Van ons lesers

Kersgeskenke ’n Omstrede onderwerp is duidelik, maar baie taktvol, behandel in die artikel “Iets beters as Kersgeskenke” (22 Desember 1992). Dit was uit die staanspoor vir elke leser geskik, hetsy hy godsdienstig is of nie. Boonop was dit nie bloot ’n veroordeling van al die gebruike wat met Kersfees gepaardgaan nie. Dit was ’n plesier om hierdie aangename uiteensetting te lees en ook om dit in ons predikingswerk aan te bied.

T. T., Duitsland

Die artikel het my werklik laat besef watter dinge beter as Kersgeskenke is, naamlik my ouers se liefde en die manier waarop hulle werklik uit die hart gee. Ek moet ook nog aan my klas verduidelik waarom ons as Jehovah se Getuies nie “Sint Nikolaas-dag” en Kersfees vier nie. Met behulp van hierdie artikel sal ek ’n goeie verduideliking kan gee.

S. H. S., Duitsland

Kelte Ek het julle artikel “Die Kelte—Hulle invloed word steeds ondervind” (8 September 1992) baie geniet. Dit is vandag iets algemeens [vir skrywers] om die onderwerp van ouer beskawings te behandel asof mense in daardie tyd alles gehad het en alles goed sal gaan as ons almal weer primitief word. Dit was verkwikkend om ’n artikel te lees wat ’n beskawing op so ’n interessante manier uitbeeld sonder om die mense te idealiseer of bespotlik te laat lyk.

L. Z., Verenigde State

’n Kind se geslag Dankie vir die venster met die opskrif “Hoe word ’n kind se geslag bepaal?” wat in die artikel “Vroue—Word hulle tuis gerespekteer?” (8 Julie 1992) verskyn het. Julle het my geleer om nie my ouer suster te blameer omdat sy binne ’n tydperk van tien jaar aan vyf dogters geboorte gegee het en nie ’n seun gehad het nie. Volgens julle artikel moet die man eerder blameer word, indien iemand die blaam moet dra.

E. J. O., Nigerië

Hoewel die sperm die faktor bevat wat bepaal of ’n kind manlik of vroulik is, kan nie die man of die vrou blameer word nie. Soos die artikel sê, is dit “bloot die lotery van voortplanting” waaroor nie een van die twee beheer het nie.—RED.

Blokkiesraaisels Baie dankie vir die blokkiesraaisels! Ek het onlangs die hoofstuk oor neerslagtigheid in die boek Vrae wat jongmense vra—Antwoorde wat werk gelees. Dit raai ’n mens aan “om dinge te doen wat vir jou plesier verskaf”, soos om ’n blokkiesraaisel in te vul. Dit is ’n uitstekende wenk, want ek het gevind dat dit my die geleentheid bied om te lag, pret te hê en nuwe inligting in te win. Hou asseblief aan om die blokkiesraaisels te publiseer!

M. R., Verenigde State

Die boek wat gemeld word, word deur die Watchtower Bible and Tract Society of New York, Inc., die uitgewers van hierdie tydskrif, uitgegee.—RED.

Halsstarrige ouers Ek het in trane uitgebars toe ek die artikel “Jongmense vra . . . Sê nou een van my ouers het ons in die skande gesteek?” (22 Oktober 1992) gelees het. My pa is twee jaar gelede uit die Christengemeente gesit en ek en my ma het ’n baie moeilike tyd deurgemaak. Ek het die wenk in die artikel toegepas en ’n ervare Christen- ouere man in my vertroue geneem, en ek het baie aanmoediging en hulp ontvang.

A. O., Japan

My pa was vroeër een van Jehovah se Getuies en het ’n afvallige geword. Hy het probeer om ander van die waarheid te laat afdwaal en hou selfs toesprake by kerke. Hulle noem hom “eerwaarde”! Ek het so skaam gevoel! Hierdie artikel het my beslis gehelp.

B. A., Verenigde State