Van ons lesers
Ontvoering Baie dankie vir die artikel “As jy iets onnosels aanvang, maak ek jou dood” (22 November 1991). Dit het my tot trane beweeg. Ek het nog nooit iets deurgemaak soos wat Lisa Davenport deurgemaak het nie, maar omdat ek al ’n geruime tyd aan depressie ly, het ek al met tye gevoel dat ek wou sterf. Die artikel het my egter diep laat nadink oor die kragtige ondersteuning wat Jehovah God gee en hoe hy altyd hulp gee wanneer ons dit nodig het.
N. O., Japan
Gesinne kom na aan mekaar Ek is so bly oor die reeks artikels “Gesinne—Kom na aan mekaar voor dit te laat is” (22 September 1991). My oë het vol trane geskiet toe ek die pragtige voorblad gesien het. Verder is elke woord en uitdrukking met soveel sorg gekies en met soveel teerheid geskryf! Baie dankie dat julle ons herinner het aan hoe belangrik dit is om ’n hegte gesin te hê.
K. E., Verenigde State
Die artikels was van die roerendste wat ek nóg gelees het. Baie van ons het gemeen dat ons as ouers welslae sal behaal as ons eenvoudig die Bybel met ons kinders bestudeer, hulle na Christelike vergaderinge neem en saam met hulle aan die predikingswerk deelneem. Ek het egter gevind dat ouers wat welslae behaal ook ’n hegte persoonlike verhouding met hulle kind het—’n band wat die kind van die ouers se liefde verseker. Hierdie punt is al in vorige artikels bespreek, maar dit het nog nooit vantevore so ’n groot indruk op my gemaak nie.
T. H., Verenigde State
Voordat ek getroud is, was ek ’n boekhoudster. Ek het my werk baie geniet. Nadat ek kinders gehad het, het ek besluit om op te hou werk en tuis te bly by die kinders. Maar ek het al met tye baie nutteloos gevoel en ek wou baie graag teruggaan werk toe. Nadat ek julle artikel gelees het, het ek ’n hernieude verantwoordelikheidsgevoel teenoor my kinders.
S. M., Verenigde State
Dobbel Dankie vir die artikel “Jongmense vra . . . Is dobbel werklik so sleg?” (8 November 1991). By my skool is dobbel baie gewild. Een dobbelspel betaal 20 jen aan die wenner; sommige klasmaats bring 2000 jen skool toe! Ek is eenkeer genooi om saam te speel. Ek het begin wonder of dobbel werklik so sleg is en ek het in die versoeking gekom om dit net een keer te probeer. Maar nadat ek die artikel gelees het, weet ek nou dat dobbel nie ’n goeie ding is nie en dat jy dit miskien keer op keer sal wil doen as jy dit eers een keer probeer het.
N. N., Japan
Eerlikheid Ek skryf aangaande die artikel “Betaal dit om eerlik te wees?” (22 Oktober 1991). Aangesien Jehovah se Getuies nie buitemuurse sportbedrywighede aanbeveel nie, het ek gedink dat hierdie artikel ’n verwarrende boodskap oorgedra het.
C. P., Verenigde State
Die artikel het vertel hoe ’n jong seun wat aan ’n bofbalwedstryd deelgeneem het vir sy eerlikheid beloon is. Maar erkenning vir die ondervinding is aan die tydskrif “Sports Illustrated” gegee. Die betrokke seun was dus nie een van Jehovah se Getuies nie. Die artikel is in elk geval nie gepubliseer om deelname aan sport aan te moedig nie, maar om die waarde van eerlikheid toe te lig.—RED.
Van ons lesers Ek sien altyd daarna uit om die artikel “Van ons lesers” te lees. Ek verwonder my oor hoe taktvol julle antwoorde is. As daar ’n drukfout of ’n fout was, erken julle dit nederig. Maar julle wyk nooit af van die waarheid van God se Woord nie, ongeag hoe ontsteld ’n leser dalk raak. En julle het selfs ’n sin vir humor! Ek het lekker gelag oor julle antwoord in die nommer van 22 Februarie 1991 onder die opskrif “Verkeerde identiteit”.
C. W., Verenigde State