“Ek het van vreugde gehuil”
Lesers spreek hulle innige waardering uit vir “Hoe die letsels van kindermolestering genees kan word”
’NONLANGSE reeks artikels in die Ontwaak! het talle lesers uit alle wêrelddele beweeg om hulle hartgrondige waardering uit te spreek vir die voorbladartikels “Hoe die letsels van kindermolestering genees kan word” in die Ontwaak! van 8 Oktober 1991. Hulle gunstige reaksies toon dat hierdie materiaal, wat met sorg voorberei is, sy drievoudige doel bereik het, naamlik: (1) om die slagoffers hulle probleem te help verstaan en hulle hoop te gee; (2) om ouers te waarsku sodat hulle waaksaam oor die veiligheid van hulle kinders kan wees; (3) om ouere manne te help om beter ingelig te wees sodat hulle slagoffers van molestering op doeltreffender wyse kan bystaan.—Spreuke 21:13; vergelyk 27:23.
Baie lesers het soortgelyke kommentaar as die volgende gelewer: “Ek het dit nog altyd as ’n voorreg beskou om een van Jehovah se Getuies te wees. Maar my waardering en liefde vir Jehovah en sy ‘getroue en verstandige dienskneg’ (Mattheüs 24:45-47) het honderdvoudig toegeneem nadat ek die Ontwaak! van 8 Oktober 1991 gelees het.”
“Jehovah verstaan regtig en gee werklik om”
Baie lesers het waardering uitgespreek vir ’n uiters belangrike aspek van die artikels: dat God luister, dat Hy omgee, dat Hy weet dat dit nie die slagoffer se skuld was nie en dat God kan genees. ’n Leseres sê: “Ek sê van harte dankie vir die Ontwaak! van 8 Oktober. Julle artikels het my gehelp deur vir my te wys dat Jehovah regtig verstaan en werklik omgee.”—Brittanje.
’n Vrou skryf: “’n Paar maande gelede wou ek julle vra om ’n artikel te skryf oor hoe die letsels van kindermolestering genees kan word. Ek het nie vir julle geskryf nie, maar het eerder tot Jehovah daaroor gebid. Julle kan dus begryp waarom ek so verheug was toe ek die nommer van 8 Oktober se voorblad sien. Ek het in trane uitgebars en ons liefdevolle God, Jehovah, uit my hart uit bedank.”—Griekeland.
Nog ’n vrou sê: “Wanneer ek dink aan wat ek moes deurmaak, huil ek bitterlik. Dit is waarom ek die reeks oor ‘Hoe die letsels van kindermolestering genees kan word’ met buitengewone aandag gelees het, en ek het dit uiters nuttig gevind. Die artikels toon duidelik dat julle liefdevolle belangstelling toon in diegene wat sulke dinge in hulle lewe moes deurmaak.”—Italië.
Baie het hierdie gedagte uitgespreek: “Ek dank Jehovah dat hy hierdie informasie, die beste artikels wat ek nog oor die onderwerp gelees het, voorsien het. Ek bid dat dit nie net die slagoffers (oorlewendes) sal help nie, maar ook diegene wat ’n morbiede vrees het om werk te maak van die saak en dit moeilik vind om oor die onderwerp te praat.”—Verenigde State.
“Ek voel nou die lewe is die moeite werd”
’n Vrou wie se dogter gemolesteer is, het nog nie die probleem van daardie molestering verwerk nie. “Maar julle artikels het my op die regte spoor gebring”, het sy verduidelik. “Ek kry al 11 maande lank weekliks terapie vir angs, paniekaanvalle en depressie. Daardie artikels het meer vir my gedoen as al die terapie in die wêreld! Ek voel nou dat die lewe die moeite werd is, terwyl ek, voordat ek die artikels gelees het, nog skuldig gevoel het oor iets wat ek nie kon verhinder het nie.”—Brittanje.
Baie het gesê dat die informasie ’n keerpunt in hulle lewe was: “Ek kan julle net nie genoeg bedank vir die artikels nie. Hulle het verskyn toe ek seker die ergste laagtepunt ooit bereik het. Party dae het ek net in ’n hopie gesit en droewig gehuil. Danksy hierdie artikels, wat ek oor en oor gelees het, kan ek sien dat my pyn, en almal se pyn, vir Jehovah en sy organisasie belangrik is. Hierdie informasie het die begeerte by my gewek om genees te word. Ek voel reeds weer nader aan Jehovah.”—Verenigde State.
