Vigs—Hoe gaan dit eindig?
“EK IS heeltemal oortuig dat ons binne hierdie dekade ’n entstof sal hê.”—Jorg Eichberg, hoof van die entstof-navorsing by die Wyeth-Ayerst-navorsingsentrum, Philadelphia, VSA.
Stel jou voor dat daar ’n geneesmiddel vir vigs, of selfs ’n entstof daarteen, gevind word. Hoe wonderlik sal dit nie wees nie! Die soeke na so ’n geneesmiddel was ongetwyfeld die belangrikste in die gedagtes van die 9000 vigs-spesialiste wat verlede jaar in Florence, Italië, vergader het vir die tema “Die wetenskap daag vigs uit”.
Omdat daar tans 9 uit 10 mense in die ontwikkelende lande met vigs besmet word, verkeer mense onder druk om ’n doeltreffende oplossing te vind. Volgens die tydskrif New Scientist het baie nietemin by die Florence-konferensie blykbaar “hulle gevoel van dringendheid verloor”. “Miskien”, doen die tydskrif aan die hand, is die ramp so oorweldigend dat baie “eenvoudig moed opgegee het met die probleem”.
Die harde werklikheid is dat wetenskaplikes hulle teen meer vrae as antwoorde vasloop. Die New Scientist verduidelik dat “die probleme waarmee viroloë en immunoloë te kampe het ná 10 jaar van die epidemie amper groter as ooit lyk”. ’n Britse dokter wat vigs-pasiënte behandel, Ian Weller, het gewaarsku: “Die allerbeste genesende behandeling teen virusse bestaan nog lank nie.”
Maar al raak ’n entstof teen vigs verkrygbaar, binne hoeveel se bereik sal dit wees? Dr. Dennis Sifris, ’n dokter wat die werklikheid daarvan om in Afrika te werk persoonlik ervaar het, verduidelik: “Ons het ’n baie doeltreffende entstof teen TB [tuberkulose] sodat TB veronderstel is om uitgeroei te wees [soos ook] masels en hepatitis B. Tog is daardie drie siektes . . . vandag vername doders in Afrika. Al word ’n entstof derhalwe ontwikkel, is dit ’n groot probleem om dit binne mense se bereik te kry.”
Met min hoop op ’n geneesmiddel is Afrika se enigste keuse dat mense oorreed word om hulle seksuele gedrag te verander. Maar die vraag is—hoe?
Die normale reaksie
Die normale reaksie op die oplossing van vigs in Afrika is om kondome, kondome en meer kondome uit te deel. Vragmotorbestuurders kry hulle gratis by grensposte. Koerante deel koeverte uit met ’n kondoom in. Klinieke en gesondheidswerkers hou miljoene daarvan in voorraad.
Hoewel sulke maatreëls moontlik ’n effense uitwerking op die verspreiding van vigs kan hê, is hulle nie sonder hulle probleme nie—veral in Afrika. Gesondheidswerker Stefan van der Borght van Medecins Sans Frontieres in Angola het verduidelik dat dit goed lyk as jy driemiljoen kondome uitdeel. Maar dit beteken dat een en ’n halfmiljoen mans slegs twee keer geslagsomgang kan hê voordat die voorraad opraak.
Maar behalwe dat dit moeilik is om die verspreiding van kondome te organiseer, watter uitwerking het die onoordeelkundige verspreiding daarvan op promiskuïteit—wat juis die oorsaak van vigs in Afrika is? Al die tekens toon dat sulke maatreëls seksuele aktiwiteit aanspoor pleks van dit te keer. Selfs regeringsowerhede begin dit besef. Een Afrikaland het reeds opdrag gegee dat sy media, wat onder staatsbeheer is, kondoomadvertensies verwyder omdat dit mense tot promiskuïteit aanspoor. Skrywer Keith Edelston neem dit ’n stap verder in sy boek AIDS—Countdown to Doomsday: “Weens die risiko’s . . . wat met die gebruik van kondome gepaardgaan, is dit nogal duidelik dat streng monogamie die enigste manier is om heeltemal veilig te wees.”
Maar is ’n terugkeer na monogame sedelikheid binne die huweliksverbintenis ’n realistiese keuse?
