Ons beskou die wêreld
Skatte wat verdwyn
Gedurende die afgelope 12 jaar het Rusland tot 90 persent van sy kunsskatte soos skilderye en ikone verloor, aldus ’n ondersoekverslag in Moscow News. In 1990 het doeanebeamptes volkskuns, goue munte en godsdiensvoorwerpe gekonfiskeer wat ’n fortuin werd is. Maar dit was net ’n breukdeel—miskien tussen 2 en 5 persent—van al die gesmokkelde goedere. Moscow News beweer dat omtrent 40 smokkelbendes, wat hoofsaaklik in Duitsland en Italië georganiseer word, tans in die land aan die werk is. Hulle laat die waardevolste voorwerpe skoonmaak en restoureer en stuur dit dan weg om in ryk lande verkoop te word.
Uiteindelik verskoon
Pous Johannes-Paulus II het Galileo “plegtig verskoon”. Die Katolieke Kerk het die beroemde fisikus tot nou toe as iemand beskou wat in 1633 “deur die Heilige Inkwisisie veroordeel” is omdat hy daarop aangedring het dat die aarde om die son beweeg. Nou, 360 jaar later, wou die Pous die geskilpunt eens en vir altyd besleg met ’n plegtige toespraak voor die Pouslike Akademie vir Wetenskappe. Maar volgens die Italiaanse koerant Corriere della Sera het die Pous selfs nie by hierdie geleentheid nagelaat om opnuut te bevestig dat Galileo ten minste op een punt verkeerd was nie. Dit lyk of die fisikus ’n “voorstel” verwerp het dat hy sy gevolgtrekkings as ’n hipotese moet voorlê totdat daar “onweerlegbare bewyse” was.
Die lewe op die onderste sport
Indië se Mushars het in die samelewing nog “altyd op die onderste sport van die leer gestaan”, het India Today onlangs gesê. Hierdie gemeenskap van onaanraakbares, soos daar na hulle kaste verwys word, tel omtrent driemiljoen en woon hoofsaaklik in die staat Bihar. Een 60-jarige Mushar sê die meeste “weet nie wat ’n volledige maaltyd is nie”. India Today beskryf op aanskoulike wyse hoe ’n groep Mushar-kinders, wat die platteland vir kos deursoek, ’n klomp rotte uit hulle gate rook, hulle doodslaan, braai en eet. Die tydskrif verduidelik dat “Mushar” in die plaaslike taal “rottevanger” beteken.
Satanisme onder tieners
Satanisme is besig om veld te wen in skole in Johannesburg. Volgens die koerant The Star het een sielkundige gesê dat sy ’n aantal leerlinge behandel het wat deur Satanisme beïnvloed is. Haar pasiënte het van voorstedelike heksevergaderinge gepraat waar dwelmmiddels gebruik is en geslagsomgang sowel as sado-masochistiese orgieë beoefen is. In teenstelling met die algemene mening sê sy: “hierdie kinders lyk heeltemal ordentlik.” ’n Polisiebeampte het aan The Star vertel dat die polisie van sataniese groepe reg deur die land bewus is. Satanisme is nie onwettig nie, maar die polisie ondersoek misdade wat met sataniese rituele verband hou. Hulle het onlangs ’n tienderjarige meisie en haar kêrel in hegtenis geneem in verband met die moord op ’n 38-jarige vrou. Albei was by Satanisme betrokke en het aan die polisie vertel dat hulle die moord onder demoniese invloed gepleeg het.
Kweekhuisorkane
Baie wetenskaplikes is bekommerd dat die onlangse reeks hewige orkane moontlik verband hou met die kweekhuiseffek, die verwarming van die atmosfeer as gevolg van besoedeling deur die mens. Volgens die tydskrif Newsweek kan ’n gemiddelde temperatuurverhoging van net ’n paar grade sulke storms vererger en die deel van die oseaan vergroot wat hulle laat ontstaan. Die tydskrif sê dat orkaan Andrew van 1992, wat ’n waarde van 5 toegeken is op ’n 5-puntskaal van orkaansterkte, eens op ’n tyd ’n honderdjarige storm genoem sou word omdat sulke rampe gewoonlik so skaars is. Maar orkaan Hugo van 1989 is ’n waarde van 4 gegee, en orkaan Gilbert van 1988 is ook ’n waarde van 5 gegee. Newsweek som baie wetenskaplikes se besorgdheid dus soos volg op: “Beskou gerus orkaan Andrew; dit is hoe ’n kweekhuiswêreld waarskynlik sal lyk.”
Liefdadigheid vir wie?
Wat gebeur met al die geld wat liefdadigheidsorganisasies elke jaar insamel? Redelik baie daarvan gaan na die mense wat die organisasie bestuur. Volgens ’n opname het hoofamptenare van meer as ’n derde van die 100 grootste liefdadigheidsorganisasies in die Verenigde State verlede jaar elkeen meer as R590 000 se salarisse en voordele ingepalm. So berig die International Herald Tribune. Drie van hierdie amptenare het elkeen meer as R1475 000 ontvang. Die opname is aan die gang gesit toe een liefdadigheidsorganisasie se president wat van wanbesteding en verkwisting beskuldig is van sy amp onthef is. Hy het R1150 500 per jaar verdien. Sy opvolger verdien “net” R575 250.