Maar kindermolestering is nie net ’n probleem in die Westerse wêreld nie, soos hierdie voorbeeld toon: “Toe ek die nommer van 8 Oktober oor kindermolestering ontvang het, het ek dit dadelik gelees. Ek het lank aan die artikels gelees omdat ek gesukkel het om die woorde deur my trane te sien! My gevoelens en gedagtes is duidelik in die artikels beskryf. Nou is ek bly dat iemand verstaan. Dit het my bemoedig om te sien hoe Jehovah mense wat ly sonder dat ander daarvan bewus is liefdevol help. Ek is opreg dankbaar dat julle hierdie artikels gepubliseer het. Om my letsels te genees, sal ek aanhou om die dinge wat in die artikels geskryf is, toe te pas. Wees verseker van my liefde en dankbaarheid wat woorde nie kan uitdruk nie.”—Japan.
Nog ’n vrou skryf: “Ek voer my hele lewe lank al ’n stryd teen die letsels van kindermolestering. Toe ek die tydskrif van 8 Oktober ontvang het, het ek besef dat Jehovah weet wat ons nodig het selfs voordat ons dit self weet en dat hy ons werklik liefhet. Ek kon skaars deur my trane sien, en dit het gevoel asof my hart gaan bars van liefde en waardering vir ons liefdevolle hemelse Vader. Hierdie nommer van 8 Oktober is ’n tydskrif wat ek sal bewaar ‘totdat daar nie meer aan die vorige dinge gedink sal word en hulle nie in die hart sal opkom nie’” (Jesaja 65:17).—Verenigde State.
“Ek is bevry!”
’n Vrou wat die grootste deel van haar lewe baie geesteskwelling verduur het, skryf: “Dankie vir die artikels oor kindermolestering. Uiteindelik, op 53, is ek bevry! Die sleutel tot my bevryding was die sin wat toon dat hierdie jong slagoffers ‘magteloos is om hulself te verdedig wanneer hulle bedreig word, en derhalwe hou God hulle nie daarvoor verantwoordelik nie’.” Toe sy die Ontwaak! van 8 Oktober lees en besef “DIT WAS NIE JOU SKULD NIE!” soos die tydskrif sê, het dit haar gehelp om haar op Jesus se losprysofferande te beroep sodat haar genesingsproses kan begin.—Brittanje.
Nog ’n vrou sê: “Van my kleintyd af tot my vroeë laerskooljare is ek herhaaldelik seksueel gemolesteer. Soos die artikels sê, het ek verstandelik ontvlug. Maar die herinneringe het aanhou terugkeer. Ek het altyd gedink: ‘Ek is ’n vuil mens. Jehovah sal my nooit aanvaar nie.’ Ek het dus altyd tot God gebid: ‘U sal my dalk nie ’n plek in die Paradys gee nie, maar laat my ten minste in u organisasie bly totdat ek sterf.’ Dit is omdat ek, soos daardie slagoffers in die artikels, gedink het dat ‘ek nie werklik skoon genoeg is om in God se Koninkryk te wees nie’ en dat ek by Armageddon sou sterf. Dit was asof gevoelens van skaamte en nutteloosheid my heeltemal wou vernietig. Die inhoud van die artikels, wat baie gevoelvol en liefdevol was, het my baie gehelp. Ek het gehuil terwyl ek hulle gelees het.”—Japan.
’n Ander vrou sê: “Ek wil julle bedank vir julle sensitiewe en deeglik nagevorste artikels. Jare lank het die trauma van molestering geweldige emosionele verwarring vir my veroorsaak. Dit is maklik vir baie mense om die lyding en marteling as gevolg van oorlog en politieke onrus te verstaan. Ons het medelye met diegene wat die Nazi-slagting oorleef het. Wanneer vreemdelinge bose dinge doen, word dit makliker verdra. Maar waarom kan sommige dit nie verstaan wanneer ons eie pa’s, ma’s, ooms, susters, broers—diegene wat veronderstel is om ons te vertroos, te vertroetel en te beskerm—die skuldiges is nie? Ek het my eie letsels gedra en die verwoestende werklikheid van algehele hopeloosheid ondervind. Terwyl ek herstel het, was dit my geestelike Vader, Jehovah, wat my in my gebroke toestand keer op keer versterk het, sodat ek nie heeltemal ineengestort het nie.”—Verenigde State.
“Ek het skielik weer begin lewe!”
