’n Bussafari na die middel van Australië

Deur Ontwaak!-medewerker in Australië

HET jy al ooit langs ’n rivier vol krokodille afgevaar? Was jy al ooit in die maanlig by ’n liedjiesaand, honderde kilometer van die beskawing af? Het jy al ooit ’n Christelike vergadering bygewoon terwyl jy teen honderd kilometer per uur op ’n hoofpad ry? Sulke ondervindinge is maar net ’n voorbeeld van dit wat honderde byeenkomsgangers uit verskeie gebiede geniet het toe hulle op ’n bussafari na ’n streekbyeenkoms van Jehovah se Getuies in Alice Springs in die sonverskroeide middel van Australië gereis het.

“Die woord ‘safari’ was gepas”, het een byeenkomsganger gesê, “want ons het in die buitelug in tweemantente geslaap. Teen die tyd dat ons by Alice Springs aangekom het, kon ons ons tente in minder as drie minute opslaan! Dit was amper soos om na ’n video in versnelde beweging te kyk: Sodra die busse gestop het, het daar in ’n leë park skielik tientalle klein tentjies opgeskiet.”

Welkom by “Die Alice”

Alice Springs (“Die Alice” vir die inwoners) is ’n florerende oase wat deur ’n rooi woestyn omring word. Daar is ’n bevolking van 23 000, en dit is net suid van die geografiese middelpunt van die Australiese vasteland geleë. Dit is nou ’n toeristesentrum wat Australië se inboorlinge en hulle unieke kuns hoofsaaklik as tema gebruik.

Maar vir die Getuies was die driedaagse streekbyeenkoms die hoogtepunt van die hele safari. Vir party van hulle was dit ’n geleentheid vir talle vreugdevolle herontmoetings. ’n Stomende warm koppie tee is een van die tekens van gasvryheid in Australië se agterveld, en die byeenkoms het hierdie gebruik laat voortleef met die verversingstent waar billy tea en damper bedien is. Billy tea is maar net tee wat oor ’n oop vuur gemaak word in ’n swartgebrande blikketel wat ’n billy genoem word. Soms word die kokende water met ’n takkie van die bloekomboom, of gomboom, geroer wanneer die teeblare in die billy gegooi word. ’n Bloekomtakkie wat bo-oor die billy geplaas word, keer dat rook in die tee kom.

Damper is ’n eenvoudige soort brood. Die enigste bestanddele wat nodig is, is bruismeel, water en sout. Terwyl die damper nog warm is, word dit in dik snye gesny en dan met baie botter en gouestroop gesmeer. Die tent waar die billy tea en damper bedien is, was een van die gewildste vergaderplekke op die byeenkomsgrond.

Getroue diens in afsondering

Die Alice Springs-gemeente bestaan uit 72 Getuies en is verantwoordelik vir ’n gebied van omtrent 200 000 vierkante kilometer. Darwin is omtrent 1800 kilometer na die noorde, en Adelaide is amper 1600 kilometer na die suide. Die besoekende byeenkomsgangers was verbaas om met hulle eie oë te sien wat ’n uitdaging dit is om in die agterveld met sy lang afstande, aanhoudende hitte, stof en afsondering te woon.

Die uraanmyndorp Jabiru is ’n baie goeie voorbeeld hiervan. Net een Getuie bly daar, en sy is 260 kilometer van die naaste gemeente af. Maar afsondering het nie haar geestelikheid laat verswak nie. Haar teenwoordigheid by die byeenkoms het baie ander aangemoedig. En vier Bybelstudente het van die afgeleë inboorlinggemeenskap Jilkmingan, op die grens van Arnhemland in die Noordelike Gebied, gereis om onder die 26 te wees wat by hierdie byeenkoms gedoop is.

