Van Ons Lesers
Rassisme In julle artikels “Sal alle rasse ooit verenig wees?” (22 Augustus 1993) bespreek julle die kwessie van rassevooroordeel. Maar waarom hou julle daar op? Is die mens nie maar van nature wantrouig teenoor iemand wat van hom verskil nie? Neem byvoorbeeld die vooroordeel tussen ambagsmanne en kantoorwerkers, tussen stadsbewoners en plattelanders en tussen jongmense en oumense. Daar is vandag ’n neiging om rassevooroordeel om politieke en ander redes te oordryf.
B. G., Duitsland
Daar is ander oorwegende vorme van vooroordeel, maar hulle veroorsaak gewoonlik nie die lyding, ongeregtigheid en verdeeldheid wat rassevooroordeel veroorsaak nie. Ons het dus verplig gevoel om spesiale aandag aan hierdie aktuele onderwerp te skenk.—RED.
Voëlgesang Ek het die artikel “Voëlgesang—Net nog ’n mooi melodie?” (22 Junie 1993) gelees. Dit was vir my baie interessant om te leer dat voëlmelodieë, wat sommige dalk gemeen het bloot aangename klanke is, in werklikheid betekenis het. Dankie dat julle artikels publiseer wat ons van Jehovah se wonderlike skeppingswerke vertel.
A. P. C., Brasilië
Julle artikel het melding gemaak van ’n Britse wetenskaplike wat opgemerk het dat verskeie sanglysters die geluid van ’n telefoon by hulle repertoire gevoeg het. Ek en my vrou het ’n soortgelyke ondervinding gehad. Verlede jaar het ’n paar sanglysters hulle nes naby ons tuinbankie gebou. Elke keer as ons naby die nes gegaan het, het ons dieselfde kort melodie gefluit sodat ons hulle nie sou skrikmaak nie. Hierdie lente het verskeie sanglysters die melodie gesing wat ons verlede jaar gefluit het!
K. M., Duitsland
Aborsie Ek is 14 jaar oud, en julle artikels “Aborsie—die verwekking en die vernietiging van ’n lewe” (22 Mei 1993) het my gehelp om ’n selfs beter begrip te hê van hoe belangrik hierdie geskil vandag is. Dit het die feit beklemtoon dat hoewel ’n fetus in ’n vrou se liggaam lewe, meer as net haar liggaam deur ’n aborsie geraak word. Die fetus is ’n lewe van die oomblik van bevrugting af—nie bloot ’n stukkie weefsel nie. Ek dink aborsie moet verbied word.
J. R. W., Verenigde State
Hoewel die Skrif aborsie onomwonde veroordeel, meng die “Ontwaak!” hom nie in by die politiek nie en skaar hom nie by enige groepe wat betoog dat aborsie verbied moet word nie. Die doel van ons artikels is eerder om individue te help om God se Woord in hulle lewe toe te pas.—RED.
Gespanne kinders Ek wil julle hartlik bedank vir die artikels “Gespanne kinders—Hoe kan hulle gehelp word?” (22 Julie 1993). Dit het nuttige inligting voorsien om ons as ouers te help verstaan dat ons as gevolg van onervarenheid of spanning ernstige traumas vir ons kinders kan veroorsaak.
M. L. S., Italië
Die wêreld het ’n plek geword waar selfs kinders onder spanning verkeer. Ek het depressief geraak oor dinge wat my ouers my genoem het wanneer ek te stadig was om iets te doen. Dit het my diep seergemaak. Ek kan uit die artikels sien dat ouers kinders van die dag van hulle geboorte af vorm. As ek ooit ’n ouer word, wil ek empatie hê en met my kinders redeneer.
N. K., Japan
Die artikels het my diep geraak. Ek is deur my ma mishandel. Die artikels het my gehelp om te verstaan waarom ek in sekere situasies op ’n sekere manier optree en waarom ek dikwels nutteloos voel en ’n gebrek aan selfvertroue het. Julle het my werklik gehelp om op Jehovah te vertrou. Die emosionele pyn is nog daar, maar ek weet dat hy belowe het om hierdie slegte herinneringe uit my hart en gedagtes uit te wis. Dit is vir my ’n groot vertroosting.
E. B., Engeland