’n Bewys van liefde, geloof en gehoorsaamheid
OP 16 Mei 2005 was die oggend lekker koel en die lug helder by Watchtower Farms in Wallkill, New York. Die netjiese grasperke en blombeddings het geglinster van die reën wat voor dagbreek geval het. ’n Eend met agt kleintjies het rustig op die kalm water naby die kant van die dammetjie geswem. Besoekers het hulle verwonder oor hoe mooi alles is. Hulle het sag gepraat, asof hulle nie die rustigheid van die oggend wou versteur nie.
Die besoekers was Jehovah se Getuies wat uit 48 lande oor die hele wêreld gekom het. Maar hulle het nie na die natuurskoon kom kyk nie. Hulle het belanggestel in die werksaamhede in ’n ruim rooibaksteengebou, die nuutste byvoeging tot die Verenigde State se Bethelkompleks by Wallkill. In daardie gebou het hulle hulle weer verwonder, hoewel die toneel nie stil of rustig was nie.
Die besoekers het van ’n tussenverdieping af op ’n klomp masjiene afgekyk. Vyf ontsaglike drukperse staan op ’n blink betonvloer wat groter is as nege sokkervelde. Hier word Bybels, boeke en tydskrifte gedruk. Yslike rolle papier, wat 1 700 kilogram elk weeg, draai soos die wiele van ’n vinnige vragmotor. Elke rol papier, wat 23 kilometer lank is, word binne net 25 minute deur die pers opgebruik. Die pers dra gedurende dié tyd die ink op die papier oor, maak dit droog en verkoel die papier sodat dit in tydskrifte gevou kan word wat vinnig op oorhoofse vervoerbande beweeg om in kartonhouers gepak en na gemeentes gestuur te word. Ander perse druk boekkaterns, wat vinnig na ’n bergplek met rakke tot teen die plafon vervoer word, waarvandaan dit na die boekbindery gestuur word. Die werksaamhede word deur ’n rekenaar gereël en verloop seepglad.
Die besoekers het die perskamer verlaat en toe op ’n toer deur die boekbindery gegaan. Hier vervaardig masjiene hardebandboeke en luukse uitgawes van die Bybel teen ’n spoed van tot 50 000 per dag. Boekkaterns word in volgorde versamel, gebind en afgekant. Daarna word die omslae aangeheg. Stapels voltooide boeke word in kartonhouers gesit. Die kartonhouers word outomaties toegeplak, van ’n etiket voorsien en op ’n laaiplank gepak. Daarbenewens versamel en verpak ’n sagtebandboekbindery tot 100 000 boeke per dag. Dit bestaan ook uit baie masjinerie—tallose motore, vervoerbande, ratte, wiele en bande—wat alles teen ’n verstommende spoed beweeg om Bybellektuur te vervaardig.
Die drukkery se gesofistikeerde hoëspoedmasjinerie, wat met die presisie van ’n goeie horlosie werk, is ’n wonder van die hedendaagse tegnologie. Soos ons sal sien, is dit ook ’n bewys van die liefde, geloof en gehoorsaamheid van God se volk. Maar waarom is die drukkery van Brooklyn, New York, na Wallkill verskuif?
’n Vername rede was om die drukwerk en versending te vereenvoudig deur die werksaamhede op een plek bymekaar te bring. Jare lank is boeke in Brooklyn gedruk en versend en is tydskrifte in Wallkill gedruk en versend. As die werksaamhede saamgevoeg word, sou minder personeel nodig wees en sou gewyde bydraes beter gebruik kon word. En aangesien die perse in Brooklyn begin oud word het, is twee nuwe MAN-Roland-Lithoman-drukperse van Duitsland bestel. Hierdie perse was te groot om in die drukkery in Brooklyn te pas.
