Iets beters as Kersgeskenke

“DIE sesjarige Christopher het vir my gesê, asof dit die natuurlikste ding in die wêreld is, dat hy ‘hoegenaamd niks’ tydens Kersfees kry nie. Maar hy het dit sonder ’n sweempie van teleurstelling gesê. Alexander (8) het hom op ’n soortgelyke manier uitgespreek en gesê: ‘Ons is Jehovah se Getuies.’”

Dit is hoe die Duitse koerant Kölner Stadt-Anzeiger ’n artikel oor ’n gesin begin het wat volgens die koerant “Kersfees ignoreer omdat dit nie Jesus se geboortedag is nie en omdat dit van heidense oorsprong is”. Maar moet Christopher en Alexander nie jammer gekry word nie? Beslis nie, want, soos die artikel gesê het, toon die seuns se speelgoedrakke geensins dat hulle ouers hulle afskeep nie.

Maar party ouers wat ’n bespreking tussen ouers en onderwysers in Suid-Duitsland bygewoon het, het beweer dat kinders van Jehovah se Getuies ongeborge voel omdat hulle nie Kersgeskenke by hulle ouers kry nie. Dit is egter, soos hulle onderwyseres gesê het, nie waar nie. Sy het gesê dat die “kinders van Jehovah se Getuies openlik uiting gee aan hulle gevoelens, goed gebalanseerd is en hulle geloof breedvoerig kan verduidelik, iets wat ander kinders nie kan doen nie”.

Om die waarheid te sê, tienduisende gesinne oor die hele wêreld het Kersgeskenke met iets beters vervang, en hulle stel hulle dit ten doel om die hele jaar lank vir hulle kinders geskenke te gee. Ondervinding het getoon dat dit vir almal ’n bron van vreugde is.

Een voordeel is dat dit talle vrolike geleenthede in die jaar tot gevolg het, en die kinders kan elke afsonderlike geskenk meer waardeer. Nog ’n voordeel is dat die kinders weet dat dit hulle ouers is wat die geskenke uit liefde gee, en hulle waardeer hulle ouers daarvoor. Die ouers bestee nie ’n klomp geld en tyd daaraan net sodat hulle kinders dankbaar teenoor die een of ander denkbeeldige Sinterklaas is of ondankbaar raak en dink dat dit Sinterklaas se plig is om vir hulle geskenke te bring en dat hulle hom geen dank verskuldig is nie.

Die geskenk wat van onskatbare waarde is

Dominik, wat tien is, en Tina, wat ses is, ontvang dikwels klein verrassinkies van hulle ouers af—sjokolade op hulle kussing, ’n pen of notaboekie wat hulle op skool kan gebruik of ’n gepaste speelding waarmee hulle hulle gedurende die wintermaande kan besig hou. Maar wat waardeer hulle die meeste? Hulle ouers antwoord: “Wanneer ons tyd saam met hulle deurbring—soos om byvoorbeeld in die sneeu te speel.”

Baie ander ouers wat Getuies van Jehovah is, stem saam. “In hierdie dol wêreld”, verduidelik Edelgard, “is tyd die belangrikste ding wat ek my kinders kan gee.” En kinders stem saam! Ursula sê haar kinders beskou tyd wat hulle saam tydens gesinsuitstappies deurbring as “die heel beste geskenk”. Selfs die voorsitter van ’n onderwysersvereniging in Duitsland het onlangs gesê dat tyd en geduld die beste Kersgeskenke is wat ouers vir hulle kinders kan gee.

Wanneer ons iets van onsself gee—ons tyd, besorgdheid en aandag—hetsy ons dit vir ons gesin of vir ons vriende gee, is dit ongetwyfeld ’n geskenk wat waarlik van onskatbare waarde is. Dit moet vanselfsprekend wees dat sulke geskenke nie net tot sekere dae van die jaar beperk hoef te word nie.

Vreugdevolle mededeelsaamheid wat bevrediging verskaf

Neem byvoorbeeld gesinne wat Getuies van Jehovah is wat iets beters as die gee van Kersgeskenke geniet. Wilfried en Inge wat in Duitsland woon, het gesê: “Ons gee gewoonlik geskenke net wanneer ons wil, hoewel ons groter geskenke wel beplan.” Dieter en Debora wend eweneens ’n doelbewuste poging aan om die hele jaar deur vir hulle seuntjie geskenke te gee. Hulle verduidelik dat “die geskenk se grootte of waarde nie so belangrik is nie en dat hulle selde groot of duur geskenke gee”.

