Geniet ’n Mexikaanse taco
Deur Ontwaak!-medewerker in Mexiko
WAT is ’n taco? In die Spaanssprekende wêreld kan dit baie dinge beteken. In Spanje kan dit selfs ’n vloekwoord beteken! Maar in Mexiko en Noord-Amerika verwys dit na kos. Hoe lyk dit? Hoe smaak dit?
Dit is ’n soort toebroodjie wat gemaak word van ’n dun tortilla, ’n plat ronde stuk deeg wat van mieliemeel gemaak word. Dit word om ’n verskeidenheid vulsels gerol en word soms gebak. Daar is ook tortillas wat van koringmeelblom gemaak word. In Mexiko is tortillas so belangrik dat ’n ware mexicano hom nie eers ’n maaltyd daarsonder kan voorstel nie.
Die Mexikaanse dagblad El Universal het onlangs ’n artikel gepubliseer met die opskrif: “Tacos: ’n Luukseartikel.” Dit het onder andere gesê: “Ons behoort onsself tacomexicanos te noem, aangesien dit ongetwyfeld ons geliefkoosde kos is.” Maar party tacos raak so duur dat hulle vir baie Mexikaners ’n luukse is. En tog is dit die “daaglikse brood” van messelaars, fabriekswerkers, arbeiders en bergklimmers wat meen dat hulle nie daarsonder kan lewe nie. Dit is interessant om messelaars dop te hou terwyl hulle hul middagete eet. Hulle steek ’n vuurtjie aan en maak die tacos warm op ’n comal, of plat erdebak—en hoe lekker smaak dit tog nie!
Tacos is nie so duur wanneer hulle tuis gemaak word nie. Jy kan ’n tortilla opvul met omtrent enigiets wat eetbaar is: gebraaide boontjies, kaas, vleis, aartappels, rys, varkvleis, hoender, ensovoorts. Hulle kan baie eenvoudig of baie ingewikkeld wees, maar hulle is ’n bevredigende, ligte maaltyd ongeag hoe jy hulle voorberei.
Die gewildste tacos
In die Yucatán-skiereiland berei hulle ’n dis voor wat cochinita pibil genoem word. Hulle slag ’n klein varkie, maak hom deeglik skoon, gooi ’n spesery oor hom wat achiote genoem word en braai hom dan. Die vleis is heerlik sag en het ’n unieke smaak. Die cochinita pibil tacos is gewild oor die hele Mexiko en word verkoop so vinnig as wat hulle voorberei kan word.
Tacos kan gewoonweg geëet word, of dit kan gebak word. Gebruik warm varkvet of olie vir ’n baie bros taco. Doop die tacos net lank genoeg in die olie tot hulle bruin word, verwyder en dreineer hulle dan. As jy wil, kan jy nou jou skerp sous en suurroom byvoeg. Dit is ongetwyfeld lekker!
Die gewildste tacos in Mexikostad is die biefstuk-tacos wat oor houtskool gebraai word. As jy hulle tuis wil voorberei, moet jy biefstukke van ongeveer 110 gram kry, ’n bietjie suurlemoensap en peper daaroor sprinkel en hulle dan op ’n houtskoolrooster sit. Plaas ook ’n paar groenuie op die rooster. Wanneer jy sap op die biefstukke sien, moet jy sout (uiesout as jy dit verkies) daaroor sprinkel en hulle dan omdraai. Maak intussen twee tortillas warm. Wanneer die vleis goed gaar is, moet jy dit tussen die twee tortillas sit en heelwat rooi of groen skerp sous en ’n paar van die groenuie daaroor gooi. Daar het jy nou ’n ligte maaltyd wat baie smaaklik kan wees. Dieselfde metode kan gebruik word vir die fajitas, wat dun repies vleis is.
Jy móét net eenvoudig die carnitas tacos probeer. Varkvleis word in klein stukkies gesny en in sy eie vet in ’n diep koperketel gebraai. ’n Sout wat sal-tierra genoem word, word by die vleis gevoeg om dit ’n rooierige kleur te gee. Dít en gebraaide lamsvleis is die belangrikste dinge vir pieknieks. Waarom? Wel, in Mexikostad is daar ongeveer 18 miljoen mense, en die stad word omring deur klein dorpies wat in die berge is. Elke naweek gaan duisende gesinne dus na die berge toe, en in plaas daarvan om hulle eie tuisgemaakte kos saam te neem, koop hulle hul vleis, baie tortillas, kaas, groente soos nopales (sagte turksvykaktus) en bronkors. Koljander en ander bestanddele word gebruik om ’n heerlike skerp sous te maak. Hulle eet vrugte vir nagereg.
Wanneer jy weer haastig is, moet jy onthou dat Mexikaanse tacos binne ’n paar minute voorberei kan word. Hoe lyk dit dus met ’n Mexikaanse taco? Jy sal dit geniet!