Byeenkomsgangers laat hulle lig skyn

Ná die byeenkoms het al die busse noordwaarts vertrek na die bopunt van die Australiese vasteland. ’n Hoogtepunt van hierdie skof van die safari was ’n bootrit op die vars, helder water van die Katherine-ravyn, op pad na die bekende Kakadu Nasionale Park. Dit het die reisigers hulle eerste geleentheid gebied om krokodille in die natuur te sien. Dit was fassinerend, maar ’n bietjie skrikwekkend! Toe, ná ’n aangename nag in die Noordelike Gebied se hoofstad, Darwin, was die safari se volgende stilhouplek Mataranka Station, wat beroemd is vir sy kristalhelder warmwaterbronne en -poele wat met palmbome omring is.

Maar al hierdie uitstappies het nie ons geestelike bedrywighede verdring nie. Die busse het mobiele Koninkryksale geword. ’n Bybelteks en gedrukte kommentaar is elke dag bespreek, en die gewone weeklikse gemeentelike vergaderinge is op pad gehou. Een van die busbestuurders wat nie ’n Getuie was nie, was só beïndruk dat hy op eie inisiatief ’n verlengingskabel, ’n mikrofoon en ’n prop gekoop het om aan die bus se luidsprekerstelsel te koppel sodat diegene wat tydens hierdie besprekings kommentaar gelewer het, beter gehoor kon word.

Gedurende die toer het ’n bejaarde reisiger só siek geword dat sy na ’n plaaslike hospitaal gehaas moes word. ’n Vriendin het saam met haar agtergebly, maar die busse moes voortgaan. Twee dae later, ná sy herstel het, was sy en haar metgesel baie mismoedig en teleurgesteld omdat hulle die res van die safari misgeloop het. Maar danksy Christelike liefde was hulle droefheid van korte duur.

Twee plaaslike Getuies wat vlieëniers is, het van die situasie te hore gekom. Daarna het dinge vinnig gebeur. Spoedig was al vier in die lug aan boord van ’n ligte vliegtuig op pad na die dorp Port Augusta om die busse in te haal. Een van die reisigers het ontroerd gesê: “Ons was met liefde en waardering vervul vir die wonderlike broederskap waaraan ons behoort!” Maar dit was nie al nie. Toe die vliegtuig daar aankom, het ’n aantal mede-byeenkomsgangers aangebied om geldelik tot die vlieëniers se uitgawes by te dra! Die busbestuurder was duidelik ontroer deur hierdie betoning van broederliefde en het gesê dat hy nog nooit vantevore so iets gesien het nie.

“As ek aan die drie weke van die Alice Springs-toer terugdink”, het een van die reisigers gesê, “was dit vir my die aanmoedigendste en geloofversterkendste ondervinding wat ek nog gehad het. Wat veral uitstaan, is die gees van samesyn wat ons almal geniet het. Dit sou nie saak gemaak het waar op aarde ons gegaan het nie—die ware skat was ons eenheid van verstand en gees!”

[Kaart op bladsy 18]

(Sien publikasie vir oorspronklike teksuitleg)

Die roetes van safaritoere na en van die Alice Springs-byeenkoms af

Wes-Australië

Noordelike Gebied

Queensland

Nieu-Suid-Wallis

Suid-Australië

Victoria

Tasmanië

Darwin

Perth

Alice Springs

Brisbane

Sydney

Adelaide

Melbourne

Hobart

Uluru (Ayers-rots)

Port Augusta

Kakadu Nasionale Park

[Prent op bladsy 16, 17]

Inboorlinge was onder dié wat gewag het om by die Alice Springs-streekbyeenkoms gedoop te word

[Prent op bladsy 17]

Kampvuur met “billy tea” en “damper”

[Prent op bladsy 17]

’n Krokodil bak in die son in die Kakadu Nasionale Park

[Prente op bladsy 18]

Uluru (Ayers-rots) 470 kilometer suidwes van Alice Springs

’n Tipiese toneel in die Noordelike Gebied se Kakadu Nasionale Park