Die innerlike letsels van kindermolestering

“Ek haat myself. Ek bly dink daar is iets wat ek behoort te gedoen het, behoort te gesê het om ’n einde daaraan te maak. Ek voel so vuil.”—Ann.

“Ek voel afgesny van mense. Ek het dikwels gevoelens van wanhoop en vertwyfeling. Soms wil ek sterf.”—Jill.

“DIE seksuele misbruik van kinders is . . . ’n oorweldigende, skadelike en vernederende aanval op ’n kind se verstand, siel en liggaam . . . Die misbruik maak inbreuk op elke faset van ’n mens se bestaan.” So sê The Right to Innocence, deur Beverly Engel.

Nie alle kinders reageer dieselfde op misbruik nie.a Kinders het verskillende persoonlikhede, vermoëns om probleme te hanteer en emosionele krag. Baie hang ook af van die kind se verhouding tot die molesteerder, hoe erg die misbruik is, hoe lank die misbruik aangehou het, die kind se ouderdom en ander faktore. Daarbenewens kan die skade dikwels tot die minimum beperk word as die misbruik oopgevlek word en ’n kind liefdevolle hulp by volwassenes kry. Maar baie slagoffers doen diep emosionele letsels op.

Waarom dit verwoesting aanrig

Die Bybel gee ons insig in die rede waarom sulke skade aangerig word. Prediker 7:7 sê: “Louter onderdrukking kan ’n wyse waansinnig laat handel” (NW). As dit op ’n volwassene van toepassing is, kan jy jou voorstel wat die gevolg van onmenslike onderdrukking op ’n klein kind is—veral as die molesteerder ’n vertroude ouer is. Daar moet onthou word dat die eerste paar jaar van ’n kind se lewe uiters belangrik is vir haar emosionele en geestelike ontwikkeling (2 Timotheüs 3:15). Dit is tydens daardie eerste jare dat ’n kind sedelike grense en ’n gevoel van eiewaarde begin ontwikkel. Deur binding aan haar ouers leer ’n kind ook die betekenis van liefde en vertroue.—Psalm 22:10.

“By gemolesteerde kinders”, verduidelik dr. J. Patrick Gannon, “word hierdie proses om vertroue op te bou ontspoor.” Die molesteerder skend die kind se vertroue; hy beroof haar van enige sweempie van veiligheid, privaatheid of selfrespek en gebruik haar as ’n blote voorwerp om homself te bevredig.b Klein kindertjies verstaan nie die betekenis van die onsedelike dade wat aan hulle opgedwing word nie, maar dit is feitlik in alle gevalle vir hulle ’n ontstellende, angswekkende en vernederende ondervinding.

Kindermolestering is dus al “die allerergste verraad” genoem. Ons word aan Jesus se vraag herinner: “Watter mens is daar onder julle wat, as sy seun hom brood vra, aan hom ’n klip sal gee?” (Mattheüs 7:9). Maar die molesteerder gee ’n kind nie liefde en toegeneentheid nie, maar die wreedste “klip” van almal—seksuele aanranding.

Waarom die letsels nie verdwyn nie

Spreuke 22:6 sê: “Oefen die seun volgens die eis van sy weg; dan sal hy, ook as hy oud word, daar nie van afwyk nie.” Dit is duidelik dat ouers se invloed lewenslank kan duur. Maar sê nou ’n kind leer om te glo dat sy magteloos is om seksuele opdringing te keer? Leer om perversiteite uit te voer in ruil vir “liefde”? Leer om haarself as nutteloos en vuil te beskou? Kan dit nie tot ’n leeftyd van vernietigende gedrag lei nie? Nie dat kindermolestering onvanpaste gedrag later, tydens volwassenheid regverdig nie, maar dit kan help om te verduidelik waarom slagoffers van molestering dalk geneig is tot sekere optrede of gevoelens.

Baie slagoffers van molestering het ’n verskeidenheid simptome, waaronder depressie. Sommige word ook gekwel deur volgehoue en by tye oorweldigende skuldgevoelens, skaamte en woede. Ander slagoffers ondervind dalk emosionele afsluiting, ’n onvermoë om emosie te toon of selfs te voel. Baie word ook geteister deur ’n lae gevoel van eiewaarde en gevoelens van magteloosheid. Sally, wat deur haar oom misbruik is, vertel: “Elke keer as hy my gemolesteer het, het ek kragteloos en yskoud, gevoelloos, lam en verward gevoel. Ek het bly dink: ‘Waarom gebeur dit met my?’” Sielkundige Cynthia Tower sê: “Studies toon dat mense wat as kinders misbruik is dikwels hulle hele lewe lank ’n voorstelling van hulself as ’n slagoffer het.” Hulle trou dalk met ’n man wat hulle sal mishandel, dra ’n houding van kwetsbaarheid oor of hulle dink hulle is magteloos om hulself te verdedig wanneer hulle bedreig word.

