“Duiwelshonde”?

VEG-BULTERRIËR-AANVALLE het die afgelope paar jaar groot opspraak verwek in Kanada, Engeland en die Verenigde State. Die Amerikaanse Sentrums vir Siektebeheer berig dat veg-bulterriërs betrokke was by 42 persent van die 157 bevestigde noodlottige hondeaanvalle wat tussen 1979 en 1988 in die Verenigde State voorgekom het. In Brittanje het die media wrede veg-bulterriërs as “duiwelshonde” bestempel. Die tydskrif Equinox noem die hond “’n uitnemende moordmasjien”.

Die veg-bulterriër word in hondegevegte, ’n onwettige, bloedige sport, beskou as “die Cadillac van moordhonde” vanweë sy krag, ratsheid, taaiheid en wreedheid. The Globe and Mail van Toronto, Kanada, sê dat ‘die veg-bulterriër geteel word om ander honde dood te maak’.

“Sy ystersterk kake kan ander diere sowel as mense, veral kinders wat nie in staat is om hulself te verdedig nie, ontsettende skade toebring”, sê The Toronto Star. Die geval van ’n negejarige dogtertjie wat plastiese chirurgie wat vyf uur geduur het aan haar gesig moes ondergaan nadat sy deur ’n veg-bulterriër aangeval is, is maar net een van die grusame verslae. Een 13-jarige moes vir bytwonde aan die gesig, bolyf, bene, lies en sitvlak behandel word. Toe ’n 21-jarige model haar vriend se veg-bulterriër wou soen, het die hond haar gebyt en moes sy 70 steke in haar erg verskeurde gesig kry. In Engeland het twee van hierdie “duiwelshonde” ’n 54-jarige man aangeval en sy neus afgebyt.

Kathleen Hunter, die besturende direkteur van die Humanitêre Vereniging in Toronto, was voorheen van mening dat die veg-bulterriër met die regte afrigting net soos enige ander troetelhond kan wees. Nou erken sy egter dat “’n veg-bulterriër ’n genetiese kode het wat dit ’n uiters onvoorspelbare dier maak. Dit is werklik ’n aggressiewe hond . . . , wat geteel word om sonder meer aan te val.”a Jim Bandow, hoofbestuurder van die dierebeheertak van die Openbare Gesondheidsdepartement in Toronto, sê: “Die veg-bulterriër is ’n tydbom. Jy is nooit seker wanneer dit gaan ontplof nie.”

Wetgewers probeer die probleem oplos deur verskeie regulasies in te stel en streng toe te pas. Eienaars van veg-bulterriërs in Edmonton, Kanada, word deur die wet verplig om ’n versekering van minstens R1375 000 teen aanspreeklikheid te hê en lisensiegeld van R275 te betaal. In Winnipeg, Kanada, word geen nuwe veg-bulterriërs binne die stadsgrense toegelaat nie, en eienaars moet hulle honde vasmaak en muilband en bewys kan lewer dat hulle versekering van R825 000 teen aanspreeklikheid het. In Brittanje het die parlement ’n wetsontwerp met soortgelyke verpligtinge vir eienaars van veg-bulterriërs aangeneem. Oortreding kan ’n boete en tronkstraf tot gevolg hê.

Volgens God se Wet aan eertydse Israel moes gevaarlike diere opgepas word. As ’n gevaarlike dier toegelaat is om los rond te loop, was die eienaar ook aanspreeklik vir die skade wat dit aangerig het. Indien die dier iemand doodgemaak het, was die eienaar bloedskuldig en kon dit sy lewe beteken het (Exodus 21:29). In die lig van wat God se Wet sê, sal dit dus vir Christene verstandig wees om die nodige maatreëls te tref om aggressiewe, onvoorspelbare honde onder beheer te hou of te besluit om hulle glad nie aan te hou nie.

[Voetnoot]