Van klapperneut tot kaiaar

Deur Ontwaak!-medewerker in Indië

BYNA almal ken die klapperneut. Maar wat is kaiaar? Dit is ’n bonus wat saam met elke klapperneut kom.

’n Harde dop omsluit die heerlike wit klappervleis. ’n Dik, veselagtige omhulsel, wat sommige dalk as blote afval beskou, beskerm die dop. Hier in Suid-Indië, waar klapperneute volop is, word die omhulsels van die neute geskei en tot agt maande lank in water geweek. Hulle word dan met die hand saggeslaan en dan meganies versnipper in pluiserige, goue vesels wat kaiaar, of klapperhaar, genoem word.

Klapperhaar kan verskillende kleure gekleur word. Dit word dan met die hand in drade gedraai en tot klapperhaargare gespin. Handweefgetoue en meganiese weefgetoue omskep klapperhaar in aantreklike deurmatjies, mourzouks (swaar klapperhaarmatte), tapyte, vloermatte en muurpanele.

Daar is wêreldwyd ’n vraag na klapperhaarprodukte, en daar is goeie rede daarvoor. Duursame klapperhaar word nie deur nattigheid bederf nie; dit is bestand teen motte, verrotting en skimmel; dit is vry van statiese elektrisiteit en is brandtraag. Dit is ook uitstekende isolering teen hitte en koue sowel as klank. Verbeel jou—dit alles van ’n eenvoudige dop wat gewoonlik weggegooi word asof dit niks werd is nie!

[Prent op bladsy 16]

Omhulsels word tot agt maande lank in water geweek

[Prente op bladsy 16]

Deurmatte word van gekleurde klapperhaar gemaak