’n Vrou wat sê dat sy 28 lang jare gevoel het asof sy verwerp is, het geskryf: “Ek het die artikels deurgelees die aand wat ek die tydskrif ontvang het en het gehuil omdat dit my so diep geraak het en ek so dankbaar was. Ek is so bly om te dink dat Jehovah so goed verstaan hoe ek voel. Ek voel asof ek skielik weer begin lewe het! Omdat die artikels beklemtoon dat kinders in daardie posisie geensins verantwoordelik is vir dit wat gebeur nie, besef ek dat ek glad nie rede het om myself te verwyt nie. Ek het waarlik gemoedsrus gevind.” Haar hart is beweeg om gunstig te reageer op genesing uit God se Woord.—Japan.
Kinderverkragting is ook ’n probleem in ontwikkelende lande, soos gesien kan word uit hierdie soortgelyke reaksie uit Afrika: “Die artikels het verskyn toe ek hulle die nodigste gehad het. Wat ’n verligting was dit tog om verklarings te lees soos: ‘Wees verseker daarvan dat daar hoop is en dat jy kan herstel’ en: ‘DIT WAS NIE JOU SKULD NIE!’ Terwyl ek die artikels gelees het, het ek vir die eerste keer in my lewe werklik veilig en vertroos gevoel. Hulle het ware vertroosting vir my gemoed, siel en liggaam gebring. Nou sal ek die krag hê om die pad na algehele herstel aan te durf.”—Nigerië.
Nog ’n vrou skryf: “Woorde kan nie my waardering en my gevoelens beskryf nadat ek die Ontwaak! van 8 Oktober oor kindermolestering gelees het nie. My oë het vol trane geskiet terwyl ek elke paragraaf, elke bladsy, elke teks gelees het. Dit is met baie deernis, teerheid en liefde geskryf. As slagoffer het ek met my gevoelens en emosies geworstel. Nou voel ek dat die hartseerlas in ’n mate verlig is. Danksy julle artikels en ’n vertroude, geduldige vriendin wat na my luister en my ondersteun, kan ek nou begin herstel.” Die God van alle onverdiende goedhartigheid maak baie sulke slagoffers, deur die priesterlike diens van sy Seun, “standvastig” en “sterk” (1 Petrus 5:6-11, NW).—Verenigde State.
Een slagoffer van bloedskande was so hewig ontstel dat sy selfmoord probeer pleeg het deur ’n motorhuis aan die brand te steek terwyl sy daarin was. Sy is gered en in ’n hospitaal opgeneem. Toe die nommer van 8 Oktober verskyn, het iemand dit dadelik vir haar gegee. Sy het droewig gehuil toe sy dit lees en het toe die artikels oor en oor gelees vir onderskraging en om haar te help om selfmoordneigings te bowe te kom. ’n Vriendin van haar wat haar baie gehelp het, het geskryf: “Soms dink ek dat die Ontwaak! eerder Krisisadvies genoem moet word, want dit help ons beslis om krisisse die hoof te bied.”—Verenigde State.
“Party kan vergeet, ander kan nie”
Nog ’n waarderende leseres sê: “Die artikels oor kindermolestering is so gebalanseerd. Ek waardeer die tekste wat julle gebruik het. Hierdie artikels is so goed geskryf dat ek julle vir elke paragraaf kan prys. Ek is dankbaar dat julle getoon het dat hoewel sommige kan vergeet, ander nie kan nie. Drie jaar lank het die herinneringe en die fisiese pyn wat met elke herinnering gepaardgaan, met rukke bly terugkeer. Maar dit word wel beter as jy leer hoe om die herinneringe te verwerk. Weer eens baie dankie vir so ’n wonderlike, gebalanseerde reeks” (Verenigde State). Hierdie Bybelse artikels het hierdie slagoffer, sowel as baie ander, gehelp om hulle opnuut in Jehovah se geestelike voorsienings te verbly.—Filippense 4:4-9.
“Ek lees die Ontwaak! al jare”, skryf een vrou. “Maar ek is nog nooit meer geraak deur ’n artikel as deur die reeks ‘Hoe die letsels van kindermolestering genees kan word’ nie. Dit is ’n moeilike onderwerp, maar julle het dit met takt en liefde benader. Aangesien ek self as kind gemolesteer is, het dit my baie gehelp en vertroos. Ek sal hierdie tydskrif bêre sodat ek dit dikwels weer kan lees. Ek kan julle nie werklik genoeg bedank nie vir die tyd, moeite, insig en bowenal vir al die liefde wat julle toon vir diegene wat in stilte ly.”—Verenigde State.
