Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g92 3/8 bl. 11-13
  • Die ware Nuwe Wêreld wag om ontdek te word

Video nie beskikbaar nie.

Jammer, die video kon nie laai nie.

  • Die ware Nuwe Wêreld wag om ontdek te word
  • Ontwaak!—1992
  • Onderhofies
  • Soortgelyke materiaal
  • Nog ’n epiese reis
  • ’n Nuwe wêreld wag op ons
  • ’n Nuwe wêreld op die horison
  • Die soektog na speserye, goud, bekeerlinge en roem
    Ontwaak!—1992
  • ’n Botsing van kulture
    Ontwaak!—1992
  • Alles sal nuut gemaak word—Soos voorspel is
    Die Wagtoring kondig Jehovah se Koninkryk aan—2000
  • ’n Nuwe wêreld is ophande!
    Die Wagtoring kondig Jehovah se Koninkryk aan—1991
Sien nog
Ontwaak!—1992
g92 3/8 bl. 11-13

Die ware Nuwe Wêreld wag om ontdek te word

“NNAAM is iets onbetroubaars, jy kan nie daarop staatmaak nie!” Hierdie nugter opmerking is waar bewys in die geval van Columbus.

In harmonie met die betekenis van sy voornaam, Christophorus, het Columbus probeer om ’n soort “Christusdraer” te wees. Die Spaanse heersers het hom per slot van rekening in “die diens van God en die uitbreiding van die Katolieke geloof” uitgestuur. Maar nadat hy ’n paar van die begriplose inboorlinge geleer het om die teken van die kruis te maak en die Ave Maria te sing, het hy aan tasbaarder belonings aandag geskenk: om goud en die ontwykende roete na Indië te vind.

Sommige Katolieke voer aan dat Columbus nietemin tot ’n “heilige” verklaar moet word as gevolg van die belangrike rol wat hy gespeel het om die grense van die Christendom uit te brei. Maar die massa-“bekerings” wat op sy ontdekkings gevolg het, het min gedoen om die ware Jesus Christus aan die mense van die Nuwe Wêreld bekend te maak. Die ware Christelike godsdiens is nog altyd op vreedsame wyse uitgedra, nie deur die swaard nie. Die gebruik van geweld om die evangelie te verkondig, is ’n growwe weerspreking van dit wat Jesus geleer het.—Vergelyk Mattheüs 10:14; 26:52.

Columbus (Spaans, Colón) het ’n bietjie meer sukses daarmee behaal om sy van, wat “koloniseerder” beteken, gestand te bly. Hy het die eerste twee blanke kolonies in die Nuwe Wêreld gevestig. Hoewel daar niks van gekom het nie, is ander spoedig gevestig. Die kolonisasie van die Amerikas het voortgegaan, maar dit was geensins ’n vreugdevolle gebeurtenis nie, veral nie vir diegene in die nuwe kolonies nie.

Dominikaanse ordebroeder Bartolomé de las Casas, wat gesien het hoe Wes-Indië oorspronklik gekoloniseer is, het beswaar aangeteken by Filips II, koning van Spanje, oor ‘die bespotting van die gereg waaraan hierdie onskuldige mense onderwerp word, wat hulle vernietig en verstrooi sonder oorsaak of rede buiten die hebsug en ambisie wat diegene aanvuur wat sulke bose werke doen’.

Hoewel die ergste misbruike later reggestel is, was selfsugtige beweegredes en wrede metodes steeds aan die orde van die dag. Dit is nie verbasend nie dat sulke heerskappy gehate geraak het. Teen die 20ste eeu het die meeste lande van die Amerikas die koloniale juk afgeskud.

Dit is ongetwyfeld ’n moeilike taak om vastelande tot die Christendom te bekeer en regverdig oor ’n menigte stamme en tale te regeer. En dit sal onbillik wees om Columbus verantwoordelik te hou vir al die mislukkings van die ontsaglike waagstuk wat hy onwetend aangepak het toe hy die oseaan oorgesteek het en begin het wat sommige die “Ontmoeting van Twee Wêrelde” noem.

Soos Kirkpatrick Sale in sy boek The Conquest of Paradise toon: “Daar was vroeër beslis ’n geleentheid, ’n kans vir die mense van Europa om ’n nuwe ankerplek in ’n nuwe land te vind, in ’n land wat hulle vaagweg besef het die Paradys was.” Maar om ’n nuwe wêreld te ontdek, is een ding; om ’n nuwe wêreld te skep, is iets anders. Dit is nie die eerste keer dat pogings misluk het om ’n nuwe wêreld te bou nie.

Nog ’n epiese reis

Tweeduisend jaar voor Columbus vertrek het, het ongeveer tweehonderdduisend mense op ’n ander epiese reis vertrek. Pleks van ’n oseaan oor te steek, het hulle moontlik deur ’n woestyn gereis. Hulle het ook weswaarts beweeg na hulle geboorteland, Israel, wat die meeste nog nooit gesien het nie. Hulle doel was om ’n nuwe wêreld vir hulle en hulle kinders te vestig.

Hulle trek uit Babiloniese gevangenskap was ’n vervulling van profesie. Tweehonderd jaar vantevore het die profeet Jesaja hulle terugkeer na hulle geboorteland voorspel: “Kyk, Ek [die Soewereine Heer Jehovah] skep nuwe hemele en ’n nuwe aarde, en aan die vorige dinge sal nie gedink word en hulle sal in die hart nie opkom nie.”—Jesaja 65:13, 17.