Jehovah ondersteun die werk
Die doel van die drukwerk was nog altyd om die goeie nuus van God se Koninkryk te bevorder. Dit is duidelik dat Jehovah die werk reg van die begin af geseën het. Handelsdrukkers het van 1879 tot 1922 die boeke gedruk. In 1922 is ’n sesverdiepinggebou by Concordstraat 18 in Brooklyn gehuur en toerusting gekoop om boeke te druk. Party het destyds getwyfel of die broers die taak sou kon verrig.
Een van dié wat getwyfel het, was die besturende direkteur van die maatskappy wat voorheen die meeste van ons boeke gedruk het. Toe hy Concordstraat besoek het, het hy gesê: “Hier sit julle met ’n drukkery van die hoogste gehalte, en niemand in die plek weet hoe om daarmee te werk nie. Binne ses maande sal dit alles ’n hoop rommel wees; en julle sal uitvind dat die beste mense om julle drukwerk te doen, dié is wat dit nog altyd gedoen het en wat in die bedryf is.”
Robert J. Martin, wat destyds die opsiener van die drukkery was, het gesê: “Dit het logies genoeg geklink, maar dit het nie die Here in ag geneem nie; en hy was nog altyd met ons. . . . Kort voor lank het ons boeke gemaak.” Gedurende die daaropvolgende 80 jaar het Jehovah se Getuies miljarde stukke lektuur op hulle eie drukperse gedruk.
Toe, op 5 Oktober 2002, by die jaarvergadering van die Wagtoring- Bybel- en Traktaatgenootskap van Pennsilvanië, is daar aangekondig dat die Bestuursliggaam dit goedgekeur het dat die drukkery van die takkantoor in die Verenigde State na Wallkill verskuif word. Twee nuwe perse is bestel, en dit sou in Februarie 2004 afgelewer word. Die broers sou die drukkery moes ontwerp en uitbrei en binne 15 maande gereed wees om die nuwe perse in ontvangs te neem. Dan sou die installering van die nuwe boekbindery en versendingsafdeling binne die daaropvolgende nege maande voltooi moes word. Party het moontlik bedenkinge gehad toe hulle hoor wat die rooster is—dit het na ’n ontsaglike taak gelyk. Maar die broers het geweet dat dit met Jehovah se seën gedoen kan word.
“’n Gelukkige gees van samewerking”
Die broers het geweet dat Jehovah se volk hulle gewillig sou aanbied en het met die projek begin (Psalm 110:3). Omdat dit so ’n ontsaglike projek was, was meer werkers nodig as wat in die Bethelbouafdelings beskikbaar was. In die Verenigde State en Kanada het meer as 1 000 broers en susters met bouvaardighede aangebied om van een week tot drie maande lank te dien as deel van ’n tydelike vrywilligerprogram. Ander is van die internasionale kneg- en vrywilligerprogramme genooi om met die projek te help. Streekboukomitees het ook ’n groot bydrae gelewer.
Vir baie wat aangebied het om met die Wallkill-projek te help, het dit groot onkoste beteken om te reis en ’n ruk lank nie by hulle sekulêre werk te wees nie. Tog het hulle hierdie opofferings vreugdevol gemaak. Al hierdie bykomende vrywilligers wat gehuisves en kos gegee moes word, het die Bethelgesin geleenthede gebied om hulle ter ondersteuning van die projek in te span. Meer as 535 Bethelgesinslede van Brooklyn, Patterson en Wallkill het aangebied om Saterdae aan die projek te werk, benewens hulle gewone toewysings op weeksdae. Die oorweldigende ondersteuning wat God se volk aan hierdie geskiedkundige poging gegee het, was net moontlik omdat Jehovah die projek ondersteun het.
Ander het geldelike bydraes gegee. Die broers het byvoorbeeld ’n brief van negejarige Abby ontvang. Sy het geskryf: “Baie dankie vir al die werk wat julle doen—om al die wonderlike boeke te maak. Ek kom dalk binnekort kuier. My pa het gesê volgende jaar! Ek sal ’n lapelkaart dra sodat julle weet wie ek is. Hier’s 20 dollar [R140] vir die nuwe drukpers! Dis my sakgeld, maar ek wil dit vir julle gee.”
