’n Groot droom is bewaarheid!

DEUR ONTWAAK!-MEDEWERKERINNIGERIË

MEER as 500 Getuies was op 9 Februarie 1994 by die Bethel in Nigerië vir middagete toe die kelners roomys vir nagereg ingebring het. “Wat is die geleentheid?” het sommige hardop gewonder. “En dis nie sommer net roomys nie; maar so ’n verskeidenheid geure—vanielje, sjokolade, aarbei en pistachio!”

“Vierkleurroomys! Dis om ’n spesiale rede”, het die broer wat die leiding tydens die maaltyd geneem het, aangekondig. “Dis om ons oorskakeling na vierkleurdruk [volkleurdruk] te vier!”

Die dawerende applous wat daarop gevolg het, was nie net vir die roomys in die eetsaal nie. Dit was uit waardering vir die nuwe drukperse in die fabriek wat reeds begin het om Die Wagtoring en Ontwaak! in volle kleur te druk. Volkleurdruk is nou wêreldwyd ’n werklikheid. Nigerië is die laaste groot tak wat drukwerk doen wat na volkleurdruk oorgeskakel het—’n stap waarmee daar in die middel-tagtigerjare begin is. Van Die Wagtoring van 15 Maart 1994 af behoort tweekleurdruk in Nigerië tot die verlede.

Twee nuwe drukperse, die Koenig en Bauer Rapida 104 het van die Nederlandse tak gekom. Saam met die perse het nog ander druktoerusting gekom: ’n plaataftaster, vouer, hegmasjien, afkantmasjien en velsnyer. Die toerusting het altesaam 130 ton geweeg.

Drukperse wat op lug dryf!

Met die besluit om die perse Nigerië toe te stuur, het die probleem ontstaan oor hoe hulle verskeep gaan word. Want ’n pers wat 35 ton weeg, pas nie in ’n reistas nie! Bernd Sauerbier, wat die verskeping van die perse uit Nederland georganiseer het, het gesê: “Ons moes besluit wat die beste manier sou wees om die masjiene te vervoer sonder dat hulle beskadig word.”

Sulke perse word gewoonlik in groot houtkratte verskeep. Die broers was egter nie seker of hout sterk genoeg sou wees vir die strawwe toestande op see en die op- en aflaai by die hawens nie. ’n Goedkoper en veiliger alternatief sou wees om die perse in staal vervoerhouers, wat 12 meter lank is, te verskeep. Maar hoe kry jy sulke groot masjiene in en uit hierdie houers? Broer Sauerbier het gesê: “Dit was ’n uitdaging omdat ons nog nooit drukperse in houers gelaai het nie. Selfs die maatskappy wat die perse vervaardig het, het glad nie geweet hoe om hulle op hierdie manier te verskeep nie.”

Die oplossing het die gebruik van lugkussings behels, wat ook as luggevulde modules bekend staan. Hierdie lugkussings lyk nie baie indrukwekkend nie, maar hulle doen ’n groot werk. Hulle is plat eenhede wat van aluminium en rubber gemaak is en is ietwat groter en swaarder as ’n aktetas. Saamgeperste lug word deur hulle gepomp en dan afwaarts gedryf. Dit lig die lugkussings, saam met wat ook al daarop rus, effens van die grond af op.

Op hierdie manier kan selfs die dele van ’n drukpers wat baie tonne weeg op ’n dun lugkussing gestut word. Hulle dryf in die lug! Wanneer ’n deel van die pers eers van die grond af gelig is, is dit maklik om dit met die hand te stoot waar jy dit ook al wil hê.

Die Getuies het hardebord op die vloer van die houers neergesit sodat dit glad genoeg sou wees om die lugkussings binne die houers te gebruik. Hulle moes ook seker maak dat die vloer van elke houer heeltemal gelyk is. Toe die masjiene in die houers was, het die broers staalstawe aan die kante en aan die bokant van elke houer gemonteer om seker te maak dat die vrag stewig vas is. Dit het in Augustus 1993 twee weke geduur om al die dele van die perse in die houers te laai.

Op 29 Desember 1993, om 6:00 nm., het die eerste vyf houers by die Bethelkompleks in Nigerië aangekom. Die broers het hiervoor gewag, gretig en gereed om te begin met die veeleisende taak om die vrag af te laai. Hulle het deur die nag tot dagbreek gewerk. Aangesien die masjinerie op lugkussings gepak was, het werkers saamgeperste lug daarin gepomp, en die dele van die pers het stuk vir stuk uit die houers gesweef. Hyskrane het elke deel toe opgelig en dit op platforms gesit wat spesiaal hiervoor by die ingang van die fabriek gebou is. Die lugkussings is weer gebruik, en terwyl ’n skare geesdriftige toeskouers toegekyk het, is die masjiene met die hand in posisie gestoot.

Verheug oor volkleurtydskrifte

Om 7:45 nm., op 3 Februarie 1994, is die eerste Engelse Wagtoring in volle kleur op die perse in Nigerië gedruk. Die perse het weldra ook tydskrifte in Joroeba, Ibo, Efik en Frans gedruk.

Wat was die reaksie toe diegene wat by Bethel woon die eerste tydskrifte gekry het? “Ek was verheug!” het een gesê. “Die tydskrifte is verreweg die aantreklikste publikasies wat in hierdie land gedruk word.”

’n Ander Betheliet het gesê: “Toe hulle beskikbaar geword het, het ek onmiddellik 20 eksemplare gekoop, wat ek per pos vir my familie en vriende gestuur het. Ek kan nie wag om hulle in die veld te gebruik nie.”

Toe ’n ander Betheliet gevra is hoe sy oor die nuwe volkleurtydskrifte voel, het sy gesê: “Die tydskrifte is pragtig! Dit is nog ’n bewys dat Jehovah wêreldwyd vir almal omgee!”

Terwyl die werkers dus by Bethel hulle vierkleurroomys geniet het, het hulle aan volkleurtydskrifte gedink. Soos een persoon gesê het: “’n Groot droom is bewaarheid.”

[Prente op bladsy 21]

Dele van die drukpers wat baie tonne weeg, is op ’n dun lugkussing gestut