self. Dit lyk asof ander faktore, soos ruggraatprobleme, ook daarby betrokke is. Nie-chirurgiese prosedures soos liggaamsterapie en chiropraktiese behandelings kan gevolglik doeltreffend wees om ’n pasiënt se probleme te verbeter. Pasiënte met TMG-sindroom moet dit ook oorweeg om hulle dieet tot sagte voedselsoorte te beperk. As hulle die stremming op hulle spiere en kaakgewrigte verlig, kan dit hulle simptome verbeter. Maar vir die oorgrote meerderheid pasiënte is daar nie werklik genesing nie—die enigste ware genesing sal onder God se Koninkryk kom.
C. A., D.M.D., Verenigde State
Baie dankie vir hierdie bykomende inligting wat deur jou persoonlike ondervinding gerugsteun word. Ons waardeer hierdie verdere opmerkings.—RED.
Voltooi wat jy begin Toe ek die artikel “Jongmense vra . . . ‘Waarom kan ek nie die dinge wat ek aanpak, voltooi nie?’” (8 September 1991) gelees het, het ek gedink dat julle oor my skryf. Met behulp van julle artikel en met Jehovah se hulp sal ek dít wat ek aanpak, kan voltooi. Baie dankie vir julle tydige inligting.
A. P., Verenigde State