Die ‘nuwe hemele en nuwe aarde’ was beskrywende simboliese terme wat na ’n nuwe regering en ’n nuwe mensegemeenskap verwys. Hierdie dinge was nodig omdat ’n ware nuwe wêreld meer vereis as om ’n nuwe gebied te koloniseer; dit vereis ’n nuwe, onselfsugtige gees onder diegene wat regeer en diegene oor wie daar geregeer word.

Min van die Jode wat uit Babilon teruggekeer het, het so ’n gees gehad. Ten spyte van hulle aanvanklike sukses het die Hebreeuse profeet Maleagi ongeveer honderd jaar ná hulle terugkeer beskryf hoe selfsug en hebsug die oorheersende dryfkrag in die land geword het (Maleagi 2:14, 17; 3:5). ’n Unieke geleentheid om ’n nuwe wêreld vir die Jode te bou, het verlore gegaan.

’n Nuwe wêreld wag op ons

Die mens se onvermoë in die verlede om ’n nuwe wêreld te bou, beteken nietemin nie dat die soektog hopeloos is nie. In die boek Openbaring waar die apostel Johannes die woorde van Jesaja herhaal, word die volgende dramatiese toneel beskryf: “Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan . . . En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”—Openbaring 21:1, 4.

Hierdie woorde gee ons die versekering dat God self vasbeslote is om ’n nuwe regering oor die hele aarde te hê en ’n nuwe mensegemeenskap wat hom aan sy heerskappy sal onderwerp. Die voordele sal ontelbaar wees. Dit sal ’n ware nuwe wêreld wees.

’n Nuwe wêreld wat deur God geskep is, klink dalk vergesog. Maar Columbus se oortuiging dat daar vastelande in die Weste lê, het ook ongelooflik geklink vir baie van sy tydgenote. Die beskrywing van God se beloofde nuwe wêreld klink ook dalk baie onwaarskynlik. Maar hoeveel 15de-eeuse geleerdes sou ooit kon dink dat ’n derde van die aarde se landoppervlakte onbekend vir die wetenskap was?

Die wetenskaplike onkunde van Columbus se dag het die ontdekking van die Nuwe Wêreld hoogs onwaarskynlik laat lyk. Onkunde oor God se voornemens en oor sy krag kan ook afbreuk doen aan die vertroue in sy beloofde nuwe hemel en nuwe aarde. Maar die almagtige God volg sy beskrywing daarvan op deur te sê: “Kyk, Ek maak alles nuut. . . . Skryf, want hierdie woorde is waaragtig en betroubaar.”—Openbaring 21:5.

Die hele mensdom hunker ongetwyfeld na die een of ander nuwe wêreld. Mexikaanse skrywer Carlos Fuentes het eenkeer opgemerk: “Utopia is iets van die verlede en van die toekoms. Enersyds is dit die herinnering aan ’n beter wêreld wat vroeër was en nie meer is nie. Andersyds is dit die hoop dat hierdie beter wêreld, wat regverdiger en vreedsamer sal wees, eendag sal kom.” Bybelstudente is vol vertroue dat ’n beter wêreld—nie ’n denkbeeldige Utopia nie—beslis gaan kom omdat God dit beloof het en omdat God dit tot stand kan bring.—Mattheüs 19:26.

’n Nuwe wêreld op die horison

Toe Columbus sy bemanning probeer oortuig het dat hulle naby die land was, was meer as geloof nodig. Hy het tasbare bewyse nodig gehad. Vars plante wat op die see gedryf het, die landvoëls wat in al hoe groter getalle voorgekom het en eindelik ’n takkie met blomme wat op die water gedryf het, het die matrose se vertroue in hulle admiraal herstel.

Vandag is daar ook sigbare bewys dat ons voor ’n nuwe wêreld staan. Die feit dat die mensdom se voortbestaan vir die eerste keer in die geskiedenis bedreig word, herinner ons daaraan dat God se geduld met menseheerskappy al byna op moet wees. Hy het lank gelede belowe om “die verderwers van die aarde te verderf” (Openbaring 11:18). Hebsug en selfsug het wêreldwyd ’n magdom onoplosbare probleme opgelewer, probleme wat die Bybel duidelik vooruit beskryf het as verwikkelinge wat ’n aanduiding is dat God binnekort gaan ingryp.a

Toe Columbus vyfhonderd jaar gelede die eerste keer op die eiland Kuba voet aan wal gesit het, het hy glo uitgeroep: “Ek sal graag vir ewig hier wil bly!” Diegene wat in God se nuwe wêreld ingaan, sal net so voel. En hierdie keer sal so ’n wens bewaarheid word.

[Voetnoot]

a Sien die boek Jy kan vir ewig in die Paradys op aarde lewe, hoofstuk 18, wat deur die Watchtower Bible and Tract Society of New York, Inc. uitgegee word, vir ’n bespreking van die skriftuurlike bewyse dat God se nuwe wêreld vinnig nader kom.

[Prent op bladsy 13]

Om ’n nuwe wêreld te ontdek, is een ding; om ’n nuwe wêreld te skep, is iets anders

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel