Oseane vol probleme

JAARLIKS stort die mens gemiddeld 130 miljoen liter olie in die oseane van die wêreld. Al is daardie syfer ook hoe verstommend, sluit dit nie eers die reusestortings in wat soms voorkom nie, soos die Exxon Valdez-ongeluk in 1989 langs die kus van Alaska, VSA, of die ramp verlede jaar in die Persiese Golf toe ongeveer 160 miljoen liter olie per dag in die see gestroom het!

Maar die mens stort veel meer as net olie in die oseane. In die Noordsee langs die Duitse kus bereik industriële chemikalieë ’n vlak wat volgens deskundiges giftig is. Die verf wat gebruik word om skeepsrompe te beskerm, bevat ’n dodelike bestanddeel, en dit besoedel wat oseanograwe die mikrolaag noem tot sover as 200 kilometer van die kus af. Hierdie uiters belangrike bolaag van die oseaan dien as kweekplek vir ’n massa viseiers en huisves ook die mikro-organismes wat talle seediere se vernaamste voedselbron is.

Suid van Europa het wetenskaplikes gevind dat die Middellandse See se mikrolaag ook vol chemiese besoedelstowwe, olie en rioolvullis is. ’n Besoedelde mikrolaag benadeel veral seesoogdiere, soos walvisse, omdat hulle gereeld moet opkom om asem te haal. Ongeveer 6000 seesoogdiere sterf dus jaarliks in die Middellandse See, hoofsaaklik weens besoedeling. Eenkeer het honderde dolfyne op die strande van die Middellandse See uitgespoel—tot 50 per week net langs die Franse kus. ’n Virus het die sierlike, grasieuse diere aangeval. Besoedeling dra heel moontlik by tot die siekte omdat dit die dolfyne se weerstandsvermoë verswak. Oseanograaf Jean-Michel Cousteau het ’n onheilspellende opmerking gemaak: “As dolfyne weens besoedeling kan sterf, kan ons ook.”

So ’n voorspelling klink dalk verskriklik. Maar dit is so dat besoedeling die mens reeds in talle opsigte aan gevaar blootstel. Reddingswerkers het byvoorbeeld gevind dat besoedeling hulle pogings belemmer het om oorlewendes van ’n vliegramp langs die kus van Newfoundland op te spoor. Dié keer was plastiese vullis die skuldige. Dit was so oor die oseaan rondgestrooi dat reddingspanne nie geweet het of hulle wrakstukke of rommel gesien het nie. Hulle het nooit enige oorlewendes gekry nie.

Dit is ’n hartseer verhaal, nie waar nie? Maar dink net daaraan: As die besoedelingskrisis swaar op die mens rus, hoe moet die Een dan nie voel wat “die seë en alles wat daarin is”, geskep het nie? (Nehemia 9:6). Die tyd moet ongetwyfeld vinnig nader kom wanneer hy ‘die verderwers van die aarde gaan verderf’.—Openbaring 11:18.

[Foto-erkenning op bladsy 31]

Mike Baytoff/Black Star