Utah se merkwaardige kabelspoor
DIE “Steilste kabelspoor ter wêreld”. Dit is hoe die Skytram by die Bridal Veil-waterval in die Provo-canyon in Utah, VSA, geadverteer word. Ek het gewonder: ‘Kan dit regtig waar wees?’ Ek onthou toe ek ongeveer 15 jaar gelede die berge van Montserrat in Katalonië, Spanje, per kabelkar besoek het, en daardie kabelspoor het vir my steiler gelyk. Waarom sê hulle dan dat die een hier by die Bridal Veil-waterval die steilste is? Omdat dit 374 meter hoog styg met ’n kabelspoor van 534 meter lank—’n gemiddelde hoek van meer as 45 grade. Wanneer die kabelkar naby die berghut kom, teen ’n hoogte van 1900 meter, raak die hoek 62 grade!
Dit is al die tegniese gegewens. Die rit self, in ’n kabelkar vir ses mense, is pragtig namate ons van die hoofweg af styg en verby die Bridal Veil-waterval aan ons linkerkant beweeg. Ons styg teen ’n gemiddelde spoed van agt kilometer per uur. Ruwe berge omring ons—die berg Timpanogos met ’n hoogte van ongeveer 3600 meter agter ons en die een wat ons bestyg, die Cascade-berg, voor ons. Die waterval is ’n dubbele waterval wat meer as 180 meter ver val voor dit in die Provo-rivier stort. Van die water word met pype na ’n hidroëlektriese stasie ses kilometer daarvandaan weggevoer.
Die kabelspoor wat van Switserse fabrikaat is, is in 1962 oopgestel en het al meer as 1,5 miljoen mense sonder ’n enkele ernstige ongeluk vervoer. Ingeval jy senuweeagtig is om in ’n kabelkar te ry, sê ’n brosjure: “Kabelspore soos hierdie Skytram is volgens die geskiedenis en statistiek die veiligste vervoermetode tussen twee punte.” Wanneer jy weer met ’n kabelspoor ry, moet jy ’n bietjie uitvind—is dit steiler as hierdie een in Utah?
[Foto-erkenning op bladsy 31]
Courtesy Mountainland Travel Region