Van ons lesers
Jode en Christene Ek wil graag my waardering uitspreek vir die reeks artikels oor Jode en Christene (22 Junie 1991). As ’n Christenbedienaar moet ek erken dat ek nie eintlik geweet het hoe om hierdie saak met Jode te bespreek nie. Die artikel het getoon dat ons hulle nie vra om hulle Joodse erfenis agter te laat nie maar bloot om Jesus en die Messiaanse profesieë in die lig van die waarheid te ondersoek, nie in die lig van verdraaide tradisies en valse leerstellings nie.
J. L., Verenigde State
Die artikel kan die indruk skep dat die misdade van die Christendom erger is as dié van die Jode. Was dit nie die Jode wat God se Seun aan die folterpaal genael het nie?
N. L., Duitsland
Die moord op Jesus Christus, die Seun van God, was inderdaad die grootste misdaad in die geskiedenis van die mens. Nogtans is daar geen bewys dat God die individuele afstammelinge van dié wat daardie misdaad gepleeg het, veroordeel nie. Inteendeel, ‘God is geen aannemer van die persoon nie, maar in elke nasie is die een wat Hom vrees en geregtigheid doen, vir Hom welgevallig’ (Handelinge 10:34, 35). Terwyl geen enkele nasionaliteit deur God veroordeel word nie, moet die Christendom verantwoording doen vir sy verlede van bloedskuld, vervolging en godsdiensonverdraagsaamheid.—RED.
Bendeaanval Ek het werklik julle artikel “Jongmense vra . . . Hoe kan ek my teen ’n bendeaanval beskerm?” (22 Julie 1991) waardeer. Dit het gekom net toe ek moedeloos was omdat ek nie meer geweet het hoe om hierdie situasie te hanteer nie. Ek sal van nou af versigtig wees oor my kleredrag, versorging en gedrag. Baie dankie vir julle hulp.
J. H., Japan
Die groot bedrieër Dankie dat julle die artikel “Uit die kake—die groot bedrieër” (22 Junie 1991) gepubliseer het. My dogter het altyd hoofpyn gehad en is op verskeie maniere behandel, maar die oorsaak kon nie bepaal word nie. Ek het die artikel na ’n tandarts geneem; hy het x-strale geneem en die probleem opgespoor. Nou kry sy die regte behandeling. Ek is nog nie een van Jehovah se Getuies nie, maar ek geniet dit om die Ontwaak! te lees.
S. M. S., Brasilië
Ek is ’n tandarts, en hierdie artikel sal vir baie mense van ontsaglike hulp wees. Min mense weet dat hierdie probleem bestaan, en selfs ons as tandartse beskou dit soms nie as ernstig genoeg nie. Hoe waar is dit tog dat slegs ons Skepper die oplossing vir alle kwale het!
E. F. G., Duitsland
Selfverdediging As ’n mens die artikel “Selfverdediging—Hoe ver kan ’n Christen gaan?” (8 Julie 1991) lees, kan ’n mens die indruk kry dat die verweerkuns ’n gereedheid vir gevegte en aggressie bevorder. Dit is nie die geval nie. Die meeste verweerkunste dra meer daartoe by om liggaamsbeheer, selfdissipline en ’n gevoel van regverdigheid in te skerp as baie ander sportsoorte.
T. M., Duitsland
Die verweerkuns kan weliswaar vir die deelnemers van waarde wees. Nogtans leer dit ’n mens hoe om jou medemens te beseer en dit is teenstrydig met die Bybel se beginsels wat in Jesaja 2:4 en Mattheüs 26:52 gevind word.—RED.