Wat beteken Paasfees vir jou?

DIT is 8:30 in die aand. In ’n somber 300 jaar oue kerk in noordelike Afrika is ongeveer 20 diakens in wit gewade besig om eentonig te sing-praat en op hulle tromme te slaan. Uit die reukvat versprei die geur van wierook. Nou sluit ’n groep priesters by die seremonie aan en lees die Bybel in Geez, ’n antieke liturgiese taal. Aanbidders luister. Net ’n paar van die aanwesiges verstaan die woorde. Die ritueel hou aan tot drie-uur in die oggend.

In die Vatikaanstad hou die pous ’n spesiale Mis. Vir hierdie buitengewone byeenkoms bestaan sy gehoor uit die Vatikaan se volle diplomatieke liggaam, asook honderde kardinaals, prelate, priesters, nonne en duisende pelgrims.

Aan die ander kant van die Atlantiese Oseaan, in die stad New York, het die polisie versperrings aangebring om te voorkom dat voertuie die glansryke Fifth Avenue binnegaan. ’n Optog van elegant geklede New Yorkers—mans met pluiskeile en swaelstertpakke en vroue wat swierige hoede dra—beweeg in kleurryke swier met die laan af.

Wat is die geleentheid? Die viering van Paasfees. Oor die hele wêreld is daar mense wat hierdie godsdiensviering hoog ag. Party het dit al die koningin van feeste en festum festorum genoem—Latyn vir “fees der feeste”.

Hoe belangrik is dit vir jou?

Wat dink jy van Paasfees? Weet jy waarom dit gevier word? Baie mense weet nie. ’n Opname wat in Brittanje gemaak is, het getoon dat 1 uit elke 3 Britte nie weet waarom Paasfees gehou word nie. Tog bly Paasfees in Brittanje, sowel as in die meeste ander lande in die wêreld, die Christendom se belangrikste godsdiensviering.

Volgens The New Encyclopædia Britannica is Paasfees die “vernaamste fees van die Christelike Kerkjaar omdat dit die viering is van Jesus Christus se Opstanding op die derde dag na sy Kruisiging”. Die boek Easter—Its Story and Meaning verduidelik dat Paasfees die “grootste fees van die Christelike Jaar [is] en dat dit met die grootste vreugde gevier word omdat dit ’n soortgelyke opstanding belowe vir almal wat die Geloof van Christus aangeneem het”. Is die viering van Paasfees vir jou so ’n ernstige saak? Glo jy werklik dat Paasfees iets te doen het met jou vooruitsigte op lewe in die toekoms?

Baie mense het nie so ’n eerbiedige beskouing van Paasfees nie. ’n Koerant het kommentaar gelewer op die kommersialisering van Paasfees en dit “Die grootste verhaal wat nog ooit verkoop is”, genoem. Dit het bygevoeg: “Speelgoedvervaardigers sê dat Paasfees, die belangrikste Christelike vakansiedag, die tweede grootste vakansiedag geword het om geskenke te gee.” Die grootste is natuurlik Kersfees, en party kerkbeamptes meen dat die verwêreldliking van Paasfees dieselfde patroon as die verwêreldliking van Kersfees volg.

Lekkergoedvervaardigers in die Verenigde State het hulle byvoorbeeld gereedgemaak vir beraamde verkope van R2,2 miljard gedurende die 1989-Paasseisoen. Naas Kersfees is dit die grootste lekkergoedseisoen in die Verenigde State. Een maatskappy vervaardig meer as honderd soorte Paashase.

Volgens The Detroit News het Jack Santino, professor in volksoorleweringe en volkskultuur aan die Bowling Green-staatsuniversiteit in Ohio, erken dat die verwêreldliking van Paasfees ‘“tipies” is van vandag se verbruikersgeoriënteerde samelewing’. Die koerant het bygevoeg dat die aandag tydens “Paasfees op die [Paas]-haas—en nie op die opstanding nie—toegespits word”.

Net nog ’n vakansiedag

In die Noordelike Halfrond lui Paasfees die begin van die lente in en gaan dit gewoonlik gepaard met ’n week se skool- en universiteitsvakansie. Waar moontlik, stroom baie jongmense dus na oorde met ’n warm klimaat vir wilde strandpartytjies. Ander beskou Paasfees bloot as die einde van die skiseisoen—hulle laaste geleentheid om die skihange te geniet.

In Noorweë, waar byna 88 persent van die bevolking aan die Evangelies-Lutherse staatskerk behoort, het slegs 14 persent van die mense onder wie ’n opname onlangs gedoen is, gesê dat hulle dit sal oorweeg om op Paasfees kerk toe te gaan. Ongeveer 75 persent het erken dat hulle Paasfees nie meer as ’n gewyde vakansiedag beskou nie. Hulle het gesê dat hulle eerder sal gaan ski.

Vir baie mense het party van die belangrike embleme van Paasfees simbole van pret en jolyt geword. In baie lande is die eier waarskynlik die gewildste Paassimbool. Die simboliek van die eier is baie godsdienstig. Die opstanding van Jesus Christus word glo verteenwoordig deur die nuwe lewe wat uit ’n skynbaar lewelose eier kom. Gevolglik is die gebruik om eiers met aantreklike kleure en patrone te versier ’n belangrike kenmerk van die Paasviering.

Maar vir party mense is die vernaamste waarde van die Paaseier om kinders te vermaak. In een dorp eindig die tradisionele gesoek na Paaseiers by die plaaslike kerk in ’n eiergeveg! “Vir kinders”, sê Robert J. Myers in sy boek Celebrations, “beteken Paasfees pret, verrassings en waarskynlik genoeg snoepgoed en lekkers tot Allerheiligeaand [Halloween]!”

In teorie neem Paasfees nog die vernaamste plek onder die Christendom se gewyde vakansiedae in. In die praktyk wil dit egter voorkom asof dit vir al hoe meer mense van min belang is, maar net nog ’n vakansiedag. Wat van jou? Wat beteken Paasfees vir jou? Maar voordat jy hierdie vraag beantwoord, moet jy eers vra: ‘Wat beteken Paasfees vir God? Dra die viering sy goedkeuring weg? Word dit werklik van Christene verwag om Paasfees te vier?’

[Lokteks op bladsy 4]

Embleme van Paasfees het simbole van pret en jolyt geword