Sien die werklikheid onder die oë
Dit het slagoffers wat nie die kriminele dade wat teen hulle gepleeg is, kan vergeet nie al baie gehelp om met ’n simpatieke ouere man te praat, die probleem realisties onder die oë te sien, te sien hoe Jehovah die saak beskou en leiding in die Skrif te soek sodat genesing in die krag van Jesus se losprysoffer kan plaasvind. ’n Vrou sê in hierdie verband:
“Ek kan nie vir julle vertel hoe tydig die artikels was nie. Ek kon werklik nie glo hoe akkuraat die informasie is nie. Ek het 20 jaar lank aan depressie en bulimie gely, en ek het orals hulp en antwoorde gesoek: psigiaters, sielkundiges, mediese dokters, groepterapie, verslankingsklinieke—maar dit het my niks gehelp nie.
“Maar nou kry ek hulp deur informasie soos dié in die nommer van 8 Oktober. Dit is uiters nodig. Ek kan julle nie vertel hoe wanhopig ek met tye voel nie, en dit is so erg dat dit voel of die dood ’n uitkoms sal wees. Maar nou kan ek sien dat wat met my as kind gebeur het nie my skuld was nie, dat God nie dink dat ek vuil is nie. Ek was ’n slagoffer. Danksy sulke informasie kan ek sien dat Jehovah wel omgee, dat ek hom kan vertrou. Na 33 jaar kan ek voel dat Jehovah se gees die kettings van slawerny begin losmaak. Dankie dat julle ons lief genoeg het om moeite te doen met so ’n wonderlike juweel soos hierdie Ontwaak! Hou asseblief aan om hierdie soort artikels en ander te publiseer, want hulle is baie belangrik vir ons geestelikheid.”
Die volgende brief van ’n man som op hoe baie voel. Hy het meer as 50 jaar aan angs gely omdat hy as kind gemolesteer is. Hy sê: “Jehovah se liefdevolle sorg deur sy aardse organisasie verbaas ons voortdurend en wek immer dieper toegewydheid en vertroue in hom by ons. Nadat ek die informasie in die Ontwaak! van 8 Oktober 1991 oor kindermolestering noukeurig bestudeer het, het ek van vreugde gehuil en Jehovah, ons rots en bergvesting, ons toevlug, aanhoudend geloof. Hou aan om sulke artikels te publiseer, broers. Jehovah gebruik julle op maniere wat julle julle nie kan voorstel nie.”
Van opsieners
Hierdie brief van ’n reisende opsiener wat toesig hou oor die bedrywigheid van ’n aantal gemeentes van Jehovah se Getuies is van belang:
“Dankie vir die Ontwaak! van 8 Oktober oor ‘Hoe die letsels van kindermolestering genees kan word’. Dit is uitstekende informasie wat ons werklik nodig het. Die artikels is baie akkuraat. Ek het keer op keer gesien dat slagoffers dit baie moeilik vind om aan Jehovah as ’n liefdevolle Vader te dink. Wanneer ek hierdie probleem sien, vra ek hulle taktvol: ‘Is jy misbruik toe jy ’n kind was?’ Die meeste van die tyd is die antwoord ja! In elke geval waar die persoon die verband kon sien tussen die molestering en hoe hulle huidige depressie of ontsteltenis hulle beïnvloed, het hulle begin verbeter.”
Hierdie kort kommentaar deur ’n ouere man som op hoe baie ouere manne voel: “Die nommer van 8 Oktober oor kindermolestering is uitstekend en nodig. As ouere manne in die gemeentes moet ons soveel moontlik weet oor hierdie probleme sodat ons die belangstelling en geduld kan betoon wat die slagoffers nodig het. Namate hierdie stelsel versleg, kom hierdie soort probleem al hoe meer voor. Weer eens dankie vir die hulp.”
Dit het ons hart verbly om sulke briewe te ontvang. Sulke slagoffers van kindermolestering kan gehelp word om ongelukkige herinneringe te verwerk wanneer hulle werklik besef dat ‘dit nie hulle skuld was nie’ en met die krag van God se Woord veranderinge aanbring. Hulle verbly hulle in die hoop vir die toekoms en is vol vertroue dat hulle in God se nuwe wêreld nie ‘aan die vorige dinge sal dink en dat dit nie in die hart sal opkom nie’ (Jesaja 65:17; Romeine 12:12). Deur die genesende krag van Jesus se bloed het hulle selfs nou ’n rein posisie voor God (Hebreërs 9:14). En hulle moet hulle tot die ouere manne om hulp wend. Hierdie ouere manne kan “’n toevlug teen die wind” wees vir diegene wat in nood verkeer, deur hulle te bemoedig en vir hulle te bid (Jesaja 32:2; 1 Thessalonicense 5:14; Jakobus 5:14, 15). Slagoffers van molestering kan dus gehelp word om vordering te maak en in al die bedrywighede van die Christengemeente vreugde te vind.