As jou kind gemolesteer word

OM MOLESTERING te beëindig, moet jy dit herken wanneer jy dit sien. In die talle boeke oor die onderwerp noem kenners tientalle onmiskenbare tekens van molestering waarvoor ouers op die uitkyk kan wees. Dit sluit in: klagtes van pyn tydens urinering of ontlasting, genitale infeksies, skaafplekke of letsels in die genitale streek, skielike bednatmakery, aptytverlies of ander eetprobleme, vrypostige seksuele gedrag, ’n skielike vrees vir plekke soos die skool of dele van die huis, tydperke van paniek, ’n buitengewone vrees om uit te trek, ’n vrees om alleen saam met ’n bekende persoon te wees en selfskending.

Maar moenie te gou gevolgtrekkings maak nie. Die meeste van hierdie simptome beteken nie op sigself dat ’n kind noodwendig seksueel misbruik is nie. Elkeen kan op ’n ander probleem dui. Maar as jy ontstellende simptome sien, kan jy die onderwerp versigtig aanroer deur miskien iets te sê soos: “As enigiemand ooit aan jou vat op ’n manier wat jou ongemaklik laat voel, wil ek hê jy moet weet dat jy my altyd kan vertel, en ek sal alles in my vermoë doen om jou te beskerm. Het so iets al ooit met jou gebeur?”—Spreuke 20:5.

As jou kind sê dat hy seksueel misbruik is, sal jy ongetwyfeld verpletterd voel. Maar onthou: Jou reaksie sal ’n groot rol in die kind se herstel speel. Jou kind dra ’n ondraaglike las en het jou nodig, sodat jy dit met al jou volwasse krag van sy of haar skouers kan aftel. Prys die kind omdat hy so dapper was om jou te vertel wat gebeur het. Verseker die kind herhaaldelik dat jy jou bes sal doen om hom te beskerm; dat die molestering die molesteerder se skuld was, nie die kind s’n nie; dat die kind nie “sleg” is nie; dat jy die kind liefhet.

Sommige regskenners raai aan dat die molestering so gou as moontlik by die owerheid aangemeld moet word. In sommige lande vereis die regstelsel dit moontlik. Maar op ander plekke bied die regstelsel dalk min hoop op suksesvolle vervolging.

Maar wat moet jy doen as die molesteerder jou eie geliefde huweliksmaat is? Ongelukkig tree baie vrouens nie beslissend genoeg op nie. Dit is natuurlik nooit maklik om die aaklige werklikheid te aanvaar dat ’n huweliksmaat ’n kindermolesteerder is nie. Emosionele bande en selfs finansiële afhanklikheid kan ’n baie sterk invloed uitoefen. Die verontregte vrou besef ook dat haar man sy gesin, sy werk en sy reputasie kan verloor indien sy stappe sou doen.a Maar die harde werklikheid is dat hy moontlik net sal maai wat hy gesaai het (Galasiërs 6:7). Onskuldige kinders, daarenteen, kan baie meer verloor as hulle nie geglo en beskerm word nie. Hulle hele toekoms is op die spel. Hulle het nie die hulpmiddels wat volwassenes het nie. Die trauma kan hulle kwes en hulle vir die res van hulle lewe nadelig beïnvloed. Dit is hulle wat tere behandeling nodig het en dit verdien.—Vergelyk Genesis 33:13, 14.

Ouers moet gevolglik alle redelike voorsorg tref om hulle kinders te beskerm! Talle verantwoordelike ouers besluit om professionele hulp vir ’n gemolesteerde kind te kry. Net soos met ’n mediese dokter moet jy seker maak dat so ’n deskundige jou godsdiensopvatting sal respekteer.b Help jou kind om sy of haar verpletterde selfbeeld te heel deur jou ouerlike liefde voortdurend op hom of haar uit te stort.

[Voetnote]