’n Suster het geskryf: “Aanvaar asseblief my geskenk van gehekelde hoede wat ek met my eie twee hande gemaak het. Ek wil graag hê dat hierdie hoede vir die werkers gegee word wat aan die Wallkill-projek werk. Volgens ’n almanak sal dit ’n baie koue winter wees. Ek weet nie of hulle reg is of nie. Maar ek weet dat baie van die werk by Wallkill buite gedoen sal word, en ek wil seker maak dat my broers en susters hulle koppe sal warm hou. Ek het nie enige van die vaardighede waarna die broers soek nie, maar ek kan hekel, en daarom het ek besluit om hierdie vaardigheid te gebruik om by te dra wat ek kan.” Sy het 106 gehekelde hoede ingesluit!
Die drukkery is op tyd voltooi. John Larson, die opsiener van die drukkery, het gesê: “Daar was so ’n gelukkige gees van samewerking. Wie kon twyfel dat Jehovah die werk seën? Dit het so vinnig gegaan. Ek kan onthou dat ek in Mei 2003 in die modder gestaan en kyk het hoe die broers die fondament van die gebou lê. Minder as ’n jaar later het ek op dieselfde plek gestaan en kyk hoe ’n drukpers werk.”
Toewydingsprogram
Die program om die nuwe drukkery en drie woongeboue toe te wy, is op Maandag 16 Mei 2005 by Wallkill gehou. Daar was ’n videoverbinding met die Bethelkomplekse by Patterson en Brooklyn, sowel as die Kanadese Bethel. Altesaam 6 049 het die program geniet. Theodore Jaracz, ’n lid van die Bestuursliggaam van Jehovah se Getuies, het as voorsitter gedien en het ’n kort oorsig van die geskiedenis van die drukwerk gegee. Deur middel van onderhoude en video-aanbiedings het Takkomiteelede John Larson en John Kikot die geskiedenis van die bouprojek sowel as die drukwerk in die Verenigde State hersien. John Barr van die Bestuursliggaam het die laaste toespraak gehou en die nuwe drukkery en drie woongeboue aan Jehovah God toegewy.
Gedurende die week daarna is Betheliete van Patterson en Brooklyn die geleentheid gegee om op ’n toer deur die nuwe geboue te gaan. Altesaam 5 920 het gedurende dié tyd daar besoek afgelê.
Hoe beskou ons die drukkery?
In die toewydingstoespraak het broer Barr sy gehoor daaraan herinner dat die drukkery, hoewel dit baie indrukwekkend is, nie van belang is weens die masjinerie nie. Dit is van belang weens mense. Die lektuur wat ons druk, het ’n diepgaande uitwerking op mense se lewe.
Elkeen van die nuwe perse kan in net meer as ’n uur ’n miljoen traktate druk! En tog kan net een traktaat ’n verreikende uitwerking op iemand se lewe hê. In 1921 het ’n span mans wat spoorlyne in Suid-Afrika in stand gehou het, al met ’n stuk spoorlyn langs gewerk. Een van hulle, ’n man met die naam Christiaan, het ’n stuk papier gesien wat onder ’n spoor vasgesit het. Dit was een van ons traktate. Christiaan het dit met groot belangstelling gelees. Hy het na sy skoonseun toe gehardloop en opgewonde gesê: “Ek het vandag die waarheid gevind!” Kort daarna het hulle geskryf en meer inligting gevra. Die Suid-Afrikaanse takkantoor het nog Bybellektuur gestuur. Die twee mans het gestudeer, is gedoop en het Bybelwaarheid aan ander verkondig. Gevolglik het baie mense die waarheid aangeneem. Trouens, teen die vroeë 1990’s was meer as honderd van hulle nakomelinge Getuies van Jehovah—alles omdat een man ’n enkele traktaat op ’n treinspoor gevind het!