Die einde van vigs
“As mense môre ophou rondslaap”, sê professor Reuben Sher, ’n vigs-deskundige in Afrika, “sal die virus uitsterf. Die mense wat dit het, sal sterf en dit sal die einde van die virus wees.” ’n Hoofartikel in The Star, ’n koerant wat in Johannesburg gepubliseer word, sê eweneens dat “dit vir iemand wat nie rondslaap, hom nie met iemand anders se naald inspuit of nie bloedoortappings kry nie baie moeilik is om die [HIV]-virus te kry”.
Op hierdie oomblik vermy meer as 450 000 Getuies van Jehovah in Afrika juis hierdie dinge. Hulle glo vas dat sedelikheid wat op die Bybel gebaseer is die moeite werd is. Beskou hulle redenering: Aangesien die Skepper, Jehovah God, mense gemaak het, is dit logies dat dit die moeite werd is om op sy gedragswette vir mense te let. Die beginsel wat in Hebreërs 13:4 opgeteken is, is ’n goeie voorbeeld: “Laat die huwelik in alle opsigte eerbaar wees en die bed onbesmet.” Pleks dat hulle voel hulle is van hulle plesier ontneem, het diegene wat sulke tekste toepas hulleself baie fisiese en emosionele trauma gespaar.—Vergelyk Handelinge 15:29; 2 Korinthiërs 7:1; Efesiërs 5:3-5.
Die media het interessant genoeg al dikwels iets gunstigs oor die sedes van Jehovah se Getuies in Afrika gesê: “[Hulle] het getoon . . . dat hulle ordentlike, ordeliewende burgers is wat volgens ’n hoë sedelike gedragskode leef”, het die Daily Telegraph van Londen, Engeland, gesê. Dit het bygevoeg: “Die promiskuïteit en veelwywery wat kenmerkend van die samelewing in Afrika is, is eenvoudig iets ondenkbaars onder die Getuies.” Die skrywer van die boek Contemporary Transformations of Religion, Bryan Wilson, sê eweneens dat “die Getuies in die samelewing van Afrika . . . uitsonderlike mense word” en dat “die uitwerking van [hulle] . . . sedelike gedragskode duidelik onder hulle gesien kan word”.
Dit beteken nie dat Jehovah se Getuies heeltemal teen die gevolge van vigs beskerm word nie. Sommige is deur ’n huweliksmaat besmet wat nie by dieselfde Christelike beginsels as hulle bly nie, en ander het die siekte gekry voor hulle Getuies geword het. ’n Paar het ook verkies om weer in die losbandige weë van die hedendaagse wêreld te verval, en ’n klompie van hulle het vigs gekry as deel van die gevolge van hulle weë (Galasiërs 6:7). Maar die voorreg om in die Christengemeente te bly, is ook weggeneem van diegene wat opsetlik ’n onsedelike lewenswyse volg (1 Korinthiërs 5:13; 6:9, 10). Maar die oorgrote meerderheid van die meer as viermiljoen Getuies van Jehovah oor die hele wêreld geniet fisiese, emosionele en geestelike welstand omdat hulle by die sedelike beginsels van die Skepper bly.
Gelukkig toon die Bybel dat ’n blywende oplossing vir plae soos vigs in sig is (Openbaring 21:1-4). Jehovah God belowe ’n nuwe wêreld waaruit al die onsedelike oorsake van siektes soos vigs heeltemal verwyder sal word. Daar sal nie iets soos ’n onskuldige slagoffer wees nie, want iedereen sal ’n regverdige, gesonde lewenswyse volg wat ware geluk in die hand werk.—Jesaja 11:9; 2 Petrus 3:13.
[Lokteks op bladsy 9]
“Ons hoef nie miljarde aan navorsing en ontwikkeling te spandeer nie . . . Ons moet terugkeer na sedelikheid.”—Dr. Mark Hendricks, Suid-Afrikaanse immunoloog
[Prent op bladsy 9]
Streng monogamie is ’n belangrike manier waarop die vigs-plaag vermy kan word
[Prent op bladsy 10]
God belowe ’n nuwe wêreld wat heeltemal vry van siektes soos vigs gaan wees