Tot ’n egskeiding ons skei
Gedurende 1991 het meer as 130-000 huwelike in die skeihowe van Duitsland geëindig, berig die koerant Allgemeine Zeitung. Huweliksverbrokkeling het so algemeen geword dat simpatiekaartjies vrylik beskikbaar is, en hulle het slagspreuke op soos “Veels geluk met jou egskeiding” of “Welkom by die eerste van die beste dae van jou lewe.” Sowat 10 persent van die egpare wat in Duitsland trou, tref nou lank voor die troue voorbereidsels vir ’n egskeiding. Hulle stel kontrakte op wat bepaal wat elke huweliksmaat sal kry—huis, meubels—in die geval van ’n egskeiding. Waarom is daar so baie egskeidings? Allgemeine Zeitung sê: “Net ’n paar jaar nadat hulle ringe verwissel het, kla 80 persent van die vrouens dat hulle mans te min belangstelling in hulle toon. . . . ’n Studie van 5000 egpare het bevestig dat hulle gewoonlik na ses jaar van getroude lewe net nege minute per dag met mekaar praat.”
Ouers boet vir ’n gebrek aan dissipline
’n Hof in Tokio, Japan, het onlangs bepaal dat die ouers van drie tienderjarige lede van ’n motorfietsbende moet help om vir hulle kinders se misdade te betaal. Die seuns het ’n man geslaan en herhaaldelik in die maag geskop nadat hy gekla het oor die geraas wat hulle motorfietse maak. Die man is ’n maand later oorlede. “Die misdaad was ’n uitbreiding van die soort lewe wat die vier jong mans gelei het deur herhaaldelik skool te mis, te drink, te rook en op motorfietse te ry”, het die Mainichi Daily News aangehaal wat die regter gesê het. “Terwyl die bendelede se ouers ten volle bewus was van die soort lewe wat hulle seuns lei, het hulle hulle nie gedissiplineer nie”, het hy gesê en gelas dat die ouers ¥83000 000 (bykans R2065 000) as vergoeding aan die dooie man se gesin betaal.
Besoedeling en kindersterftes
’n Onlangse studie in Brasilië koppel besoedeling met die sterftes van stadskinders van vyf jaar oud en jonger. Volgens die koerant O Estado de S. Paulo het Paulo H. N. Saldiva, ’n navorser verbonde aan São Paulo se Fakulteit van Geneeskunde, bevind dat wanneer die lug meer stikstofoksied (’n gas wat vrygestel word deur die verbranding van dieselolie, petrol en alkohol) bevat, daar ’n toename in die aantal sterftes as gevolg van probleme met die asemhalingstelsel is. ’n Vermeerdering van bloot ’n tiende deel van hierdie gas per miljoen dele lug beteken dat nog agt kinders per week in São Paulo sal sterf. Aangesien arm en ondervoede kinders die meeste aangetas word, sê Paulo Saldiva: “Diegene wat weens motors se besoedeling ly, is juis diegene wat nie die gerief van ’n voertuig geniet nie.”
Evangelisasie in die buitenste ruimte?
Die Katolieke Kerk wonder nog steeds hoe om nuwe wêrelde te evangeliseer. Sterrekundiges van die Heilige Stoel wat na intelligente lewensvorme in die buitenste ruimte soek, het reeds bepaal wat die teologiese implikasies daarvan sal wees as sulke wesens gevind word. “Buite-aardse wesens doop? Waarom nie?” vra die Jesuïet George Coyne, die direkteur van die Vatikaanse sterrewag in Italië. “Indien ons eendag gelukkig genoeg is om hulle te ontmoet, sal ons genoodsaak wees om aan die probleem aandag te skenk.” George Coyne beskou dit as volg: “Heel eerste sal ons die buite-aardse wese ’n paar vrae moet vra, soos: ‘Het julle ooit ’n soortgelyke ondervinding as dié van Adam en Eva gehad, dit wil sê van ’n eerste sonde?’ En dan die gevolglike vraag: ‘Ken julle ook ’n Jesus wat julle verlos het?’” Indien die antwoord nee is, sal “die vraag van sy evangelisering beslis geopper word”.
Lang, gelukkige huwelike
“Dis dieselfde ou storie: lewe streng volgens die Tien Gebooie, en julle sal lank en gelukkig lewe”, het sielkundige Gary Schoener in ’n onlangse nommer van die tydskrif Newsweek gekla. Waarmee spot hy? Met die algemene publisiteit wat aan opnames onder bykans 6000 mense gegee is wat toon dat ouer egpare gelukkiger is as jongmense wat seksueel promisku is. Die bevindinge wat Gary Schoener as prohuwelik en moralisties verwerp, toon dat hoewel geslagsomgang soos ’n mens ouer word minder dikwels plaasvind, is ouer egpare wat hulle huweliksmaats steeds “liggaamlik baie aantreklik” vind en dit steeds geniet om gereeld intiem te verkeer van die gelukkigste mense wat ondervra is. Ander studies het getoon dat dit waarskynliker is dat diegene wat hulle gewig beheer en gereeld oefen in hulle later jare seksueel aktief sal bly.
Tydgrens vir wegraping verstryk—al weer
Die Sending vir die Komende Dae in Korea het vol vertroue voorspel dat die “wegraping”, waartydens getroue kerklidmate na die hemel weggevoer sou word, op 28 Oktober 1992 sou plaasvind. Die Korea Times berig dat duisende mense wat hierdie profesie geglo het hulle werk en familie verlaat het en hulle besittings verkoop het. ’n Swanger gelowige het volgens berigte ’n aborsie ondergaan uit vrees dat die fetus haar hemelvaart sou bemoeilik. Die dag het sonder voorval gekom en gegaan, behalwe dat ’n paar teleurgestelde kerkgangers hulle leraars geslaan het en daarop aangedring het om te weet waarom die wegraping nie plaasgevind het nie. Maar die kerkstigter was reeds in die tronk. Hy is in hegtenis geneem omdat hy die kerkfondse verduister het. Die Korea Times skryf: “Party van sy beleggings het effekte ingesluit wat eers die daaropvolgende Mei maande na sy voorspelde oordeelsdag, uitbetaal sou word.”