Van ons lesers
Dobbelary Hoewel julle reeks artikels “Dobbelary—Is dit die moeite werd?” (8 Junie 1992) beslis insiggewend en tydig was, is niks oor sportweddery gesê nie. Sportweddery kan, in teenstelling met kaartspel, loterye, dobbelmasjiene, ensovoorts enige tyd, dag of nag, gedoen word. Jy kan dit selfs doen terwyl jy by jou werk is. Hierdie soort dobbelary is glo ’n groter epidemie as die soort wat in julle artikels bespreek is. Sportweddery is nie net ’n verkwisting van geld nie, maar ook van kosbare tyd wat ’n mens saam met jou gesin kan deurbring. Daardie tyd word gebruik om op hoogte van tellings en wedstryduitslae te bly. Sportweddery is gevolglik net nog ’n voorbeeld van die droewige toestand waarin hierdie stelsel van dinge hom bevind.
C. Y., Verenigde State
Dankie dat julle vir ons insae in die lewe van ’n kompulsiewe dobbelaar gebied het. Ek moes die pyn verduur om deur ’n kompulsiewe dobbelaar grootgemaak te word. My moeder was ’n enkelouer met vyf kinders. Sy het elke week ses aande per week bingo gespeel en doen dit tot vandag toe. Dobbelary was altyd die belangrikste ding in haar lewe. Ons het haar gesmeek om tyd saam met ons deur te bring, vir ons ’n maaltyd voor te berei, maar dit was tevergeefs. Sy het haar kinders vir bingo opgeoffer. Dankie dat julle my gehelp het om beter te begryp waarom sy dit gedoen het.
R. E., Verenigde State
Aandklokreëls Ek wil julle graag bedank vir die artikel “Jongmense vra . . . Waarom het ek so ’n streng aandklokreël?” (22 Mei 1992). Ek word binnekort 17, en ek het gedink dit is belaglik dat my ma steeds ’n aandklokreël van 11:00 nm. voorskryf. Ek het ’n paar aande weens nalatigheid laat by die huis gekom en my ma was baie omgekrap! Ek waardeer julle verduideliking dat ouers onrustig en besorg raak oor ons welstand wanneer ons nie betyds tuis is nie. Ek was waarlik selfsugtig om die oorsaak van sulke onnodige kommer te wees.
O. C., Verenigde State
Blokkiesraaisels Ek wil julle graag bedank vir die blokkiesraaisels wat julle in die Ontwaak! publiseer. Ek wens net daar was meer van hulle. Ek bestudeer die Bybel saam met Jehovah se Getuies, maar my man stel nie veel belang nie. Hy lees nie baie nie, en dit is moeilik om iets te kry wat hom aanspoor om dit te doen. Maar hy hou daarvan om julle blokkiesraaisels in te vul! Trouens, ons doen dit saam en vind dat dit ons baie help. Dankie.
E. X. E., Brasilië
Die “Ontwaak!” sal voortgaan om nou en dan blokkiesraaisels te publiseer.—RED.
Maagdelikheid Die artikel “Jongmense vra . . . Waarom moet ek ’n maagd bly?” (22 April 1992) het my baie gehelp. Ek het my maagdelikheid verloor voordat ek getroud is. Selfs al het ek nie destyds Jehovah se wette ten volle geken nie, het dit my gewete geweldig gepla, en ek het emosioneel daaronder gely. Ek het gehuil toe ek die artikel gelees het. Dit was vertroostend om te weet dat ek in God se oë gereinig is. Hoe voordelig sal dit tog wees as jongmense hierdie artikel lees en besluit om maagde te bly! Ek wens ek het dit gedoen.
M. S., Puerto Rico
Heelal Hoe nietig is ons tog voor God! Dit is wat julle in die artikel “Die geheime van die heelal word ontrafel” (22 Maart 1992) getoon het. Die mens se teleskope onthul die geheime van die ontsaglike heelal algaande. Sy ontdekkings bevestig dat iemand wat belangriker en wyser as ons is hierdie raaiselagtige heelal geskep het asook die wette wat dit beheer. Ons moet nederig genoeg wees om dit te erken.
M. R. S., Brasilië