Van ons lesers

Aborsie Julle reeks “Aborsie—die verwekking en die vernietiging van ’n lewe” (22 Mei 1993) het trane in my oë laat opwel en my hartseer laat voel. As ek hierdie inligting agt jaar gelede gelees het, sou ek nie ’n aborsie ondergaan het nie. Dit het byna sewe jaar geduur voordat ek hierdie sonde teenoor my man, wat die vader sou gewees het, kon erken. Ek hoop dat enigeen wat ’n aborsie oorweeg die artikels sal lees en sal besef dat die lewe kosbaar en ’n gawe van God is.

G. D., Verenigde State

Ek is 16 jaar oud, en ons het in die skool van aborsie geleer. Tog het ek op die een of ander manier nie besef watter pyn dit vir die kind inhou nie. Toe ek hierdie tydskrif gelees het, het groot woede in my opgewel, asook trane wat ek nie kon bedwing nie. Hoe kan mense die kosbare lewe wat Jehovah ons uit sy goedhartigheid skenk met sulke minagting behandel?

N. K., Japan

Ek het hierdie tydskrif saam skool toe geneem, en tot my verbasing het die leerlinge daarvan gehou! Dit het my klasmaats so diep geroer dat een van hulle in trane uitgebars het. Sy het net ’n paar dae tevore ’n aborsie laat doen.

L. S., Verenigde State

Helikopters Julle artikel “Werkesel van die lug” (8 Maart 1993) was vir my besonder interessant. As ’n lugvaartinspekteur vir die Federale Lugvaartadministrasie en ’n helikoptervlieënier/-vlieginstrukteur kan ek sien dat buitengewone sorg aan die dag gelê is wat die akkuraatheid van die artikel betref. Ek het veral die maklike manier waarop die artikel geskryf is, waardeer.

J. R., Verenigde State

Gewigsverlies Ek het die artikel “As ék gewig verloor het, kan enigiemand dit doen!” (22 Januarie 1993) gelees, en hoewel ek baie bly is dat die skrywer die stryd teen sy gewig wen, is ek bevrees dat die artikel baie sal aanmoedig om te dink dat mense wat oorgewig is net selfbeheersing en ’n dieet nodig het. My probleem verg meer as net ’n dieet van “5000 tot 6300 kilojoules per dag”. Ek eet kompulsief en is verslaaf aan kos. Ek het eers onlangs besef dat ek as ’n volwasse kind van ’n alkoholis ’n honger na liefde en selfrespek probeer stil het. Daarom is ’n strawwe dieet nie ’n eenvoudige oplossing vir hierdie ingewikkelde kwessie nie.

R. S., Verenigde State

Ons waardeer hierdie eerlike kommentare. Maar die artikel was hoofsaaklik gerig tot individue met slegte eetgewoontes en nie tot diegene wat met ernstige eetversteurings worstel nie. Laasgenoemde het moontlik professionele hulp nodig om hulle probleem te bowe te kom. Nuttige inligting oor eetversteurings is in ons nommer van 22 Februarie 1992 gepubliseer.—RED.

Die artikel was soos ’n oorsig van my eie geskiedenis van slegte eetgewoontes. Die wenke was baie nuttig, en ek pas hulle nou toe. Baie dankie vir hierdie artikel!

S. P., Brasilië

Die artikel het my geleer hoe om my eetgewoontes op ’n gesonde manier gebalanseerd te hou. Dit was presies wat ek nodig gehad het. Dankie!

S. G., Verenigde State

Perde Die artikel “Perde was my lewe” (22 Mei 1993) het my geroer. Voordat ek ’n Christen geword het, het ek byna al my vrye tyd aan perdry en die versorging van perde gewy. Maar nadat ek die Bybel begin bestudeer het, het ek my duur stokperdjie laat vaar en die voltydse predikingswerk betree. Ek is nogtans steeds lief vir perde. Die artikel het my help besef dat ander ook soortgelyke gevoelens ervaar.

G. V., Duitsland