Die lektuur wat ons druk, het broer Barr gesê, bring mense in die waarheid, hou hulle in die waarheid, beweeg hulle om yweriger te wees en verenig die broederskap. En die lektuur, wat ons almal help om te versprei, verheerlik bowenal ons God, Jehovah!
Hoe beskou Jehovah die drukkery?
Broer Barr het die gehoor ook gevra om te dink aan hoe Jehovah die drukkery beskou. Hy is beslis nie daarvan afhanklik nie. Hy kan die klippe gebruik om die goeie nuus te verkondig! (Lukas 19:40). En hy word nie beïndruk deur die ingewikkeldheid, grootte, spoed of doeltreffendheid van masjinerie nie. Hy het immers die heelal geskep! (Psalm 147:10, 11). Jehovah ken meer gevorderde maniere om lektuur te vervaardig, maniere wat mense nog nie uitgedink of hulle selfs voorgestel het nie. Wat sien Jehovah dan wat hy werklik waardeer? Hy sien sekerlik in hierdie drukkery die kosbare eienskappe van sy volk—hulle liefde, geloof en gehoorsaamheid.
Die aspek van liefde is toegelig. ’n Meisie bak vir haar ouers ’n koek. Dit sal waarskynlik die ouers se hart raak. Ja, ongeag hoe die koek uitkom, die ouers se hart word geraak deur hulle kind se liefde, wat deur haar vrygewige daad getoon word. Wanneer Jehovah na hierdie nuwe drukkery kyk, kyk hy eweneens verder as die gebou en die masjinerie. Hy beskou dit hoofsaaklik as ’n blyk van liefde vir sy naam.—Hebreërs 6:10.
Wat meer is, net soos Jehovah die ark as ’n blyk van Noag se geloof beskou het, beskou hy hierdie drukkery as tasbare bewys van ons geloof. Geloof waarin? Noag het geglo dat wat Jehovah voorspel het, bewaarheid sou word. Ons glo dat ons in die laaste dae lewe, dat die goeie nuus die belangrikste boodskap is wat op die aarde verkondig word en dat dit noodsaaklik is dat mense dit hoor. Ons weet dat die Bybel se boodskap lewens kan red.—Romeine 10:13, 14.
Jehovah sien ongetwyfeld ook in hierdie drukkery ’n blyk van ons gehoorsaamheid. Soos ons weet, is dit sy wil dat die goeie nuus wêreldwyd verkondig word voordat die einde kom (Matteus 24:14). Hierdie drukkery, sowel as dié in ander wêrelddele, sal ’n rol speel in die uitvoering van hierdie opdrag.
Ja, die liefde, geloof en gehoorsaamheid wat in die finansiering, oprigting en gebruik van hierdie geboue getoon is, word ook weerspieël in die ywerige bedrywighede van Jehovah se knegte oral in die wêreld, terwyl hulle aanhou om die waarheid te verkondig aan almal wat sal luister.
[Venster/Prente op bladsy 11]
UITBREIDING VAN DRUKWERK IN DIE VERENIGDE STATE
1920: Tydskrifte gedruk op die eerste rotasiepers by Myrtlelaan 35, Brooklyn.
1922: Die drukkery verskuif na ’n sesverdiepinggebou by Concordstraat 18. Boeke word van dié tyd af gedruk.
1927: Drukkery verskuif na ’n nuwe gebou wat by Adamsstraat 117 opgerig is.
1949: ’n Uitbreiding van nege verdiepings verdubbel die grootte van die drukkery.
1956: Grootte van die drukkery in Adamsstraat verdubbel weer toe nuwe gebou by Sandsstraat 77 opgerig is.
1967: Tienverdiepinggebou opgerig, sodat die drukkery, wat onderling verbind is, tien keer groter is as die oorspronklike gebou.
1973: Bykomende drukkery by Wallkill gebou, hoofsaaklik om tydskrifte te druk.
2004: Al die werksaamhede van die drukkery, boekbindery en versendingsafdeling in die Verenigde State by Wallkill saamgevoeg.