Vigs in Afrika—’n Waarskuwing aan die wêreld!
“INDIEN jy, en elkeen van jou minnaars, 6 jaar lank 1 minnaar per jaar het, sal jy in werklikheid met 45000 mense seksuele kontak gehad het.” Hierdie eenvoudige berekening deur dr. K. E. Sapire wat in die Suid-Afrikaanse tydskrif Continuing Medical Education aangehaal word, lig toe watter geweldige moontlikheid van vigs-besmetting daar vir promiskue mense bestaan.
Waarom dan die aandag op Afrika vestig?
Omdat wat daar gebeur ’n waarskuwing aan die wêreld is. Afrika is nie die enigste plek waar promiskuïteit alledaags is nie. Dit is ’n wêreldwye verskynsel. “Uiteindelik”, sê vigs-deskundige, dr. Dennis Sifris, “is elke seksueel aktiewe persoon in die wêreld wat meer as een maat het moontlik in gevaar.” Die tydskrif U.S.News & World Report sê eweneens dat volgens die hedendaagse standaarde selfs “die huwelik nie heteroseksualiteit—of selfs getrouheid aan die huweliksmaat—kan waarborg nie en dus glad nie die volmaakte beskerming teen vigs is nie”.
Die tydskrif African Affairs waarsku dus om goeie redes: “Die epidemie kan elders herhaal word.” Al die tekens is daar dat die krisis in Afrika hom reeds in baie ander dele van die wêreld begin herhaal.
Die tydskrif Newsweek berig dat daar in Brasilië byvoorbeeld “toenemende getalle heteroseksuele is wat vigs van hulle besmette minnaars gekry het”. Die gesondheidsdepartement van daardie land skat dat ’n halfmiljoen reeds HIV-positief is. “As niks gedoen word nie”, sê dr. Carlos Alberto Morais de Sá, hoof van vigs-navorsing by Rio de Janeiro se Gaffrée e Guinle-universiteitshospitaal, “lê ’n openbare gesondheidsramp vir ons voor.”
Die Verenigde State word ook bedreig. “Hoewel die aantal heteroseksuele vigs-gevalle betreklik klein is”, berig die tydskrif Time, “het dit verlede jaar [1990] met 40% toegeneem, vinniger as enige ander groep.” Die week nadat daar onthul is dat die beroemde atleet, Magic Johnson, vigs deur heteroseksuele kontak opgedoen het, was die telefone van mediese dienste baie besig weens paniekbevange mense wat meer inligting oor die siekte wou hê.
Toestande in Asië dui ook op ’n naderende ramp. In daardie deel van die wêreld het diegene wat HIV-positief is van feitlik niemand in 1988 tot meer as ’n miljoen vandag toegeneem! “In vergelyking daarmee sal infeksievlakke in Afrika redelik lyk”, voorspel dr. Jim McDermott, wat verslag gedoen het ná ’n feitesending na Asië. Hy voeg by: “Ek is oortuig dat Asië die plek sal wees met die meeste slagoffers van ’n wêreldwye vigs-epidemie.”
Dit sal sinloos en vergeefs wees om enige besondere vasteland of volk te blameer vir die ontstaan en verspreiding van vigs. Dr. June Osborn, dekaan van die skool van openbare gesondheid by die Michigan-universiteit, VSA, het dit ronduit gestel: “Dis nie wie jy is nie, maar wat jy doen.”
Sal vigs oral aanhou verwoesting saai? Is daar ’n oplossing of sal vigs uiteindelik groot gebiede op die vasteland van Afrika en ander dele van die wêreld ontvolk?
[Foto-erkenning op bladsy 8]
WHO photo by H. Anenden; background: NASA photo