Baie kinders verwag geskenke tydens die Kerstyd, en gevolglik is dit nie ’n verrassing nie. Helga sê haar “kinders is meer verheug wanneer hulle onverwags geskenke kry as wat hulle is wanneer hulle iets by geleenthede kry wanneer geskenke verwag word”. Natascha, ’n 15-jarige, stem saam dat “dit lekkerder is om ’n onverwagse geskenk te kry wat uit liefde gegee word as een wat volgens gebruik op ’n vasgestelde tyd gegee word”.

Dit is eweneens belangrik om op te let van watter soort geskenke kinders hou. Fortunato, wat ook in Duitsland woon, sê daaromtrent: “Die geskenke wat ons gee, is meestal dinge wat die kinders gesê het hulle graag sal wil hê. Maar ons probeer om dit op ’n onverwagse oomblik te gee. Jy moet hulle vreugde sien!”

Ouers vind ook dat dit kinders opbeur wanneer hulle vir hulle ’n geskenk gee as hulle siek en in die bed is. Ander gee vir hulle kinders geskenke voor skoolvakansies om hulle mee besig te hou. Stefan het byvoorbeeld ’n mikroskoop voor ’n vakansie gekry. “Dit was ’n totale verrassing”, sê sy pa, “en hy het letterlik rondgespring van vreugde.” Geskenke wat spontaan en ongedwonge gegee word, verskaf inderdaad groot vreugde aan die gewer sowel as aan die ontvanger.

Kinders het wel begeertes. Jörg en Ursula verduidelik: “Wanneer ons dogter vir ons sê wat sy graag wil hê, gesels ons met haar daaroor. Is haar wens redelik? Pas dit by haar ouderdom? Het ons plek daarvoor in die huis? As ons dit nie onmiddellik vir haar kan koop nie, hou ons dit ten minste in gedagte en probeer ons om dit later op ’n gepaste geleentheid vir haar te koop.” Dit is natuurlik verstandig om kinders nie te bederf deur aan al hulle grille te voldoen nie, wat hulle sal beroof van die vreugde wat dit kan bring wanneer geskenke ontvang word.

Ouers wat altyddeur gee, leer hulle kinders om ook ’n vreugdevolle gesindheid te toon wanneer hulle iets gee. Die tienjarige Sebastian sê: “Ek hoef nie vir vakansies te wag om my ouers of susters gelukkig te maak nie. Ek hoef net in ’n goeie bui te wees en ’n paar sente in my beursie te hê.”

Gesinne wat Getuies van Jehovah is, vind ook dat geskenke van ’n ander soort baie beter is as die gee van Kersgeskenke. Dit kan vooruitbeplande uitstappies wees, soos om na ’n dieretuin, ’n museum, ’n tentoonstelling of ’n plekkie op die platteland toe te gaan. Hierdie geskenke is opvoedkundig asook waarlik genotvol vir kinders.

Die seëninge van vreugdevolle mededeelsaamheid

Wanneer Bybelbeginsels toegepas word wanneer ons vir ander iets gee, sal ons die druk en frustrasie vermy wat met die gee van Kersgeskenke gepaardgaan. En onthou, wanneer ons van ons tyd en bekwaamhede gee om ander verstandelik en geestelik te versterk en op te bou, is dit ’n geskenk wat kosbaarder is as materiële geskenke. Dit is beter omdat dit gesinsbande versterk, vriendskappe verstewig en die hele jaar lank ware vreugde aan nie net die ontvanger nie, maar veral aan die gewer verskaf.—Handelinge 20:35.

Waarom probeer jy nie dus hierdie jaar ’n ander benadering pleks van die gebruiklike, gedwonge gee van Kersgeskenke nie? Waarom probeer jy nie ’n beter manier nie?

[Venster/Prent op bladsy 12]

Maar sal die kinders dit nie mis nie?

Rebecca, 16, sê: “Ek mis nie Kersfees nie, want ek kry die hele jaar deur geskenke. Ek geniet ’n onverwagse geskenk veel meer as wat ek ’n gedwonge een geniet.”

Tina, 12, sê: “Ek geniet dit werklik om gepaste geskenke te kry, nie op ’n vasgestelde tyd nie, maar enige tyd gedurende die jaar—en nie geskenke waarvoor ek moet dankie sê maar wat ek nie eers werklik wil hê nie.”

Birgit, 15, sê: “Al die geskenke in die wêreld is waardeloos as die gesin probleme het. Dit is waarom ons as ’n gesin baie dinge saam doen.”

Janosch, 12, sê: “As kinders het ons ons ouers lief selfs al gee hulle nie vir ons geskenke nie. Hulle liefde is op sigself ’n groot geskenk.”

[Prent op bladsy 10]

’n Pragtige geskenk—jou tyd!