Van ons lesers
Loodvergiftiging Baie dankie vir die artikels oor loodvergiftiging (22 November 1992). Aangesien julle melding gemaak het van hoë bloeddruk, nierkwale, maagpyn en vomering—probleme wat ek al jare lank ervaar—het ek my vir moontlike loodvergiftiging laat ondersoek. Die uitslag het ’n oormatige loodophoping bevestig. Ek hoop die behandeling wat ek nou kry, sal geslaagd wees.
T. W., Duitsland
Dit is duidelik dat julle deeglike navorsing vir julle artikels doen. Ek werk by ’n navorsingsinstituut vir die Departement van Organiese Bedekkings. In ons land is verf met ’n loodbasis baie jare lank gebruik omdat dit teen verwering bestand is. Nou word die gebruik daarvan streng beperk, maar soos julle gesê het, kom die gevare wat loodvergiftiging inhou steeds voor. Hierdie artikel het my gehelp om aan my kollegas te toon dat die Ontwaak! nie net godsdiensvrae beantwoord nie, maar mense ook help om hulle probleme op te los, al is hulle ongelowiges. Dankie.
A. A., Tsjeggiese Republiek
Ysterlong Ek móés net my innige waardering uitspreek vir die ondervinding van Laurel Nisbet met die titel “Nie eens ’n ysterlong kon keer dat sy preek nie” (22 Januarie 1993). Wat ’n wonderlike voorbeeld van moed, geloof, volharding en ywer! Ek het lupus, maar my probleme is onbeduidend wanneer ek aan die lyding dink wat suster Nisbet verduur het en hoe lank sy dit verduur het.
R. L. H., Verenigde State
Aangesien ek verlam is en nie kan loop nie, het ek gekla dat ek nie dikwels in die predikingswerk kan uitgaan nie. Nou besef ek as hierdie vrou, wat 37 jaar lank in ’n ysterlong was, kon preek en dissipels kon maak, kan ek ook vergenoeg wees met wat ek kan doen.
M. L., Italië
Ons waardeer sulke kommentare. Suster Nisbet se getroue voorbeeld verklein natuurlik geensins die stryd wat baie met ander ernstige gesondheidsprobleme het wat effens minder aftakelend is, maar steeds aansienlike lyding veroorsaak nie.—RED.
Brood Dankie vir die artikel “Ons daaglikse brood” (8 Desember 1992). Ek het julle broodresep probeer, en ek was verheug oor hoe maklik dit is om brood te bak en hoe heerlik dit smaak.
M. M., Verenigde State
Ek het ’n hele paar resepteboeke op die rak, maar nie een van die resepte in daardie boeke het so lekker uitgekom soos julle resep nie. Baie dankie!
S. H., Duitsland
Nazi-vervolging Ek is baie bemoedig deur die artikel “Die Nazi’s kon ons nie keer nie!” wat deur Erwin Klose geskryf is (22 November 1992). In teenstelling met ander ondervindinge oor die Nazi’s wat tot dusver verskyn het, is Erwin Klose se verhaal met ’n tikkie humor vertel. Soms kon ek nie ophou lag nie! Ek is bemoedig deur die opgewekte en positiewe manier waarop hy dinge beskou het.
T. K., Japan
Russiese byeenkomste Ek wil julle werklik bedank vir die artikel “Rusland se eerste internasionale byeenkoms van Jehovah se Getuies” (22 Desember 1992). Hoewel ek Jehovah God al lank dien, moet ek erken dat my waardering vir God se voorsienings nie met dié van daardie Christene in Rusland kan vergelyk nie! Die uitdrukking op daardie suster se gesig toe sy haar eerste persoonlike eksemplaar van die Bybel ontvang het, het my laat besef hoe baie ek het—en as vanselfsprekend aanvaar. Die artikel het my gehelp om aspekte raak te sien waarin ek veranderinge moet aanbring.
B. T. A., Verenigde State