Van ons lesers
Veg-bulterriërs Ek het ’n veg-bulterriër gehad, en sy was die liefste en vriendelikste hond wat ek nog gehad het. Daarom het die opskrif van die artikel “‘Duiwelshonde’?” my omgekrap (22 Mei 1992). Hierdie opskrif gee ’n mens die idee dat alle veg-bulterriërs met Satan en bose dinge verband hou. Nou kan dit ander omkrap bloot as iemand ’n veg-bulterriër besit. Maar ek stem saam dat mense voorsorg moet tref as hulle daaraan dink om so ’n hond te kry. Ek sal aanbeveel dat hulle meer oor die agtergrond van die hond en sy ma en pa moet uitvind. Vind ook uit of die hond goed versorg is. Indien wel, sal hy heel waarskynlik saggeaard wees.
L. H., Verenigde State
Ons opskrif is bloot ’n aanhaling uit die Britse pers, wat hierdie benaming al dikwels vir die onvoorspelbare veg-bulterriër gebruik het. Ons het nie bedoel dat hierdie honde satanies van aard is of gesê dat dit verkeerd is om hulle te besit nie. Maar met die oog op die werklike gevaar wat veg-bulterriërs kan inhou, het ons die eienaars van veg-bulterriërs aangespoor om ekstra voorsorg te tref om sulke diere onder beheer te hou.—RED.
Stryd om te lewe Noudat ek die artikel “My stryd om te lewe” gelees het, wil ek graag vir Hans Augustin en sy vrou dankie sê (22 April 1992). Ek wil hulle bedank vir hulle moed en hulle voorbeeld van getrouheid aan Jehovah ten spyte van lyding. Ek is persoonlik goed bekend met die soort ondervinding wat hulle deurmaak, en ek dink dikwels aan hulle en bid vir hulle.
A. Y., Frankryk
Ek het die artikel so pas gelees, en die trane loop oor my wange. Sulke artikels toon dat ons talle wonderlike Christenbroers en -susters oor die hele wêreld het wat in die geloof bly vasstaan al moet hulle soveel verduur. Dit help ons ook om te onthou dat dit, hetsy ons probleme groot of klein is, die belangrikste is om voortdurend te dink aan die tyd wanneer al hierdie slegte ondervindinge nie eers in ons gedagtes sal opkom nie.
R. T., Verenigde State
Wees anders Dankie vir die artikel “Jongmense vra . . . Waarom moet ek anders wees?” (8 Junie 1992). Ek is ’n 18-jarige Christen en ek moet erken dat dit werklik moeilik is om anders as ander jongmense te wees. Wanneer hulle vra: “Waarom trek jy nie soos ons aan nie?” of “Waarom kom jy nie na hierdie dans toe nie?” ensovoorts, verg dit moed om hulle te antwoord en ’n verduideliking te kan gee. Maar met die hulp van Jehovah en die Ontwaak!-tydskrif kon ek dit doen. Dankie dat julle vir ons omgee!
H. O. N., Brasilië
Kakkerlakke Die artikel “Die taai kakkerlak” was baie interessant (22 Januarie 1992). My gesin het die wenke toegepas, en sedertdien is la cucaracha nog nie weer in ons huis gesien nie.
B. H., Verenigde State
Ek het kakkerlakke ongeveer drie jaar gelede op skool bestudeer. Maar ek het hulle nooit as nuttig beskou nie. Dit het my verbaas om uit te vind dat kakkerlakke, wat gewoonlik as vyande beskou word, enigsins nuttig kan wees. Nou verstaan ek ook waarom dit so moeilik is om hulle uit te roei, selfs met plaagdoders.
E. A., Nigerië
Dit verbaas my dat julle nie boorsuur as ’n “oplossing” vir ’n kakkerlakprobleem genoem het nie. Ons het dit al by die huis gebruik en dit werk!
S. D., Verenigde State
Navorsers waarsku dat boorsuur ernstige gesondheidsgevare vir babas en kinders kan inhou. Sien “Van ons lesers” in die “Ontwaak!” van 22 Februarie 1985.—RED.