Death Metal—Wat is die boodskap?
’N JONG man met ’n wilde blik in sy oë en met lang hare staan voor ’n toejuigende, dreunsingende gehoor bewonderaars. Hy neem ’n emmervol dierebloed en -ingewande en gooi dit oor die eerste paar rye uit. Die bewonderaars lag, vryf die goed aan hulle en gooi mekaar met stukke daarvan. Volgens Florida se St. Petersburg Times het hierdie toneel hom afgespeel by ’n rockkonsert van ’n groep genaamd Deicide, wat ‘die slagting van ’n god’ beteken. Hierdie soort musiek word death metal genoem, na bewering die uiterste vorm van heavy metal-rock. Sedert die sukses van ’n album met die titel Scream Bloody Gore deur die groep Death het heavy metal-rock in onlangse jare in Florida en oor die hele wêreld baie gewild geword.
Die leier van die groep Deicide is ’n verklaarde Satanis wat beweer dat hy God haat sedert hy ’n litteken in die vorm van ’n J, wat hy meen vir Jesus of Jehovah staan, van ’n motorongeluk oorgehou het. Hy beweer dat hy stemme hoor wat hom aanspoor om selfmoord te pleeg, en hy het ’n sataniese simbool op sy voorkop laat inbrand.
Selfs die vernamer heavy metal-groepe dra boodskappe oor wat net so bizar is. Die tydskrif Time het berig dat daar in drie dae meer as 1,5 miljoen eksemplare van die twee plate-albums van die heavy metal-groep Guns N’ Roses verkoop is. Die albums is egter ’n voortsetting van wat Time bestempel as die groep se “onverbiddelik seksistiese en onversetlik gewelddadige lirieke” en “hulle gehamer op vreemdelingehaat, rassisme en sadomasochisme”. Hulle lirieke dek onderwerpe soos orale seks, moord en is deurtrek van vloekwoorde. Verskeie kettingwinkels het geweier om die plate te verkoop.
Heavy metal-rock sowel as sommige rap-musiek word in die laaste tyd meer en meer gekritiseer—en nie net deur godsdiensfundamentaliste en aartskonserwatiewe politieke partye nie; die Amerikaanse Mediese Vereniging (AMA) en die Amerikaanse Akademie vir Pediatrie het ook opgekom teen die onderliggende gevare van die lirieke in albei musieksoorte. Volgens die tydskrif American Health het die AMA gesê: “Die boodskappe wat deur sekere soorte rockmusiek oorgedra word, kan ’n wesenlike bedreiging vir die fisiese gesondheid en emosionele welsyn van besonder kwetsbare kinders en adolessente inhou.”
Is hierdie soorte musiek regtig gevaarlik? Wel, beskou die ses algemene rap- en heavy metal-temas wat die AMA as potensieel gevaarlik beskou: dwelm- en alkoholmisbruik, selfmoord, geweld, Satanaanbidding, seksuele uitbuiting en rassisme. Kan sulke temas opbouend wees?—Vergelyk Spreuke 6:27, 28; Filippense 4:8.