Hoe party geleer het om negatiewe emosies te bowe te kom

ALMAL ondervind soms negatiewe emosies. Party het dalk weens ernstige probleme, soos ernstige siekte, hoë ouderdom of die dood van geliefdes, diepgewortelde negatiewe emosies wat hulle lewe nadelig kan beïnvloed.

Maar daar is selfs onder die laasgemeldes diegene wat geleer het hoe om hierdie emosies onder beheer te kry sodat hulle hulle daaglikse bedrywighede met sukses kan voortsit. Hier volg ’n paar voorbeelde van sulke mense met wie die tydskrif Ontwaak! onderhoude gevoer het.

Janis ontvang mediese behandeling vir ’n siekte wat haar emosies aantas. Maar sy sê: “Ek het gevind dat om my gedagtes te beheers die doeltreffendste manier is om die probleem te bowe te kom. Ek doen dit deur dinge, soos bak- en naaldwerk, vir ander te doen. Ek wend ook ’n spesiale poging aan om na te dink oor aangename herinneringe en toekomstige gebeurtenisse waarna ek uitsien. Weens my siekte is dit nie maklik nie. Soms sou dit makliker wees om in te gee en sleg te voel. Maar die goeie resultate is die moeite werd.”

Ethel se man is na 45 jaar van getroude lewe oorlede. Hoewel Ethel gerou het, kry sy dit reg om haar emosies te beheers. Sy verduidelik: “Ek hou myself besig deur dinge vir ander te doen. Ek geniet dit byvoorbeeld om vir ander van God se voornemens te vertel soos dit in die Bybel aangetref word. Een jong dame was so bly oor die dinge wat sy geleer het dat haar waardering my gehelp het om vreugdevoller te wees. Wanneer ek op die positiewe dinge in die Bybel konsentreer sodat ek ander daarvan kan leer, help dit my om die negatiewe gedagtes uit my verstand te verdryf. Jonger vroue kom ook na my toe met verskeie probleme en wanneer ons praat oor die positiewe dinge wat hulle in hulle lewe kan doen, help dit my ook om negatiewe emosies te bowe te kom.”

Arthur het jare lank ’n besige, bedrywige lewe gelei. Toe moes hy weens ’n ernstige siekte sy sekulêre werk opgee en alle bedrywighede buite die huis beperk. Arthur het maande lank nutteloos en terneergedruk gevoel. Hoe het hy hierdie gevoelens verwerk? “Ek het opgehou om oor die dinge te tob wat ek nie meer kan doen nie. Ek het my aandag toegespits op hoe ek ander kan help om hulself te verbeter en hulle kan bemoedig wanneer hulle terneergedruk is. Aangesien ek by die huis moet bly, gebruik ek die telefoon baie. Toe ek eers begin het om ander te help en te bemoedig, het ek nie tyd gehad om myself te bejammer nie.”

Nita het na ’n reeks krisisse, waaronder die dood van haar man, baie treurig en terneergedruk gevoel. Sy het mettertyd geleer om daardie gevoelens te beheers: “Wanneer ek treurig voel, probeer ek op ’n opbouende wyse daaraan uiting gee. Ek dwing myself om te gaan stap, ’n dierbare vriendin te bel, na musiek te luister of enigiets te doen wat ek weet die depressie sal verlig. Ek behandel myself met medelye net soos ek met ’n goeie vriendin sou doen.”

Mary het al 32 jaar lank ernstige gesondheidsprobleme. Sy verlaat net die huis wanneer sy die dokter moet spreek aangesien sy aan ’n rolstoel vasgekluister is. Hoe kry Mary dit reg om nie deur ontmoediging oorweldig te word nie? Sy verduidelik: “My man ondersteun my baie. Ek lees ook gereeld opbouende leesstof. Ek bel my vriende gereeld, en dikwels neem ek die inisiatief om hulle na my huis toe te nooi. Ek geniet hulle besoeke en gebruik nie daardie geleenthede om te kla of myself te bejammer nie. Ek tob nie oor die negatiewe dinge in my lewe nie, omdat ek so baie positiewe dinge het wat in my guns tel.”

Margaret is van nature ’n realistiese denker. “Wanneer negatiewe gevoelens kop uitsteek”, sê sy, “soek ek die geselskap van ’n positiewe denker op—nie ’n idealis nie—maar iemand wat my goed ken en my aan my suksesse sal herinner en my sal bemoedig.”

Rose Marie het deur die jare heen al vyf groot operasies gehad en sy en haar man het onlangs binne ’n jaar en ’n half sewe van hulle familielede verloor. Die druk hiervan het ongetwyfeld negatiewe emosies veroorsaak. Maar hulle dink nie gedurig oor daardie dinge nie. Hulle word as Getuies van Jehovah bemoedig deur die Bybel se positiewe en bemoedigende hoop van ’n regverdige nuwe wêreld wat ophande is waarin God ‘al die trane van hulle oë sal afvee, en daar geen dood meer sal wees nie; ook droefheid en geween en moeite sal daar nie meer wees nie’. Selfs die dooies sal opgewek word, want soos Jesus gesê het, ‘kom daar ’n uur wanneer almal wat in die grafte is, [die stem van God se Seun] sal hoor en sal uitgaan’.—Openbaring 21:4; Johannes 5:28, 29.

[Prent op bladsy 9]

Janis beheers haar emosies deur dinge vir ander te doen, oor aangename herinneringe na te dink en na toekomstige gebeurtenisse uit te sien