Kinders het gewoonlik ongeveer 12 jaar om hulle voor te berei vir die emosies wat gedurende puberteit ontwaak. Maar wanneer wellustige dade aan ’n jong kind opgedwing word, kan sy oorweldig word deur die gevoelens wat opgewek is. Soos een studie toon, kan dit later haar vermoë om intieme dinge in die huwelik te geniet belemmer. ’n Slagoffer genaamd Linda erken: “Die seksuele sy van die huwelik is vir my die moeilikste ding in my lewe. Ek kry die verskriklikste gevoel dat dit my pa is, en ek raak paniekbevange.” Ander slagoffers reageer dalk op net die teenoorgestelde manier en ontwikkel kompulsiewe, onsedelike begeertes. “Ek het ’n promiskue lewe gelei en dit het tot seksuele omgang met volslae vreemdelinge gelei”, erken Jill.

Slagoffers van molestering kan dit ook moeilik vind om gesonde verhoudings te hê. Party kan eenvoudig nie met mans of gesagsfigure verhoudings hê nie. Party sal vriendskappe en huwelike saboteer deur beledigend of oorheersend te raak. Ander verkies weer om intieme verhoudings heeltemal te vermy.

Daar is selfs slagoffers wat hulle vernietigende gevoelens op hulself rig. “Ek het my liggaam gehaat omdat dit op die stimulasie van die misbruik gereageer het”, erken Reba. Dit is tragies dat eetversteurings,c werkverslaafdheid, alkohol- en dwelmmisbruik algemeen onder die slagoffers van molestering is—desperate pogings om hulle gevoelens te begrawe. Party toon hulle selfhaat dalk ook op direkter wyse. “Ek het myself gesny, my vingernaels in my arms ingegrawe, myself gebrand”, voeg Reba by. “Ek het gedink ek verdien dit om misbruik te word.”

Moenie die gevolgtrekking maak dat elkeen wat so voel of optree noodwendig seksueel gemolesteer is nie. Ander fisiese of emosionele faktore kan daarby betrokke wees. Deskundiges sê byvoorbeeld dat soortgelyke simptome algemeen is onder volwassenes wat in abnormale gesinne grootgemaak is—waar hulle ouers hulle mishandel, verkleineer en verneder het, hulle fisiese behoeftes geïgnoreer het of waar die ouers aan dwelms of alkohol verslaaf was.

Geestelike skade

Die verraderlikste gevolg van kindermolestering is die moontlike geestelike skade. Molestering is ’n “besoedeling van die vlees en die gees” (2 Korinthiërs 7:1). Deur perverse dade op ’n kind uit te voer, deur haar fisiese en sedelike grense te oortree en deur haar vertroue te skend, besoedel ’n molesteerder ’n kind se gees, of oorheersende verstandelike neiging. Dit kan later die slagoffer se sedelike en geestelike groei belemmer.

Die boek Facing Codependence, deur Pia Mellody, sê verder: “Enige ernstige misbruik . . . is ook geestelike misbruik, omdat dit die kind se vertroue in ’n Hoër Gesag besoedel.” ’n Christin met die naam Ellen vra byvoorbeeld: “Hoe kan ek aan Jehovah as ’n Vader dink wanneer ek hierdie idee van ’n wrede, woedende man vir ’n aardse vader het?” ’n Ander slagoffer met die naam Terry sê: “Ek het nooit aan Jehovah as ’n Vader gedink nie. As God, Heer, Soewerein, Skepper, ja! Maar as Vader, nee!”

Sulke mense is nie noodwendig geestelik swak of hulle het nie ’n gebrek aan geloof nie. Inteendeel, hulle volgehoue pogings om Bybelbeginsels na te volg, getuig van geestelike krag! Maar stel jou voor hoe party dalk voel wanneer hulle ’n Bybelteks soos Psalm 103:13 lees, wat sê: “Soos ’n vader hom ontferm oor die kinders, so ontferm die HERE Hom oor die wat Hom vrees.” Party verstaan dit dalk verstandelik. Maar sonder ’n heilsame idee van wat ’n vader is, kan dit vir hulle baie moeilik wees om emosioneel op hierdie teks te reageer!

Vir party is dit dalk ook moeilik om “soos ’n kindjie” voor God te wees—kwetsbaar, nederig, vol vertroue. Hulle weerhou dalk hulle ware gevoelens van God wanneer hulle bid (Markus 10:15). Hulle aarsel dalk om Dawid se woorde in Psalm 62:8, 9 op hulself toe te pas: “By God is my heil en my eer; die rots van my sterkte, my toevlug is in God. Vertrou op Hom altyd, o volk! Stort julle hart uit voor sy aangesig! God is ’n toevlug vir ons.” Gevoelens van skuld en onwaardigheid kan selfs hulle geloof verswak. Een slagoffer het gesê: “Ek glo baie sterk aan Jehovah se Koninkryk. Maar ek voel nie werklik dat ek goed genoeg is om daar te wees nie.”

Nie alle slagoffers word natuurlik op dieselfde manier geraak nie. Party voel aangetrokke tot Jehovah as ’n liefdevolle Vader en het geen probleem om ’n verhouding met hom te hê nie. Wat ook al die geval is, indien jy as kind seksueel misbruik is, kan dit vir jou van groot waarde wees om te ontleed hoe dit jou lewe geraak het. Party is dalk tevrede om die saak net daar te laat. Maar as jy dink dat die skade groot is, kan jy moed skep. Jou letsels kan genees word.

[Voetnote]